BIBLE THU TAHSANLELNA NANEIPATLE NAMANTHAH DING AHI

Bible hi Pathen thu ahi. Pathen hi van le leiset chule asunga umjouse Sempa ahi natahsan e. Achutile, Bible’a kijih jouse hi Pathen thusei ahi jong natahsan ngaiya ahi.

Vannoiya lekhabu kijih masapen chu Bible ahi. Bible hi ‘Lekhabu’ tina ahi. Bible hi mihem in lekha jihdan ahetmasanga Pathen in Mose koma thu aseipat akona ajihdohsah pat ahi. Bible ahung uma konin mihon ahinsimun ahile, lekha simna aumpantai. Chihna ahung kipanin, jihtho a thu kiseina aumpantai.

Bible simna akonin mihon chihna le themna ahinneipantai. Bible a semtil thu le adang ho sima konin mihem in thil khol nomna ahinneiyin, thepna ahung umtai. Hitia chu, mihem in hetna ahinnei phat in, thilsem ho ahin kholchilnauva konin science ahung umtai. Ajona lamin, Bible tahsan joulouna ahinneitaove.

Leiset le asunga thil umho avetchilnauva konin, leiset hi Bible in asei sangin kum billion tamjoa upa ahitai tin aseitaove. Chule, Nigup sung bep a thil jouse iti Pathen in asem theiding ham? Thil hohi ol ola hung umdoh a, hung umbebe ahi ti aseitaove.

Konkhat in, Pathen thu anelngampoi. Hinla, Bible hi Lhagao thu bou ahin thilsem dan kisei hi, aumdol bou kiseiya, atahbeh umdan kiseina ahipoi.

Genesis a Nikhat ni atito Ninina ati kikah ahin kum billion tam akikah e atiuve.

Pathen hi thiljouse sempa ahile, khatvei asei jongle thiljouse hi apetpet a umjengthei ahilam ahepouve. Aman, Nigup sunga Asem nomna ajeh uma, athilsem sung chu Nigup alutsah ahijeng maiye. Pathen in “ahi” ati chu ahijenge.

Chule, Christa tahsanna lhagao hinkhoa hin Satan achingval jenge ti kihet in. Pathen thu Bible thu hi themcha tahsan joulouna naneipat nini, hichu, Agiloupan ahin manchah a, tahsanlelna ahin neisah cheh cheh ding, ‘Pathen aumpoi’ tichan-gei jong nalunga nakhumpeh jeng ding ahi. Chule, ‘Damun/ Meidil’ kiti jong aumpoi ti natahsasah jeng ding ahi. Nahetlou kah a, hitia nalunggel kisahlel kah achu Damuna napuilut jengthei ahi ti kihet in. Bible a kisei jouse hi Pathen sei ahi tahsanin, Bible sei hohi guilhung teitei jeng ahi jong he in.

Pathen natahsan bangin, Bible tahsanin; akisei jouse hi Pathen sei ahi tahsanin. Ginchat-lelna neihihbeh in, Satan mu not-hihbeh in. Chutile, tahsanna, lhagaova khantouna naneipat ding ahi. Hichu, Pathen lhagao phattheibohna nachanpat ding ahi.

Pathen in panpi jing tan.. .

(From NITIN BIBLE SIMNA NBS 13. By L.K.Hengna)