THIL HITHEILOU CHU THIL HILOUTHEILOU AHI

Jesu chu eiho chonset soh a iumnauva kona eilhatdoh diuva, vannoiya hunga, nungah thengsel Mary sunga kona mihema hung penga ahi. Leiset hinkho aman sungin thenna hinkho, chonset bei hinkho amangin; chonset jeh a thina um (Rom 6:23) chun atohkhah hoi ahipoi. Hinla, eiho chonset jeh a Pathen lunghanna jouse chu amachunga akipoh in, eiho themmona ding chu ama themmonan akipoh in, thingpel in, aleiset mihem tahsa chuto akhetbehsah tai. Hichu, Ama le chonset eipohpehnau tahsana Ama a kingai jongse ‘themmo chang talouva themchanna neiya tonsot-honna ineitheina diuva abol ahi’(John 3:16-17)

Jesu chu athi in, nithumnin athoukittai. Athokit chu, lhagaoboh in asuhgentheiya anodohpehnu Mary Magdalene (Madala khoa Mary kitinu) chun agamumasapen in, seijuite ahung seipeh tai. Hinla, seijuite hihen adang hon jong, Jesu thokit ding chu thil-hitheilou le angailou hilouva anagel’u ahi.

Athokit a Mary Madalene le numei dang ho akimusah jouva, numeiho chun, atho thu seijuite aseipeh vangun atahsan pouve.  “Ngolkai thu           aseiyun bou agel’uve” (Luke 24:11)

Athikit jouva, Jesu, Amatah seijuite koma akilah vangin, atahsan theilou, Thomas tobang aumnalaiyue (Luke 24:37; Matthew 28:17).

Hinla, Jesu thokit ding thu masangpeh a themgao hon anaseisau ahi. ( Psalm 16:10,.Isaiah 9:2,Isaiah 25:7-8,Isaiah 53:11,) Chule, Pakai Jesu jengin jong veltampi anaseisa ahitai.

Hiche thu Pathen lekhabu’n aseisa ho chu, Jesu’n athojouva aseijuite aseichetpeh a alunggelu ahonpeh a hettheina apeh phat in (Luke 24:44-45) amahon, Jesu athokit-louding chu thil-hitheilou ahi ahetauve.  Ajehchu, chonset le thina hi ‘Satan thaneina’ ahi. Jesu chu chonset neilou, Pathen Chapa, tonsotmi, Pathen a mithum kiti lah anina, Chapa Pathen ahijeh in, Ama chunga Satan in thaneina anei ding chu thil hitheilou ahi.

Jesu lhana alup den ding, lhanin ahenden ding chu thil hitheihoi ahipoi. Pathen in athua anaseisa  le akitepna banga Pathen in akaithou ahitai. Jesu tahsan jouse jong thoukit dia aseisa banga thoukit cheh ding ihiuve. Pathen thun aseisa chu hilouthei ahipoi. Pathen thu hi tonsot a umjing” ahi(Isaiah 40:8) ti ho jouse ahechen taovin ahi.

Chule, Pakai chun, athodoh jou chun, no somli sung in athuhilsa ho le Pathen thu themgao ho, David le adang hon LABU(Psalms) a aseisau le Mose thusei ho ahilchet peh in ahile, anaseisa ho jouse jong ahechen taove. Chule,

Peter in aseilep dinga anasei, Peter anop louhel vanga, aseilep thouthou jong chu Pathen thuseiho thon ngailou ahi ahetchetnauvin apangtai. Peter ajachat a, jum akisah vangin Pakaiyin ahilna anahijoi. Hijehchun, Pentecost ahunglhuna Pakaiyin ateppeh banga Lhagao Theng achunguva ahung lhunni chun, amelmateu, Jesu that ho angsunga chun, Peter in ngampel in thu aseitai.

Peter in Israel mipite chu, Pathen thilgon jeh’a Jesu apehdoh’u ahidol jong aseitai. Hichun aman, “ Pathen in ahet masah a agontohsa dung-juiya hiche Jesu pehdoh a aum chun nang hon Dan neiloute khut’a thingpel’a nakhenbeh-un nathat tauve; Ama chu thinan ahenjou hoi ahi loujeh-in, thi genthei nan ahen chu Pathenin asut lhan, akai-thoutai.” (Acts 2:23-24) tia aseiya, pathen thu umdol ho aseiya, chonse ahinau aseipeh jouvin; kisih a Jesu tahsana kisan ho ngaidam achandiu ahi asei phat in, mi songthum val in atahsan taove. Hichu, Houbung kiphudohna, Christian kipatna ahitai.

Jesu thokit ding chu Pathen thu ahin, hiloutheilou ahina le Ama tahsana anungjui jouse thokit ding thu Bible chang themkhat kahinlhen hohi simin. Chutengle, Jesu thoukit-loutheilou ahibanga, atahsan jouse jong thoukitl-loutheilou ahi kihet in, tahsanin, nitin in Pathen thangvah jing in, athu Bible hi nitinin simin. (THIL HITHEILOU CHU THIL HILOUTHEILOU AHI tia kajih hi alhingset in simteiyin.)

Pathen in jou aseiding chu thil-hithei ahipoi.

“Hitia chu hiche thilbol nia kona hi Pathen kikheltih neilou le itih a jou thei lou ahi hea, hite ni jeh a ama koma kisel eiho hin imasanguva kikoi kinepna chu tuh chah dinga nasa tah a kitilkhou ihiuve.“ (Hebrews 6:18).    

Pathen in kathilgon chu umjing ding, kabolnom chu kaboltei ding ahi ati (Isaiah 44:24,26; 46:9-10).

Pathen in ahidia aseijouse hicheh ding ahi. Jesu’n “Pathen thu chu akisuse theipoi” ati ahi(John 10:35).

Jesu’n aseiye “Van le lei mang ding ahin, Ka thu vang manglou ding ahi” (Mark 13:31).        

Pakai Jesu’n, leiya alenlaiya chu “Kahinna hi kathua kapeh ahin, kalahkit dia kapeh ding ahi” tia anaseisa ahi(John 10:17-18).

Pathen in “Keima Pakai chu kahi, mijouse Pathen kahi. Keima dia ipi ahomo um am?” ati. (Jeremiah 32:27).

Jesu Christa athokit banga, Ama tahsana anungjui jouse thoukit cheh ding ahi.(Ephesians 2:1-6).

“Ijeh-inem itile nangman kamsunga Jesu chu Pakai tia naphondoh a chule Pathenin thinaa kona Ama akaithou chu nalungthima natahsan le nasochat ding ahi.”  (Romans 10:9)”

“Pa loupinan thinaa kona Christa akaithou banga eiho hinkho thah a ihin theina diuva, baptize ichan’uva chu amatoh thinaa kivui-khom ihitauve.” (Romans 6:4)

“hijeh a chu ahing ho chu amaho ding mai maiya hing hilouva, amaho dia thia thoudoh kitpa dinga chu ahin theina diuva amaho khel’a Ama chu thia ahitai. Hichejeh chun tukal’a lhah koima tahsa dol’in kahetapouve; Christa jong tahsa dol’a kanahet nau um jongle tukal’in vang chutin hetapou vinge. Hijeh a chu koi hi le Christa to hingkhom chu thilsem thah soh ahitan, til’a kisem masa chengse kitolmang ahitai, ven thil thah asohtai.”. (2 Corinthians 5:15,17).

“Thinaa kona Jesu kaithoupa lhagao chu nasunguva achen le thinaa kona Christa kaithoupa tah chun nasunguva cheng a-lhagao jal’a natahsau thi thei jong chu ahinsah ding ahi.” (Romans 8:11).         

“Ken amaho tonsot hina kapen, a-iti a mang thah lou diu, ka-khut’a kona koiman jong eilahpeh theilou ding ahi.” (John 10:28).

“ Keima sunga nachen’uva chamna nanei theina diuva hicheng hi najah-uva kasei ahi; vannoiyah gim genthei nathohui; amavang hangtah-in pangun Keiman vannoi kajoutai,” ati.” (John 16:33).

“Adam sunga pen jeh-in mi jousen athilon, hitobanga chu Christa sunga um jeh a mi jouse kicho hing ding ahiuve.Hiche hi amichang cheh ama phat phat’a kilhah tho ding ahi; Christa apatna ahin, aban’a Christa hung teng amite hintin, “ (1 Corinthians 15:22-23).

“Ijeh-inem itile Pathenin agalte jouse ajoa akengto noiya alutsah masangsea Christan lengvai apoh tei ding ahi.” (1 Corinthians 15:25).

 “I-Pakaiyu Jesu Christa jal’a jona eipeuva Pathen chu thangvah-in um hen!” (1 Corinthians 15:57).

“Ama kamu phat hin akhophang te ni bul’a kalhun, athi to-bangin ka-umtai. Hichun aman akhut jet lamin eithamin, “Kicha hih-in, Keima akipatna le akichai-na, ahing jingpa, kanathin, ahinla ven, Keima tonsot tonsot’a dingin kahing jinge; thina le thikhol khul kot-heh kaneiye. “ (Revelation 1:17-18).

“Laltouna a kona ogingtah a thu kisei khat kajan, “Ven, Pathen chenna in chu mihemte lah ahitai, Pathenin amaho achenpia, amaho amite hidiu, Pathenin amaho achenpia a-Pathenu hiding ahi.
 Amit’uva kona amit lhi jouseu atheh hul peh ding, thina umta lou ding, lunghem-na le ka-na, thohgimna jong umta louhel ding ahi; ajeh chu thil masa chengse kitolmangsoh ahitai,” ati.
Laltouna Toupan aseiyin, “Ven ijakai kasemthahsoh ahitai,” ati. Chujongle aseiyin, “Hicheng thu hi tahsan umtah, thutah cheh ahi, sunin,” eiti.” (Revelation 21:3-5).

Pathen in, Jesu Christa a tonsot-hinna eipeh’u hi nachanin lang, napanpi jing tahen.

Christa’a na insungmi keima L.K.Hengna