Saturday, 28 June 2014

Satan le Athahatna Chonset le Thina joupa Jesu belin

Sunday nihi Christianten, Jesu Christa thina akona athokit jala Pathen houna a iman jiu ahi. A thokitna hi tahsante dia tonsot-hinna lampi ahitai. Thoukit a Pa-to eikijopmatsah’ u ahitai.
Jesu chu thina akona thouva, vana kaltouva, Pa jetlama touva, lei le van chunga vai homa panga ahitai.
Jesu Christa hi Thoukit Pakai, Hingjing Pathen ahitai.

Athokit a vana akaltou jalin Ama Pa kom jotna LAMPI dihtah le khatseh chu ahitai.
Jesu Christa hi “Lampi,Thutah chule, Hinna ahi” (John 14:6)
Pathen in, Jesu chu “leiya le vana thuneina jouse apeh ahitai”(Matthew 28:18-20) Hiche thaneina jala chu Ama tahsana kisan jouse “Pathen chate ahisah ahi”(John1;12)
Thina hi chonset jeh a umdoh ahi. Chonset hi Satan in mihem alheplhah jeh a uma ahi.
Mihemte gal lenpen chu Satan, Thina le Chonset ahi. Hiche gal hi mihem in ahatna a ajothei khatcha aumpoi.
Hiche gal lenpen thum ‘Satan le atha-hatna Chonset le Thina’ chu jouvin, nithum nin, Jesu Christa chu athoudoh kittai.
Jesu hi Galjouse Joupa ahitai. Hiche, ‘Galjona tha-hat’  chu Ama tahsana kisan jouse chang ding ahi. Hiche, tha-hatna chu Lhagao Theng akona, tahsante chang diu ahi.
Jesu Christa chenpi jouse chu ‘Satan le atha-hatna chonset le thina’ in ajolou ding ahitai. Tahsa thina umjongle, Jesu thokit banga thoukit’uva, Christa-to tonsot geiya vai homding ihitauve. Loupina Pakai chang jing tahen.

Hiche kipana jal in, tuni Hou-ina chenlang, nakipana chu midang hoto kipah khomin, Pathen vahchoi le athua kihoukhomna neiyin, Pakai loupina din.
Nangma Houbung umna umhih jongle, Jesu Christa nungjui dih le Kipana thupha jui le kihilna Houbung ahipoule, chen kikhomin.
Pakaiyin, tahsante jouse hi Ama mina kiloikhoma, tahsanna lama khangtou khom dia eideiyu ahi.
 “Ne-in, don-in, ipi boljong-lechun, ijakai Pathen loupina din bolin” (1 Corinthians 10:31 NASB).
Ijemtia, Christa galjona chang loulai nahile, tuhin, Jesu chu taonan kouvin. Chonset ngaidam thumin, natahsa le hinna, lungthim pumpi, le ijakai akhut a lhandoh in, na Huhhingpu le Pakai hung hiya, Ama deilama napuidin kipedoh in. Chule, Agaljona tha-hat le tonsot hinna chu napeh din ngeh in. Asei thonngailou Pathen in, Ama deibanga thumte jouse chu apeteiye. Tahsan in, bolin. Ginchat-lelna neocha jong nei hih in. Agiloupan, neocha chu amangcha nomji. Tahsanna lhingset neiyin, bolin.

Pathen in panpi jingtan.


No comments:

Post a Comment