LUNGHEINA DIHTAH IN HINNA ASODOH E

Christa thupha miho naseipeh nomle, Baptist John le Pakai Jesu bangin kipanin.

Mathew 3:2 ahin, iti Baptist John le Pakai Jesu chun Kipana Thupha ana lhangsap pat’u ham ti akisun e.Amanin, “Lung heiyun, Pathen Lenggam anaitai” (Matthew 3:2) ti hilin akipan lhonin ahi.

“Lunghei” kiti hi English in “Repent” akiti. Hichu, “lung geldan khel” tina keumai ahipoi. “Dinmun khel doh”, umna mun chon, nunlui dihlou paidoh a nunthah apha a kheldoh” atina ahi.

“Repent” hi konkhat in “kisih” ati. Hinla, keima mudolin “kisih” hi English a “Regret” kiti joh hi ahi.  Bible in “Regret” atipoi. “Repent” atijoh ahi.

Lunghei, “Lung geldan kheldoh” na dingin “lungdon” angaiye. Hinla, “lungdon” jong hi “Pathen deilam” ahi ngaiya ahi.

Eipao Bible thahpa ahin kichen lheh jeng in ahi. Hinla, “Lunghem” ati lele hi keiho lah in akimanlam kahahetpon, “lungdon”  kati mai ahi. Hichu, English a “Sorrow” atihi ahi.

Keima hinkhoa kamudoh (experienced) dolin, “lungdonna” khonteh to hi kichiltah a lung heitheina ahi kahechen in ahi.  

Bible chang hi sim’ute,

 “Pathen deiya ‘lunghem’ (lungdon) chun  ‘lungheina’ asojin, ‘lungheina’ chun ‘huhhingna’ asodoh jin ahi;

 leiset thudol’a (vannoi deiya) lung gim (lungdon) nan vang thina asodohji ahibouve.” (2 Corinth 7:10)

1.    Mi khat chun, anunchan phalouva chu hahsatna tahbeh atolo tengle, kisih’a, lung aheiya, dinmun kheldohna dinga-la, aman hatna aneilou akihet tengle; adinna mun chu akheldoh a, Pakai koma taoji ahi. Chutengle, Pakaiyin ataona asanpeh a, nunlui chu apaidoh theiya, Christa’a nunthah (hinkho thah) chu aneidohji ahi.

2.    Hinla, mi konkhat in, “lungdonna’ atotengle Pathen bellouvin, engset a hakibolna anei chehji. Judon ham chun, ajudon jeh a natna atole, Pathen bel sangin, ahadon cheh in, athipilo jitai. Konkhat in, anunchan phatlou jeh a hahsatna, lungdonna atotengle, kitha lung apuji.

“LUNGHEINA 1na”  hi “Pathen deiya lungdon” ahin, “lungheina” asojin, “Lungheina” chun Pathen bela Huhhingna, tahsa le lhagao damna le hinna, tonsot hinna asodohji.

Hitobang hi Leng David, Job, Chapa vahmangpa, Songkul ngahpa, St.Augustine, Martin Luther, le adang tampi ahi.

Kei jong chutobang chu kahin, hinla, Pakai lhacha ho lah ahin kakikoi ngampoi. Nang jong nahi maithei ahi. Nahi jengle, kei gola hin kijih thatan.

“LUNGHEINA 2na”  vang hi “vannoi le agloupa deiya”  “Lungdonna nei” ahin. Hitobang chun thina, ama le ama kithana (suicide) asodoh ji. Hichu, tua le tonsot geiya thina ahi. Hitobang bol hochu, Juda Iscariot le adang tampi aumin. Tuni geiyin jong aum jinge. Hiche, tobang thudol kihilna hi, Pathen in pha asah-le nikhat kahinso ding ahi. Hinla, Facebook hilouva Blog/ Website/Lekhabu abou bolding kagot ahi.

Facebook hi thuchomcha cha bolna din apha’n, thusao bolna thei ahipoi.

Khatvei, ‘AGAPE’ tahbeh umdol ‘Song of Solomon le Theology’a Christian Marriage a kihilna banga kajih a ‘AGAPE’ fb page a kaso-le, achom jeh in kahilchetna asohsaotheipon, min ahethemjoupon, kadonda lotai. Thusao dom bolna din fb ahitheipoi.

Tunia din ngataote.

Pathen Lungdeiya “Lungheina” dihtah nanei tah ding kakinemin; hiche, hi, nangman midang ho naseipeh sonna a naman ding kanom e.

Pathen in phattheina kim nape tahen.