Bible Hi Eima Lim Vetna a Manding ahi

“Pathen lekhabua kisun : “Midih (dihchamkim) khat’a khatcha jong aumpon,”( Rom 3:10)

Ole, nang midih nahi jeng em?

Pathen tahsan nahile, Athusei Bible a um hohi tahsan ding, dih sahcheh ding ahi.Bible in “Midih(dihchamkim) khatcha aumpoi” atia jong dih(dihchamkim)  kisateitei ho chu, adihlou mong mong, amangthah ding bou ahi.

BIBLE THU TAHSANLELNA NANEIPATLE NAMANTHAH DING AHI

Bible hi Pathen thu ahi. Pathen hi van le leiset chule asunga umjouse Sempa ahi natahsan e. Achutile, Bible’a kijih jouse hi Pathen thusei ahi jong natahsan ngaiya ahi.

Satan le Athahatna Chonset le Thina joupa Jesu belin

Sunday nihi Christianten, Jesu Christa thina akona athokit jala Pathen houna a iman jiu ahi. A thokitna hi tahsante dia tonsot-hinna lampi ahitai. Thoukit a Pa-to eikijopmatsah’ u ahitai.

Jesu chu thina akona thouva, vana kaltouva, Pa jetlama touva, lei le van chunga vai homa panga ahitai.

Jesu Christa hi Thoukit Pakai, Hingjing Pathen ahitai.

Lhagao Theng Chenpi

Johnin ahettohsah-in, “van a kona lhagao vakhu banga hung kumlha’a , achunga aumden chu kamui.” (John 1:32NIV)

LHAGAO THENG TAITOM kiti hi ipi kiseina ham?

(eidong hon anave tauvin. Dohna donbutna,)

Mihem tamjo hi Pathen tahsana ahi. Hinla, Pathen hetdan le tahsan dan akibangpoi. Pathen chomchom uma tahsan le hou atam e. Hinla, tampi houhon jong Pathen tah khat vang umteidin tahsanna aneithovui. Jesu jong Pathen akon, Themgao khat hiteidia tahsan atame. Hinla, koima dang houva hin Pathen ‘Lhagao Theng’ kisei le tahsan aumpoi.

Jesu Christa nungjui (achomlama ‘Christian’ kiti) honbou ‘Lhagao Theng’ kiseiya ‘Pathen khatseh kihetdan thum channa ahi.

THIL HITHEILOU CHU THIL HILOUTHEILOU AHI

Jesu chu eiho chonset soh a iumnauva kona eilhatdoh diuva, vannoiya hunga, nungah thengsel Mary sunga kona mihema hung penga ahi. Leiset hinkho aman sungin thenna hinkho, chonset bei hinkho amangin; chonset jeh a thina um (Rom 6:23) chun atohkhah hoi ahipoi. Hinla, eiho chonset jeh a Pathen lunghanna jouse chu amachunga akipoh in, eiho themmona ding chu ama themmonan akipoh in, thingpel in, aleiset mihem tahsa chuto akhetbehsah tai. Hichu, Ama le chonset eipohpehnau tahsana Ama a kingai jongse ‘themmo chang talouva themchanna neiya tonsot-honna ineitheina diuva abol ahi’(John 3:16-17)

Kihilna Dihtah Le Kichehtah Neiya Juiding

“Nahinkho umdan (nun le khan) le na-thuhil (doctrine) chu phatechan vechil in; Chingtup in. Ajehchu, nachutibolle, nangma le nathusei ngaiho na-huhhing ding ahi” (1 Timothy 4:16 NIV)

‘Thuhil’, ‘Kihilna’ (Doctrine) kiti hi ‘kihilna khat’ thudol Bible pumpi ahi iti kiseiyem ti hetna ahi. Vetsahnan, ‘Themchanna’ thu hi Bible munkhat a aseina keu hilouva, Bible pumpia aseidan ho lahkhoma hetdoh ding, hichu ‘Kihilna’ na a manchah ding tina ahi.

Nangaichat Napehna din Alunglhaina Bol masan

Pathen in adei chu, “Nangman na Pakai na Pathen chu naluntmi pumpi, nahinna pumpi le na thaneina apumpia na ngailut ding ahi” (Deuteronomy 6:5).

Hinla, eihon, Pathen thusei donlouvin, Ama ngailutna ineijou pouve. Eiho dei le ngaichat hojoheisempau Pathen sangin ingailu jouve. Hichu, michonse ihinau photchetna ahi.

Pathen Le Jesu Christa Het Hi Tonsot Hinna Ahi

Jesun Pathen le Ama het hi tonsot hinna ahi aseiye. Aman, Pa koma ataonan aseiye, “Pathen tah khatseh Nang le nahinsol Jesu Christa ahet diu hi tonsot hinna ahi.” ( Joh 17:3)

Pathen nahet em? Ole Pathen thudol hea bou nahi jeng em?

Mitamtah in Bible simin Pathen le Jesu thu ahethem in, ‘tonsot-hinna chang in akigel jiuve. Hinla, lhepna atotengle, Pathen ahetna chu apanna umlouvin, akipaljin, ahetna chu mohseh ahijitai.

Mi konkhat ‘Halna’ (Rivival) achangin, kipahtah in alamin, Pathen le Jesu hea neiyin akgelin, midang sanga jong hea le ‘tonsot-hinna’ change le ‘Lhagao’ changing akigelin, lhepna (Ling le khao) atotengle alhudel jitai.

Pathen le Jesu thudol het aumin; Pathen le Jesu het aum e.

‘Pathen le Ama thudol het hi tonsot hinna titahbah-le vang, Theologian jouse Van-gam lut untin, Theology boltheilouse lah a 90% vang hi Van-gam muding umponte. Intina mikhat van-gam kaiding jong, hakibollheh jongleuhen hahsante. Jesu’n “mihao van-gam alutsangin, heubil-homa sangongsao lut abaijoi” atihi akaaleh hintin, eiho dia “migenthei  van-gam alutsangin, heubil-homa sangongsao lut abaijoi” ti hijoding ahi.

Pathen le Jesu umdan, hidan, thudol hetthem Theologian le adang mi phabep aumnauve. Hiche ho chu asei le mihil athem nauve. Hinla, hiche ho lah a jong chu ‘tonsot-hinna’ changlou tampi umthei ahiuve. Achutiloule, Pakai Jesu’n, “Pathen lekhabu hoa chu tonsot hinna neithei din nagel’un nasim jiuvin, hiche ho chun Kei thudol ahettohsah-u ahibouve. Nahinna diuvin kakoma nahung nompouve.” (Joh 5:39-40 )atiding ham?

Pathen le Jesu umdan, hidan, thudol hetthemna aumin;  Pathen le Jesu het kiti hi achom ahi.

Pathen le Jesu umdan, hidan, thudol hetthem in bou ‘tonsot-hinna’ hitale, lekha simtheilou, Bible simtheilou ho, Pathen thu le umdol jong hethemou hon iti ‘tonsot-hinna’ aneithei diu ham? Hichu ahipoi. Ipu-ipateu, Christian ana hiho chun Bible jong simtheipouve. Hinla, Pathen ahet danu le atahsannau chu eiho phah maimai jat ahipouve. Pathen-ni (Thokitnia) hampa khat sitan jong chu Pathen deilou dia agelu ahi. Itobangin lou gamla boljongleu, Thokitnia houin kailou chu Pathen lunglhai louna le tohga jong phatea mulou dia ana gelu ahi.

‘Pathen le Jesu het’ tia Pakai Jesu’n asei hi, mundanga aseina in, “Kichentah-a kaseipeh nahi, koi hileh twi le Lhagaova peng lou chu Pathen lenggam alut theipoi.”( Joh 3:5)

“ Ajeh chu Pathenin hi banga hi vannoi angailut ahin, Koi hijongle atahsan chan chu mangthah louva tonsot hinna anei theina din a-Chapa chang khat chu apetai.Ijeh-inem itile vannoi themmosah ding hilouvin, Ama jeh a vannoi huhhinga aumtheina dia Pathen Chapa chu vannoiya ahinsol ahbouve.
Ama tahsanna chu themmo chang louva, atahsan lou vang chu Pathen Chapa chang khat min a tahsan loujeh a themmo kichansah ahitai. .”( Joh 3:16-18)

“Ahin amina tahsana Ama kisan chengse chu Pathen chate hitheina thu apetai.” (John 1:12)
Pathen in ahe le anei tahbeh hidin napanpi tahen.

SATAN HI ANOPNOP IN UMJONGLE PATHEN IN ANOP TENG ATHUA ANUNSAHTHEI AHI

Leiset hinkho ineilai sunguvin, hahsatna itoh jing theiyuve. Ajehchu, vannoiya vaihoma hi Agiloupa, Satan ahi. (John 12:31). 

LHAGAOVA KHANTOUNA DIN TAHSANNA BULPHUNA LE KIHILNA DIHTAH NEI ANGAIYE

“Chuti ahijeh chun Christa thu bul kipatna lam chu dalhau hitin, pilhinna ding lamjoh del’u hite; natoh thisa hoa kona lunghei ding bul phut kit louvin, Pathen tahsan thupou, batize thua kihilna pou, thenso-khut ngap ham, thinaa kona thokit thu ham, chule tonsot’a dia thutan thupou velsei daute. Hiche jong chu Pathenin pha asah le ibol diu ahinai. ‘  (Hebrews 6:1-3)

Hebrew jihpa hin, Jesu Christa thuhil ama nungjuiho bolding dol hiche ahin aseikhai. Hin, hiche ho juisahon, hiche hochu achaisau ahitah-le, pilhinna le gasona lam adeldiu dol asei ahi.

NUNNOPNA TAHBEH

Mi-giloute thumop sang-lou, chonse-te umchan jomlou, Pathen taitomnom-te joplou chu, mi nun-nom tah ahin;

Pakai Danthu-nit akipapi jo’n, Danthu chu sun le jan’in asim jing’e.

Hitobang-mi hi luipanga thingphung-keh, aphatcha hung gatheiya, ana’n goptih neitalou tobang ahi’n, atoh lamjousea alolhing theiye.

PATHEN PHATTHEI BOHNA MASAPEN

Pathen in mihem chu Ama lim in asemin (Genesis 1:27).

Ama lima asem jal in, Aman van le leiset pumpi chung vai ahop banga, Ama thalhenga thilsem dang ho chunga vaihom dia asem ahi.(Genesis 1:26)

Pathen in mihem asem chun, numei le pasal asemin, achenkhomsah tai(Genesis 1:27). Hichun, phatthei aboh in “Ga-phan, pungun; leiset lodimin nathun nunsah un. Tuinoiya nga, vanlaijola vacha le a leiset chunga op a kithol ganhing jouse chunga vai homun” ati (Genesis 1:28)

Pathen in, numei le pasal kichen hichea hi aphudoh ahitai. Ama gon chu ‘Pasal khat le Numei khat’ kichenga, cha tampi ahindiu, leiset alodimuva, ganhing ho le leiset jeng jong athu’va anunsah ding hi ahi.

Hetna pha Neinadin Bible Pumpi Simin

Lekhabu ijat kijih hen, kiso jongle, Bible khella ding aumpoi. Chihna le themjilna ijat um jongle, Bible a kihilna khellha ding aumpon, um jong umponte.Bible bou hi chihna le hetna jouse mudohtheina ahi.  Ajeh chu, Bible hi Pathen thu (Matthew 24:35) ahi. Abu semtahbeh chu Lhagao Theng ahi(2 Peter 1:21).

Bible Simtei Angaina

Bible hi Pathen Thu-hing ahi. Pathen hi Lei le Van, chule asunga um Sempa ahi. Pathen Acha hidia nasem ahi. Chonset chu vannoiya hunglut a, Pathen-to eikhen’u ahi. Pathen-to kikhen jeh in, leiset hinkho ahin hahsatna tampi i-toh jinguve. Chonset in eikhen jongleur, Pathen in eingailu jinguve.  

LUNGHEINA DIHTAH IN HINNA ASODOH E

Christa thupha miho naseipeh nomle, Baptist John le Pakai Jesu bangin kipanin.

Mathew 3:2 ahin, iti Baptist John le Pakai Jesu chun Kipana Thupha ana lhangsap pat’u ham ti akisun e.Amanin, “Lung heiyun, Pathen Lenggam anaitai” (Matthew 3:2) ti hilin akipan lhonin ahi.

“Lunghei” kiti hi English in “Repent” akiti. Hichu, “lung geldan khel” tina keumai ahipoi. “Dinmun khel doh”, umna mun chon, nunlui dihlou paidoh a nunthah apha a kheldoh” atina ahi.

“Repent” hi konkhat in “kisih” ati. Hinla, keima mudolin “kisih” hi English a “Regret” kiti joh hi ahi.  Bible in “Regret” atipoi. “Repent” atijoh ahi.

Kipa le Monna Pakaiya Konin Kisanin

Hinkho nom le lolhinga mantheina din kipana le lungmonna angaiye. Hichu, mijouse ngaichat ahi. Mitam tah in haona, nei le gou, sum le pai, chihna le themna, hoina le minthanna’a mudin ahol’un amujoupouve. Konkhat in, khamnathei le kichepna chomchom a mudin jong abolun, amudeh pouve. Chomkhat kipana chu, ajona lamle, kana le lungnatnan aneikit jitauve. Ipi bolin, neiyin, ipi hijong lechun kipana le lungmonna tahbeh muponate. Lamkhatseh bou aume. Hichu, Pathen tahsanna le Ama’a kingaina in bou aume.

Pathen Kimupi Jouse Hinkho akikhelji

Abraham in Pathen akimupi chun, i-macha ahilou akimuchet in, “Keima vang leiset le leivui maimai kahi” ati (Genesis 18:27) Ahinkho kikhel in, Pathen tahsahte jouse dia ‘Pa’ ahitai.

Moses  in Pathen akimupi chun, Pakai loupina amuchenin, akicha in, amai asel jenge.(Exodus 3:6)

Mose’n, mihem chonse le hatlou dia, Pathen mai mu ngam ahilou ahetai. Mulou ding amu jeh in, thichan-geiyin Pakai kin aboltai.

Pathen to Kimuto Kidanje

Themgao Isaiah in Pakai chu amu thu aseiye “ Leng Uzziah thikum [740 BC] chun Pakai kamui; laltouna sangtah in atouvin, alengponsil chun Hou-in chu alosoh hel’e.  Achunga chun seraphim adingun; lhaving gup cheh aneuiyuve. Alha ni cheh in amai akhun, ni cheh in akeng akhun, chule lhaving ni in aleng e. Khat in adang khat akouvin: “Atheng, atheng, atheng , Pakai Hatchungnungpen hi Atheng ahi; vannoi pumpi hi aloupinan alosoh e” tin aseiyuve.  Hitia, akihou nau ogin hin Houin bulpi khom jouse akithingsoh-in. Houin sung chu meikhu akijel let lut jenge. (Isaiah 6:1-4)