VANGSETNA HOHI PHATTHEIBOH CHANNA JONG AHIJI

Satan in Pathen thilgon suhmo agojinge. Jesu apena pat in Satan akicholdo thei tapoi. Jesun atha chimit ding kichan, suhmo ago jinge. Jesun Pa thu anit lhomkei jing jeh in Satan in alonaje ahepoi. Pathen Chapa ahina sonsah a le mankhelsah a CROSS lhunsahlou atup jinge. Hinla, Jesu ajou thei jipoi. Hijehchun, Jesu ajotahou jongle, athijouva Pathen Lenggam Jesun atundoh chu aumjomlouna din aseijuite le anungjuite suhmo ago jinge.

Jesu seijui lah a challangpen Peter jong amngcha go jinge. Hichu Jesun amu jinge. Peter sunga Satan alutgot jong amun, Peter aseipeh in :

“Simon, Simon, ven Satanin changsi kijap mang banga jap mang din nathum’uvin, Keiman natahsan lhahdah louna din katao-peh jinge. Nahung kile kit teng nasopite tilkhouva napan ding ahi,” ati. Peterin ajah a, “Pakai, nang to songkul lut ding hihen thi ding hijongle kigosa kahi,” ati. Jesun, “Kaseipeh nahi Peter, nangman neihet hi thumvei neiseilep masanga tunia ah khong lou ding ahi,” ati.( Luk 22:31-34)

Jesu Christa hi ‘Songpi’ ahi. Songpi dettah banga Satan in alonaje, asuhlong joulou ahi. Simon jong chu tahsanna dettah nei le hakattah a Jesu juiya le dinpi jing, Jesu jong ‘Pathen hing jing Chapa, Christa ahi’ hea phongdohpa ahi. Hijehchun, Jesu’n, Ama banjep (anoidot) tia hetna din Simon chi minthah asah in “SONGNEO’ tina in ‘PETER’ asahtai.

Chutia, Jesu sontah ahi jeh chun, Satan in Peter jong ajuipanin, lhep chatvai le manchah ding atup tai. Hichu, Jesun ahet jeh in peter ahiltai. Hinla, Peter jong, ahetlou kah in Satan in amangcha manin, Jesun ‘Satan ajona ding’ CROSS chu lhunsahlou din amangchai.

Jesu man dia, Thempu le mipi ahungu chun, Peter sunga Satan apansan, Peter in mikhat bilkol asat tai. Hichu, Jesu mansah louding, CROSS lhunsag louding tina ahi. Hinla, Jesun amun, mihem mudin Peter jah a (adih tah in Jesun Peter apho hilouvin, Peter mangcha Satan chu apho ahi) “Ngan, bolbe dan” (Luke 22:51) atin, aphoh thip tai.

Hinla, Satan in Peter chu khatvei din ajou thouthouve. Jesun asei bangin, Jesu mat a auma, bolgentheiya aumpet in ‘thumvei aseilep tai’. Pakaiyin alungset in akhoto lheh jengin, agahvet-le Peter chu akhangdoh tai. Peter akisih behseh jeng in akap tai. (Luke 22: 57-62)

Lungset aum nalomlom jenge, Peter chu.

Hinla, Peter chu kisongtah khat ahina aume. Akitep loiloi jengjia anahi. ‘Chuti ponte, chute pone’ tia pangsaji anahi. Hichu, Pathen dei ahipoi. Tongpha hen, chonpha lheh jongleuhen, kisonglouva Pathen bou sonding Pathen dei ahi.

Peter chu kisumo hih-le, kisong jingding anahi. Hitia chu aumle, Pathen panpina a kingailouva ama kisong jinga, Christa lhacha dia ngansei tahtah hitheilou ding ahi. Thumvei jen, a Pakaipa aseilep a, a Pakaipa’n ahinvet tah vang chun, Peter anakisona jouse chu vutvaiya kinoi manghel abang tai. Achonset akisih in akap tai. Pathen panpi louva mihem hi ima ahilou ahedoh tai. Itobanga tahsan det nei kiti hen, kisong jongle, Pathen tha-hatnan eipanpi loule lhepna a lhujingthei, achonse jingthei ahi chu Peter in akihetchet mong mong jengtai. Hitia, achonset kisih, lunghei le kap puma Pathen koma akiphon le ngaidam athum thu hi mipi ( asimjouse) hetdoh dia Peter in aphondoh ahi. Aphondoh lou hile, kon agamu monga, kon ahet a, iti  Luke hin asutdoh thei ding ham.

Pathenthua kisun chu, “nangman kamsunga Jesu chu Pakai tia naphondoh a chule Pathenin thinaa kona Ama akaithou chu nalungthima natahsan le nasochat ding ahi.”( Rom 10:9)

“Eihon ichonsetna jouseu iphondoh vangule, ichonsetna jouse ngaidam ding le then louna jousea kona eisutheng diuva, ama chu tahsan umtah le dihtah ahi.
Eiho chonse louva ikiseiyule, ama chu ijoubol’-uva, athu eiho sunga umlou ahi.” (John 15:9-10) ti ahi.

Peter in athuseina a aseidoh, aphondoh jeh anungjuipa Luke hin ahinsutdoh a Bible a uma, eihon isimdoh theiyu bou ahi.

Eiho lah a Hou-lamkai, Pastor, Evangelist, Houbung Upa, Pathen thusei hohin asuhkhelnau i-phondohji nah uvem? Naphondoh loule, huhhingna chang jong lechun, nathuseia konin miten Pathen Lhagao phattheibohna chang joupouvinte. Solchah Peter le Solchah Paul in akisuhmonau, athemmonau, achonsetnau nasatah a aphondoh jiu ahi, athuseina houva.

Kipana thupha lekhabu Li (Matthew,Mark, Luke le John) lah a ni (Mark le Luke) hi Jesu seijui hilougel Peter le Paul nungjui John Mark le Luke sut ahi. Amani hin Peter le Paul in mipi lah a Pathen thu aseinauva kona Gospel Mark le Luke hi asut lhon ahi. Peter in akisuhmona ( tuichunga lamjot kisuhmo, Jesu aseilep, Jesu thia anungchonna Jesu’n akimupia ‘Dilthuh lama lensep in’ atina ho le adang akisuhmona le asuhkhel ho hi milah a aphondohji ahi.

Solchah Paul in Stephen kitha pha asahpina avel velin aaseidoh in, tahsante bolgenthei ahi le Damasca koma Pakai Jesun vah a akholhuh thu hohi avelvelin aphongdoh in ahi.

Kei jong kachatvaina, ka phatmona luiho kaphondoh sehle Pakaiyin athu hetbena le kipana eipehbeji. Kachunga Pakai natohloupi hohi kaphondoh-le mipi lah a Christa ka phondohna hidia Pakaiyin eipeh ahi. Pathen thu hihen adang thu hijongle midang ho seisa tampi umsa ahi. Kei chunga Pathen natoh kasei hi kei ‘original’, koiman aseitheilou Pathen thu kaseina pansaisatna le Pakai loupina kachunga kilang kaseidoh dia Pathen lungdei ahi kahei. Houbung lamkaihon jong, “eima testimony kisei hi aloupipen le angeipen ahi” eitipeh un chibai eibol teijiuve.

Upa khat in vangset toh a, Guwahati kijena acheu, ahunglhunin ka ina ahungin, “vangsetna kato hohi kagel in, ka lung chu lha mong mong ahitai. Ka lungel hungset  laitah chun, nathusei chu kalungsunga ahung kiseiye…………..” atin,

Ken “Ipi chu hitai?” katile,

“’Pathen tahsan’ chu ‘Pathen a kingai’ ‘Pathen nganse’ tina ahi’ natia nangma umdan nasei ho chu kalungsunga ahung kilangtai. Hichun, ‘eisanga chapang in bon hitia aseitheiya Pathen a akngaitheile, kei Houbung Upa khat kihija’ tin ijakai Pathen kangansen, jingjin-lungkham kadondatai. Hichun, lungmonna kahin naitai. Chule, kidang tah in, eipanpi ding mi ahunghung jengtai.Kahung damin, kanao jong ahung damtai. Min ei panpi nau chu kagop le lakh khat val hinte. Tunvang Pathen tahsan nati hi kahechentai. Nang mua seikal ngahlel kahi” ati.

Hichu keima tilkhouna a asei ahi kahen kakipah lheh jenge. Lamkaiya Pathen in atun ho vang hin chihna aneiteiyuve. Eitilkhou aum jingin, kakipah in ahi.

‘Vangsetna’ tia igel-hou tamtah hi ‘vangphatna lamkai’ ahinomji. Phun loiloi le lungnatloiloi louding ahi.

Numei nao neikon chu anatsah’u hi nasa ahi. Hinla, nao ahinei tengle, ama hihen naocha mujouse kipanan akidimjitai. Anao jal chun, anatsahna jouse asumiljitai.

Anat pet chun, athoh-olna kipe-le tha-sanglouvin umthipbeh intin nao hungdoh thei tapontin, atdohtho ngaiding ahitai.

Dammona anatoh hihleng, ka Pakai Jesu Christa’n eilhatdohna hi kana hetthemlou maithei ahi. Ka dammo chu Pathen phattheibohna eihinpohpeh a anahijoi.

Peter kisumo hih-le, Christa’n a Houbung tundohna a aman theilou maithei ahi.

Solchah Paul ana kisumo hih-le, Pakai O ajah jing, athilsebol ageldoh jingna ( asunjinga ‘Ling’)a  anei, hichun Pakai kin abolloule themmo akisah jinga, damhen dammo jongle Pakai kin abol teiteina ahin, hichu, ama dia ‘hamphatna’ ahi. ( ‘Ling’ tia Paul in asei hi theologian tamtah in ‘dysentry’, ahiloule, vah in akhoa kona amit-hatlou’ thu aseihinte” atiuve.).

Christa jala ka sopi, nang jong,vangsetnaa nati ham, hahsatna, kisuhmona, jum le jachat nato ham hochu Pakai Jesu kounan neiyin. Chutile, Pathen phattheibohna nahin pohpeh a pang jengding ahi.

Pathen in panpi jingtan.

(Kavelsim manpoi. Suhkhel aumle, asimdan them maiyute. Kavelsim teng, suhdih le semphat be hinte. L.K.Hengna 2/4/2015)