LONGLOU LENGGAM KISANIN

“Nangho vang Zion molvum, Pathen hingjing khopi, Van Jerusalem, Vantil asang lah hung lhunga, kipah thanom le van’a kisun lutsa apeng masa chengse kikhopna, mijouse thutan Pathen kom, them changsa ho Lhagao suhchamkimna mun, Jesu palaina a kisemdoh Kitepna Thah a chu hung nahitauvin, hiche thisan kithekhumna chun Abel thisan sangin thilphajo cheh sei ding aneiye.

Chingtheiyun, thuseipa chu jopda khauvinate; ajehchu, leiset’a thuseipa thujoplou ho bon ahoidoh jouloule, van’a kona thuseipaa konin kiheimang leuhen ihoidoh louhel diu akichen jenge. Hichea ogin chun leiset seh bou aholingsoh ahin, tuna man athutep in aseiye, “Keiman leiset keoseh hilouva Van geiya khatvei she a kiholingsah a ka holing ding ahi,” ati. Hikoma, “Khatvei she,” kiti hin thilsem jouse ki holing sah a kitolmang ding kichen tah in aseiyin, hitia chu suh ling theilou chengse chu umden ding ahi.

Hiche jeh chun suh linghoi hilou Lenggam ikisan jeh-un thangvahna neiyu hitin, ginna le jabolna pumin alungdei lamtah-in Pathen lhachan pangu hite. Ijeh-inem itile i-Pathenu chu mi kavam hel thei meikou tobang ahi. (Hebrew 12:22-24)

Jesu Christa tahsana kisan jouse hi Pathen chate (John 1:12), Hingjing Pathen chenna mite ihitauve.  Jesu hi Kitepna Thah Palai ahin, Ama tahsante jouse hi Christa’n atundoh ‘Longlou Lenggam’ mite lah a simtha ihitauve.  Juda me hihen Gentile mi hijongle, Christa tahsan jouse chu Pathen Lenggam mite ihitauve.

Hijehachu, leiset a thuseipa Mose thu bon Israel miten ajopda tengule hahsaatna le thina anato jengjiule, tua thuseipa, Jesu Christa thusei ngaisahlou vang chu tonsot damuna umding ahitai (John 3:18). Atahsan jouse vang themchanga tonsot-hinna chu change ihitauve (John 3;17)

Mose “ogin chun leiset bou aholing soh ahin ...”, Athisan’a Kitepna Thah Lenggam phutdohpa Jesu Christa vang hin vangam geiya aholing ding ahi. “thilsem jouse (akiholing jeh-a) kitolmang ding” ahi. Hinla suhling theilou ‘Longlou Lenggam’ chengse vang chu umden ding ahi. Hichu,  Christa thuneina le vaihomna, Alalna gamsung chu ahi.

            Pathen Lenggam chu Jesu hunga pat a kipan ahitai. Ama tahsante lungsung jong ahina umin, tahsante kiloikhomna Houbung jong hi ahinai. Hinla, hiche ‘Lenggam chu apilhinsetna phat chu Jesu hungkittengle hiding hinte. Chutengle, hiche Lenggama chu thudih le chamna, thenna le kitahna, ngailutna, hepina le ngaidamna, kichamna le kithahsemna min lhingset hiding ahitai.

Hinla, tua jong tahsante lungsunga le ahinkho Mandan hoa hitobang hohi kilangdoh ngaiya ahi. Houbung kivaihpna le tahsante lah, kivaihopna hoa ‘Longlou Lenggam’ umdan chu akilahdoh ngaiya ahi. Mihem tha-hatnan hichu jouponte. Hijeh achu, Jesu’n eiteppeh’u, Kithopi Lhagao Theng panpina chu ngaicha jing ihiuve. Tao jinga, kithopina chu thum jing ding ahi.

Hichena ding chun, Bible sim jingin. Mithengte kiloikhomna dia Pakaiyin atundoh Houbung mite lah ahin, lhajingin. Houkhom, tohkhom le lhatkhomna in pang jingin. Nitinin Bible simin, tao jing jeng in.

Ijemtia,hiche, ‘Longlou Lenggam’ mi chu nahi loulai jeng khah-le, tuhin Jesu kouvin, kisanin.

Pathen in panpi jingtan.