CHRISTA HINKHOMPIA KHANTOU JINGDING

Jesu Christa chu Leng le Huhhingpua nakisantengle, Pathen insungmi, Pathen cha nahitai. Pathen chu “Pa, Hepa” tia nakouthei ahitan, Pathen cha hi’na hinkho chu mangin. Chule, minu-mipa phatah in achate phat amankhompi nomji bangin Pathen in nangma to phat mankhom anomji. Hitia, nakivopkhom lhonna chu Bible sim le tao hi ahi. Hijehchun, Pathen chuto kivop khomna in nitin in Bible sim le taona phat achombeh in mangjin. 

Nitinin, nahinna chu Pathen lhandoh jingin, Ama to bang ding le na Leng banga akin boldia kigosadem hijingin. “Lungthim pumpin, mihem kin bang hilouvin, Pakai kin bolbangin, alhacha kin chu bolin, ajehchu; natohpha tong jouse hi, soh hihen jalen hijongle, Pakaiyin kipaman apeh ding ahi.”(Ephesians 6:7,8).

Pathen in phatthei naboh henlang lolhinna, kipana, hinna le damna nape jing tahen. Hiche nading chun, athu Bible hi taoto thon sim jingin, chule tao jing jengin.Pathen in : “Hiche Danthu hi nakama konin chonmang sah dan; sun le jan in geljing jengin, chutile hichea kijih jouse hi chingtheiya najui thei ding ahi. Chutile, na tehchana, nalolhin ding ahi.” — Joshua 1:8

Hichea “nakama konin chonmang sah dan” atihi, “na paodoh, na seijouse chu Pathen thu – to kitoh, a pansa hihen” tina ahi. Jesu chu lheppatep a aum chun Pathen thu kijet mangchan alhempa ajouve. Eihon jong hitia chu iboldiu ahi. Pathen thua jona, lolhinna, hinna, kipana aume.

“geljing jengin” ati kit e. Jesu’n “Lungsunga um chu kamin aphongdoh e” ati chule mihem nun le khan chonna jouse hi alunga umchun ahin pohdoh ahi. Pathen thu chu sun le jana i-gel jingle chonchatvai, hinkho thenglou chu umdoh louhel ding ahi. Ajehchu, Pathen thu hi ‘jona, hinna, lolhinna, kipana’ ahi.

“Chutile, na tehchana, nalolhin ding ahi.”

Na lolhin, kipa, hin, jona chang nom nahija, Pathen thu nit le geljing, mangjing nahinomle Pathen koma phondohnan ‘Amen’ jih in. Pathen in napanpi din Jesu Christa le A Lhagao Theng in na umpi jing tahen.

Thumun, kipeding nahiuve. Hol’un, namu diu ahi. Kiuvun, kihonpeh ding nahiuve. Ajehchu, athumchanin akisanin, ahol jousen akimun, chule, kotkiu jongse akihonpeh’e” ati. (Matthew 7:7-8)

I-Pakaiyu Jesu Christa chun,“Koihile Ka thupeh chinga, nit chan chu, ama chu ei ngailua ahi. Eingailua chu ka Pan angailut ahin, chule, keiman jong ama ka ngailut a, akoma kaki lah ding ahi.”(John 14:21) tin aseiye.

Aman eiteppeh’u Ama Lhagao Theng panpina louvin, Jesu Christa thupeh hi koiman anit joupoi. Hijechun, “Thumun, kipeding nahiuve,holun, namu dingu ahi, keuvun, kihonpeh ding nahiuve. Nang ho miphalouvinbon nachateu thilpha pehje nahet’ule, Vanna um napauvin, athumte chu iti apha chu apeh louding ham?”(Matthew 7:7-11)ati ahi.

Mihem jouse hi hatmo ihicheh’uve. Ahatpen, achingpen, athempen in jong akithopi ding angaichai. Pathen thudol deh in vang, Pathen Lhagao Theng kithopi louvin koiman Pathen aneitheipon, Athu jong nitthei ahipoi. Hijeh achu, Pathen koma thumdia, i-Pakaiyu Jesu Christan asei, ‘thilpha’ ati chu, eiteppeh’u Lhagao Theng hi ahi. Lhagao Theng hi, kithopi phapen ahin, akithopina i-chan tengule, i-ngaichat jouseu eipeh diu ahitai.

Pathen in na panpi jing tan.