Pathen thusei hohi nakipa, lolhinna le damtheina ding
ahi.
Mitamtah in Pathen thu le Pathen deiya chon hi
hahsa ding le mihem kipana lam hilou din agelji. Keima hinkhoa kamudolin vang,
Pathen in achate kipana ding agel val jenge. Kipahtah a iumdiu anome. Chule,
ithanopna hou le idei hou jong hi ichandiu adeiye. Hinla, eiho dinga pha mong ahiloulevang
eideipeh deh pouve. Ajehchu, hatmo le hetna lhinglou ihijeh un i-gut’u le thanopna
tampi hi iboljoutengule, aphalou le thilphachomlou ahi hedoh in, kisih in,
kipahloutah in iumkit jiuve. Hitia, kipana kimansah a lungnomlou tah a ium
jiuhi Pakaiyin eilungset un, akitteng jongle ichonnahouva iumkit diu einoppehji
tapouve. Hitia, kipana phachomlou kisih kitna dingbep hoa konin jong eituhnom
jiuve. Hiche hi kahet’a pat in, thilkhat kaboldingle –
“Pakai, hiche thil hi bolding kagongin, kadinga
phalou ahijengle neisumo jengin. Ajehchu, alhinglel, hetna lhinglel kahi,
kadinga pha jong hesohlou, aphalou jong hechen monglou kahi nahenai. Tua hi
bolding kahitai. Kadinga phalou le nangma deilou ahikhahle neituh in, Ka Leng
le Huhhingpu, ijakaiya ka ijakai nahin, kadinga pha nahenai, tia ei ka Pakai
Jesu namina tao kahi, Amen” katiji.
Hitichun, kathilgon alolhinlou, kathilbol kabolmo
tengle kadinga phalou ahijeh a Pakaiyin eituhtang ahi kahejitai. Chuteng,
kakipana asangchehji. Hijeh achu, Pakaiyin, a lhachapa aseidohsah a aseihi
kangaisang cheh cheh jenge, simute –
“Gollhang chu iti adih le athenga chonthei ding
ham? Nangma thu dungjuiya hithei ding ahi……Nangma douna a kachonkhel louna din
kalungsunga Na thu hohi kasel e.”(Psalm 119:9, 11){hiche Bible chang thudol kaseina
munchoma anasimin}
Hijehchun, na ngailupen, nasempa le nadinga pha
napenom jingpa hi tahsanna lhingset neiyin. Athu Bible’a kisun hohi nitinin
simin, nalunga vop jingin. Hinkho namanna a nathilto dan hoa jong napuijang
theidin ching jingin. Chule, tao jing jengin. Chutile, Pathen in Lhagao Theng a
naumpia, dinmun chomchoma na umkom jongle, athu ho geldohsah inantin, nalampi
nahilding ahi. Pathen thusei ho banga nachontengle, nangma dia phapen lama napuiding
ahi.
Pathen in panpi jing tan.
No comments:
Post a Comment