KHANTOUNA MANO JINGIN

Christa-to hinkhomna ahi khantouna mano jing ding ahi. Naosen hi velechun :  ahung khantou pet–le thanom tah a niseh-le lamjot, pao le adang dang tanglou hela ahung kichuhji. Alhuh jongle, lumdenlouvin, athoukit in, alamjot chu abolkitkit jengji. Hiche banga chu Lhagaov hinkhothah a jong hi thanomtah a khantouna mano jing ding, thanomtah a Bible sim jinga tao jing jeng ding ahi. Chule, eima sanga hatjo le khangtoujo ho doh a kihilsah ding, Houbung mite lah a phatecha lhat jingding ahi.

Tukhangin, Internet hoa Pathen thu simjoulou aumtai. Mobile le Computer hoa jong sim jing ding ahi.

Bible hi i-simtengle Pathen in Bible akona hi eiho koma thu aseiji ahi. Taopumin simin, chutile, hetthemna napeh ding, nadinga pha le nabolding, nachondan ding apha chu nahetsah ding ahi. Chule, eihon taona ahi Ama koma thu iseiyu ahi. Taovin, nangaichat ho thumin. Chutile, nadinga pha ho napeh ding ahi.

Nathum jouse napeh din gel hih in. Mihem in eima dia apha ihe joujai pouve. Tupet a eima dia pha dia igel jiu tamtah hohi khonunga dia aphalou atamjoji. Hitobang hochu, Pakaiyin eipeji pouve. Angailut hochu adiuva pha bou apeji. Hinla, nahetchetlou hijongle, nangaichat hochu akoma thum poupouvin, nadia pha ahile napeh teiding ahi.

 Hitia nabol jingtengle, Amato na kijopmatna pha chehcheh ding, Aphatthei bohna nachan dan namuchet chehcheh ding, nakipana khangtou jing ding ahi. Chule, taona le Bible sim aphatchom dan nahetsahbe jing ding ahi.

Noiya Bible chang hohi lungchinin he-in -

Jesun ajah-uva, “Kei hi hinna changlhah kahin, kaheng hinjon jouse gilkel lou ding, chule Keima eitahsan chu dang chah kit lou hel ding ahi.” (John 6:35)

“Kathupeh chengse neiya nit’a chun eingailut ahin, eingailua chu ka-Pa ngailut’a chenga Kenjong ama ka-ngailut’a ahenga kakiphondoh ding ahi,” ati.” (John 14:21)
“ Pan keima mina ahinsol got Kithopi lhagao Theng chun kaseipeh chengseu hi aboncha nageldoh kitna diuva ijakai nahilsoh kei dingu ahinai” (John 14:26).
Jesun ajah-uva aseikit’in, “Keima vannoi salvah kahin, kanung juiya chun muthima lam’ajot lou ding, hinna khovah anei idng ahi,” ati.(;John 8:12);

Keima kot chu kahi; Keiya hung lut chu huhhinga uma, lut le pot lea neh thei hamhing akimu ding ahi.
( John 10:9);

Jesun ajah a, “Keima thokit na le hinna kahin, keima eitahsana chu thijongle hing ding ahi;
Joh 11:26 chule mihing eitahsan chan a-itih a thilou hel ding ahitai; hiche hi natahsan em?” ati.(John 11:25-26 )

Nang ho khat le khat naki-ngailutto na diuva thupeh thah kapeh nahiuve, khat le khat naki-ngailutto chehna diuva Keiman nang ho kangailut nahiuve. Khat le khat naki-ngailutto cheh-u leh kaseijui nahiu mi jousen ahet ding ahi,” ati.(John 13:34-35)

Tugeiyin kaminin ima nathum hih laiyui; nakipanau achamkimsohna din thumun namu diu ahi.”(John 16:24)

Nang hon neilhenu ahipon, nacheuva napunbe na diu leh, apungdoh chengse alhou theiya kamin’a nathum chan’u Pan napeh theina diuva keiman kalhen’a kapansah nahibouvui.” (John 15:16)

Christa tahsanna lama nakhantou chana na lung kipah a nahinkho lungmonga tahsa le lhagaova nakhangtou jingding ahi. Chule na taona lolhinna ding jong na photchet chehcheh ding ahi.

Pathen in panpi jing tan.