NACHONSET ASOPTHENG TAI CHONSE KIT DATAN

Vannoi mihem jouse chonse ahin, Jesu bou chonset neilou ahi. Michonsete lhatdohna dinga chu ‘bohbehlou’ ngaiya ahin, Jesu chu bohbehlou ahitai. Aman, ‘chonset beihel’ hinkho aman jouvin, vannoi mihemte (nang le kei) chonset le suhkhel jouse ( ahinsukhel ding ho gei) jouse amachunga kilah in thingpela apodoh tai.

Aman chonset neilou ahi chu Pilate hihen vaihom dang ho jouse le achungthu tandia adinna jousen jong asuhkhel amudoh pouve. Hinla, Pathen thilgon ahin, Jesu chun ama chamtah a mite chonset akipoh ahi jeh chun chonsen (nang le kei chule mijouse) chonset po in Thingpel (Cross) in khet beh in aumtai.

Pathen thua kisun bangin, Amanla chonset neilou chu iti sapsetna chang ding ham? Sapsetna changlou ‘Thingpel’(Cross) a kikhenbeh ngai am?

“Danthua kisun chu, “Thinga kikhaisang tapou chu gaosap chang ahi,” kiti ahijeh in, Christa chu eiho jal’in gaosap achangin, Danthu gaosapna akonin eihung lhatdam tauve.” (Galati 3:13)

Mite chonset apoh ahi chu kicheh mong mong ahi. Thingpel in akikhenbeh tai.

“Chonset helouhelpa chu, Ama hinkhoa Pathen dihna ichantheina diuvin eiho khel’in, Pathenin chonse’n asimtai.”(2 Corinth 5:21)

“Aman eiho chonset jouse atahsaphe’n apo’n, thingpel chung geiyin apodoh in, chonsetna jousea ithiuva, themchanna a ihintheina diuvin aboltan, Ama kijepna maha’n eidamsah tauve.” (1 Peter 2:24)

“Chapa (Jesu) jal’a eiho’n hinna ineitheina diuva Pathennin A-chapa changkhatseh vannoiya ahinsol, hichea hi eiho sunga Pathen ngailutna chu kiphongdoh ahitai.” (1 John 4:9)

            “Ajehchu chonset jeh a nanghodia Christa’n hesoh-genthei khatvei thoh a athoh a,midihlouho dinga midih chun athoh a, nang ho Pathen kom nalhut theina diu abol ahin,tahsaphea thia Lhagaova hing ahitai.” (1Peter 3:18)

           Tunin, kigelin. Nachonset apohsa ahitai. Chonset chu athisana athoiya asoptheng ahitai.

Hijehchun, Pathen thangvah jingin. Chule, Christa-t hinkhomna hinkho, chonset ajona hinkho chu mang jingin, chonset nung sunin, Pathen lungdei hinkho mang jingin.

Jesu chu tahsanna nakisan ahinahnahle, Aman athia chu nachonset asoptheng ahitai. Hinla, nitin setna hon nabom jinge ti jong hen. Hiche setna ho jong hi najopeh dia, ‘Chonset-thahatna’ najopehpa Jesu Christa chu kou jingin, taonan. Nangma hatna maiya setna le lhepna ho najolou ding, Pathen lungdei hinkho naman joulou ding chu kihet jingin, tao jing jengin. Lhagao Theng a napanpi jing din Jesu kou jingin. Chule, Ama lungdei nahet a, nakoma thu asei jing nadin Bible simin gunchu jingin, niseh in sim jingin.

Lhepnan najoa, setna nalhu, sukhel naneikhah-le, gangtah in kisih in, taonan nachonset Akoma phongin, ngaidam thum loiyin. Khongaisot hih in, suhkhel naneile, guhthim taona, koima jah ngailou hijongle, taovin, na Pakai Jesu Christa koma lhut loiyin, na ngaidam din ngeh in. Chule, Aman naumpia, chonsetna nalhuh kitlouna dia na hongbit jing le chonset le lhepna najopeh jinga Alungdei hinkho namansah din ngeh in. Na tahsa le na lhagao hinkho apumpin akhut a pedoh kit in, Aman nahinkho Ama deilama napuidin lhandoh kit in. Chutile, nangaidama napanpi ding, Lhagao Theng a naupia nachin jing ding ahi.

Pathen in panpi jingtan.