TAO DAN PHA

Pathen in phatthei naboh jing nadin Athu simin, Akoma tao jingin. Pathen koma hin nadei deiyin natao theiye. Hinla, taodan pha chu : Amasa penin, lei le van chule asunga umjouse Sem le Chingtup ahina chunga jong nangma mimalgei jong nakhohsah a nachintup le panpi jing jalin Aminthangvah in. Chule, chonse nahija, amin koudinga jong lomlou nahina’akona, Jesu Christa Cross chunga nangma lhatdohna a ahungthi jala Pathen cha hitheina napeh a “Hepa” tia nakouthei tah jalin kipathu seiyin. Thiljouse jong hi nangma phatnadia abol ahijal le nangma phatna dia ijakai boldia akitep jalin jong kipathu lhut in.

Abanin, nabolkhel, nasei le nagel khel ho nakisih thu akoma lhut in, ngaidam thuminlang, Acha nahitah jalin Ama khut a kipethengin – natahsa, nalhagao, hitheina naneijouse, thil napeh jouse, natohna le nathilgon chule na masang jouse jong Ama khut a koiyin; nachunga vaihoma, Ama lungdei hinkho namansahna din Akhut a ngamin, alungdei hinkho mangthei dia Lhagao Thenga nakaihoi jing din ngeh in. Pathen hi nachonset ngaidam nom le ngaidam thei ahi (1 John 1:9) ti hejingin.

Chubanin, na insungmi le midang ho din taovin – na loi le gol chule naheng-nakoma ngaichatna neiho tahsa le lhagao dingin taovin.

Pakaiyin, kahinkho, kanun-kakhan eikhelpeh tilchun, keidin bou kataoji. Midangdia taodin lhing kakisapoi. Nikhat  Solchah Paul in, ama thuhila kona Christa tahsante koma “nei taopeh un” tia asei kasimdoh phat in “eima sanga hat hodinga jong taothei ahi” tin kageltai. Hichun, midang dia kataole – akidange! Katao ahung nomin, ahung tui cheh cheh in, kalung anomin, akipah in, katiho akilhamin, kalungsung chu kipanan adim dom dom jengtai!

Golte, ipu-ipateuvin “I-gol paipeh a kiheng chu eima paipeh a heng akihi” tia aseiyu chu tahsa thu keu hilouvin Lhagao thua jong ahi kamu chen tai. Midang dia itao le i-toh chan in eima ahin kipana, hanta le lolhinna le machalna aume. Midang dia pan i-lah tokahse vang tui kitingden bang bep akihin, khantouna aumtheipoi.

Amavang, nangman huhhingna nachan tokahsen nang din bou taovin. Nangma a Lhagao Theng aum masangsea, midang dia panna bei nahina laiye ti kihet inlang, amasan nangma huhhinga na uma, Lhagao Theng chu nachanna din genngaitah in tao tao jengin. Nachantengle nangma ding le midang din taovin.

Achaina in, na thum jouse chu Pathen in ama phatsah banga asandin pedoh in, chutengle “hichengse chu ka Leng le Huhhingpu ka Pakai Jesu Christa minin kataove, Amen” tin jouvin.

Na het jing ding chu – itihphat – hoilaimun hijongle, Pakai koma nataothei jinge- na jingtho, nalupkon, naneh le don, natohlai, valepet, lamjotpum, neh le donpum in jong nato jing theiye. Minsinlouva jong gari tolpet, milah a umpet le natoh-thilbol puma jong tao jing thei ahi. Hinla, nikhat sunga hin, agunset a Pathen-to kihouna a taogun phat jong, achombeh in neijingjin. Ajehchu, mipa phatah in angailutah achateto phat amankhompi nomji bangin, Pathen in nangto phat mankhom ding anomjin, chule nato le nachunga lhung jouse ahetnomji’e. Amato phat mankhomna’n, Bible simin, taona phat, achombeh injong mangjin.

Pathen in umpi jing tan.