CHRISTIAN DIHTAH HIDAN

Christian dihtah chu Jesu Christa ‘huhhingna chang’, ‘Jesus Christ a hinna nei’ le kitah tah a anungjui ho hi ahiuve. Hitobang miho chu ‘Pathen in ahet’ Christian ahiuve. Mitamtah in anu le apa Christian ahimana ama jong Christian hijeng in agele. Hichu ahipoi. Christian insungmi,Houbungmi le thilpha bol manna Christian dihtah hithei ahipoi. Houbung lamkai le Houbung miten hisah in, henauvinate. Hinla, Pathen het nahilou ding ahi.

Pathen in mihem hi chamlhatna neiya asem ahi. Hijeh achu, Ama tobanga hetna le deilhen theina apeh ahi. Hinla, mihem in hiche ‘hitheina’ anei hi amangkhel in, Asempa lungdei bol sangin, adeilou aboljitai. Hitia chu, Asempa Pathen deilou bol chu ‘chonset’ ahi. Mihem in alunggel-ngaitona, alungdei, agut, adoi le tup, achonna, aneh le don, akhosat dan jousea hi Pathen deiloulam tamjo ahi.

Hinna bulpi, thil ijakai mihem dia apha jouse chu Asempa thaneina a um bou ahi. Pathen hito akichamkit loule ‘hinna’ le ‘phattheibohna’ tahbeh chu mihem in akimuthei ahitapoi. Alungput akhela, anun-akhan le ahinkho mandan akhela Pathen abel tengle bou Pathen in apanpi tahtahji ahi. Alungkhel chu ‘kama aphondoh ding’ achonna aphondoh ding ngaiya ahi.

          Bible aseiye “Nangman nakama ‘Jesu chu Pakai ahi’ na phondoh a, chule, nalungthima Ama chu Pathen in mithilah akonin akaithouve, ti natahsanle na sochat ding ahi.” (Romans 10:9).

          Christian dihtah hitheina dia –

1.Pathen tah khatseh le ahinsol Jesu Christa natahsanding, chule Jesu Christa hi na huhhingpu ahi ti natahsan ding, na hinkhoa vaihom dia Pakai dia nakisan ding;

2. Chonse nahi nakihet’a, na chonset ngaidam nathum ding,

3. Jesu Christa chu taona’a nakouva na chonset ngaidam ding le na hinkhoa vaihom dia natem ding;

4. Nahinkho chu Jesu Christa napehdoh ding, na Pakai, nahinkhoa vaihom ahi chu  na phondoh ding, chule, Pathenin Ama chu athilah a konin akai thouve’ ti nalung’a natahsan ding ahi.

Noiya bang hin taovin -

           “Pakai, chonsea kijil, chonsea peng, chonsea hinkho mang ka hi. Tu’n, nakom kahin jone. Nei ngaidamin, chonse kahi. Nangma ka Leng le Huhhingpu nahi. Ka hinkho apumin nang kapei. Nanga hinnopna chu neipen. Ka Leng le ka Huhhingpu Pakai Jesu Christa minin, Amen.”

Hiche hohi nabolle, ‘ apengthah’ ‘Huhhingna nei’ ‘ Christian dihtah’ nahi ahitai. Christa-to hinkhomna hinkho chu mang panin. Ama tahsan jingin. Nangma dia aphalama napuijing ding hejingin, Pathen lungdei hinkho mangin. Niseh in Bible simin. Tao jing jengin.

Pathen in panpi jingtan.