LEISET HAHSATNA KHELIN CHRISTA A KIPANA HINKHO MANGIN

Leiset hi mitamtah dia natna, genthei le hahsatna, lhepna le boina umjing, lung olna umlou a hi. Hitobang tohte tamtah hon, kitha jengding gel le goloi tampi aumji. Pathen hehon vang, Pathen akouvun, Pathena olna, kipa le nopna akimu jitai. Hichu, adihtah bol ahiji.

Hitia, Ama belte chu Pathen in alhamonin, kipana le monnakim ateppeh in aseiye,

“Lhepna thoh ham hampa chu anun nom ahi; ajehchu, lhepna athoh chaiteng-le, Pathen in ama ngailute pehdia atepsa ‘hinna’ lallukhuh chu akisanding ahi.” (James/Jacob 1:12)

Chule, konkhat in, Pathen koma nopna muna ding chu, thi-nung, leiset hinkho kichaiya din bou agel’uve. Ajehchu, ‘Pathen Lenggam (Van-gam)’ chu thi-nunga din bou agel’un ahi.

Hinla, atahbeh a seidin, hiche Pathen-to chenkhomna nopna hinkho hi leiset chunga jong kipan ahitai. Pakai-to chenkhom hinkho hi kipana tahbeh hinkho ahitai. Christa Huhhingna chana Lhagao theng-to chenkhomna hinkho hi ‘Van kipana’ neipatna ahitai. Mihem mudin natna, hahsatna umjongle, hiche hochun, asunohphah thei tapoi. Pathen in hiche ho chun, angailut achate chu asuhnohphah phah diu aphalpoi. Hinla, atokhah jengu jongle, hiche hochun, Pathen a akipanau le nopna aneiyu chu asumo theiji tapoi. Penthah jouva Christa-to hinkhomna hinkho hi Leiset a Van-gam’ manpatna ahin, tahsa thinung tengle, nopna lhingset chu Christa-to tonsot a i-mankhom diu ahi.

Hinla, hiche ‘nopna’ hinkho chu leiset hinlai sunga mangtheilou ho vang, ahinkho kitpau jong sei ahahsai. Thikona kisan ahi ngallou-le sei ahahsai. Aphapen vang chu, LA bolpan “Tun agimnamtu chu katep khatai, O anomna dinge” atibanga, Christa tahsana, Ama huhhingna change, Christa-to hinkhomna hinkho leiset a mangpan hovang akichehsa ahitai. Hichu, Christiante jousen tup cheh ding ahi. Hichu, Pakai Jesu’n

“Lhagaova chimtih neilou ho anunnom’ui, Vana Lenggam chu amahoa ahi” (Matthew 5:3) ati hi.

Hiche hinkho chu ahi “JESU CHRISTA A HINNOPNA” (A BLESSED LIFE IN JESUS) tia kaseijing hi.

Pakai Jesu’n, “Vana Lenggam chu amahoa DING ahi” atipoi. Ahiding, ahung hiding, ahiloulai, thinunga ding aseina ahipoi. Ahijingsa a asei ahi Vana Lenggam chu amahoa ahi” (Matthew 5:3) atijeh ahi.

Hiche nopna chu, tua pat a mangpan theidin, Jesu Christa hi kouvin, Ama khut a nahinna, nadamna le nap hat masang jouse jong koiyin. Aman napanpi ding ahi.

Christa-to hinkhomna namanna in nitinin Bible sim jingin, tao jing jengin.

Pathen in napanpi jing tahen.