Mijouse din Prime Minister, ahiloule Minister ho hi houngam
behseh hilou, jakaitah ahi. Acha neocha vang chun, mijose japa chu anop-le
akipomsah in, anopnop alo theiye. Ajehchu, ‘Apa’ ahin, ama ‘acha’ ahi. Chule,
apan angailut akihet in ahi.
Achapa kivoppi, agolte jong chu, achapan angailut jehchun,
apa jong chun athet theipon, ngailutna tah aneiteiye. Chule, achapan, agolte
dia apa koma athumpeh chu, apa chu ada tahtah theipoi. Hiteho chu alungset
mankeu hilouvin, achapan athumpeh jal chun, achapa lunglhaina ding beh in,
abolpeh ji’e.
Pathen thengtah le kidihtah mudia mihem aphapen jong hi
kidah-um le thet-umtah ahi. Tohkhel aneilou jongle alungsunga phatmona dimset –
khat vetdana, thangthipna, lunghan, lhaset, kineplelna, jonlungput, haosatnom,
thuneinom, nasat nomna, le adang dimset ahi. Mijouse lunggem hesoh Pathen dia
thet-um tah ihicheh’uve. Hinla, Achapa ngailuttah Jesu Christa eiho Pathen in eingaidamna
diuva hungthi jenga, athia athokit jouva jong eitaopeh jing jengu ahi.
Achapa angailut behseh jeh a, Pathen in, Achapa Jesu Christa
kisana jui ho chu ipi suhkhel nei jengta jongleu angaidamji ahi. Chule, Achapa
chu ngaidam ichanna diu mai hilouva, Ama tahsan jouse Pathen chate ahitheina
diuva (John 1:12) hungthia ahi. Hijehachu, itobang chonset nei jong lechun,
Achapa Jesu Christa hi kisan lechun Pathen cha nahiding, phattheina kemlou
nachan ding ahi.
Hiche hi ahetthemval jeh a, Angailut John in eiseipeh’uva :
“Kachate, nachonset louna diu-vin hicheng hi nahenguva
ka-hinsun’e. Ahin khattou chonse jeng tajongle, Pa henga eisei cham-peh diu,
dih tah Jesu Christa inei nauve.” ( 1John 2:1)
Atahsante dia, Jesu Christa hi ‘Ukil, Advocate’ ahi.
Ichonset jeh’uva themmo ichanna diu, Pathen thutanna ‘Court’ ahi, ‘Ukil’ von le
‘qualification’ lhingset neiya, Christa hi eiho khela dinga, i-chungthu’u (
case) hi eiseihu’va “Hepa, Ama ho themmo jeh a kahinna kapeh ahitai. Kei eisan’u
ahitai. Kathina chu ama ho thina ahitai. Lungset in, asuhkhelnau ngaidamin,
nacha din kisanin. Na phattheina lhingset chu penlang, Lhagao Theng chinsah in.
Chutile, Lhagao Theng in nangma lungdei hinkho amanpi ding ahi”tia eitaopeh
jing jengu ahi.
Chule, Achapa taona chu Pathen in asanteitei jeng ahi.
Ajehchu,
“ (Christa) Ama chu eiho chonset jouse thoina ahi, eiho
chang jenga jong hilouva vannoi pumpi ding jong ahi.” ( 1John 2:2)
Nang vang, na kisan tah ding kakinem e. Ijentia, na kisan
lolai-le, tuhin, taovin, Jesu chu kouvin, kisanin.
Pathen in panpi jingtan.
No comments:
Post a Comment