CHRISTA HOUBUNG BOU HUHHINGA UMDING AHI

‘Houbung’ atam’e. Hinla, ‘Christa phudoh Houbung’ nahikhah loule ‘Huhhing’ nahilou ding ahi. Ajehchu, I-Pakaiyu Jesu Christa’n kicheh tah in aseiye.

“Hiche Song chunga hi KA HOUBUNG kasha doh ding, hichu mithi kul kotpin jong anan joulou ding ahi.”(Matthew 16:18)

Hiche-a “mithi kul kotpi” atihi English in ‘gate of hell’ ati’n, hichu 'thina' le ‘manthahna’ kiseina ahi. Christa Houbung chu ‘manthahna in ima alotheilou ding ahi’ tina ahi.

Pakai Jesu chu, atahsante khel in athi in, lhana vuiyin aum nai. Hinla, Pathen in agonbang in, thina le manthahna, monmangtheina tha-hat chun Christa chu ahen joupoi!. Thinan ahen joupoi.Lhan kotkhah in anang joupoi. Loupi tah in athoukit tai. Bible in aseiye :

“ Ama hikoma aumtapoi, Aman aseisa bangin athoudoh tai.” (Matthew 28:6)
“ ‘Ama thinaa konin athoudoh-in, Galilee gama nang ho sangin ache masatai” (Matthew 28:7; Luke 24:6)

Vahchoina La’n isauve :

“Thinan ahen joupoi, Lhandampu Jesu,

Lhan sin song phujalta, Pakai Jesu.

Lhana konin athou tai.

Atha-hat in agalte jouvin,

Thina muthim gam jouvin ahung thoutai;

Tonsot loupe Laltouna a dingin,

Athou tai,Athou tai, Halleluiyah athou tai.” (HBL 92)

Anungjui jouse jong, Christa banga chonset tha-hatna thina le manthahna in ahenjoulou ding, thina lhan kotkhah in jong anan joulou ding ahi.

le angSeidan chomjep’a seidin “Christa Houbung chu, chonset le thina, manthahna tha-hatnan imacha alotheilou ding ahi ti kiseina ahi. Tahsa thijongle, Christa Houbung hijouse vang chu thout ding, thina le manthahna in ima alothei lou ding, lhan kotkhah in anan joulou diu, loupe tah a Chrsita’n akaithou kit ding ahiuve.

Seidan chomjep in kiseile, “Christa Houbung chu Christa galjona chang, chonset thina akona thoudoh kit ho chu ahiuve.” Ama ho chun chonset le thina’ gal chu ajou ahipoi. Christa’n ajopeh ho ahiuve. Hiche ‘jona’ chu tahsan jala chang ahiuve. Chonset a thia, chonphatna a hing ho ahiuve. Chonset hinkho dalhah a Christa a hinkhothah neiho ahiuve. Huhhingna chang, Lhagaova Pengthah ho ahiuve. Ama hochu ‘Pathen Chate’ akitiuve (John 1:12)

Christa’n chonset thina akona akaithouva ‘Huhhingna Lhagao’ apeh jouse chu ‘Christa Houbung’ a um ahiuve.  Thokitna tha-hatna changlou hovang ‘Christa Houbung’ ahipouve.

“Christa Houbung” hi mutheilouva kiloikhomna jong ahi. Eihon leiset a kiloikhomna ‘Houbung’ achomcheh ineiyu hi kiseina ahipoi. Hiche ho jousea um ho lah-ahin, Christa Houbung dihtah umintin, ahilou jong tampi uminte.

Christa Houbung chu Jesu’n Peter koma Matthew 16:16-18 sunga asei bangin, Pentecost nin Peter chu amangcha tai (Acts 2). Jesu mat’a aumpet a soh-numeinu kicha a kilep-lelepa, pasal meidoi Peter chu, Pentecost nia Pathen in Lhagao Theng ahinsola solchah ho chunga alhunsah phat in, Peter chu mipi lah achun adingdoh in thu aseitai. Jesu matsah mipi dimset ho jah achun, “Jesu thokitna le huhhingna thu’ chu kichalouhel in aseitai. Pathen in, Lhagao Theng in, mitin lungsunga na atongin, miho lung chu “hema kisun abang jengtai”. Hichun, mipi hochun, Jesu athou chu akisih’un, “Ipi kabol diu hitam?”(Acts 2:37) tin adong taove. Hichun, Peter in, “ Nachonset lung heiyunlang, khatcheh in nachonset ngaidamna dingin Jesu Christa minin baptize chang cheh-uvin, chuteng Lhagao Theng Pathen thilpeh hi nachan diu ahi;” (Acts 2:38) ati. Hiche nikho chun, ‘Christa Houbung’ chu mihem sangthum jenin apunbe taove.

Mihem ihi nahlai jeh’un, Christa tahsan ihicheh vangun, chondan, deidan le geldan chomjepjep ineiyui. Hijeh chun, kiloikhomna chomchom ineiyuve. Roman Catholic, Presbytery, Christian Church, Baptist, chule adang dang. Ipi penin um jongle chun ‘Christa Houbung’ hitei din, Jesu belin na Leng le Huhhingpu, na Pakai le na Pathen in kisan in, nei jing jengin.

Hijeh achu, eima khosunga umlou, khol le tol mun hijongle, tahsa dola minchom jep a kiloikhomna Houbung hijongle, eima panna Houbung um hih jongle, Christa tahsante kiloikhomna ahipoule, pan jeng ding ahi. Christa’n kiloikhomna jong hi, Ama mina tohkhomna ding le pankhomna dia eidei peh’u ahi. Christa a natahsan le nakipana hihen na hahsat le gentheina hijongle atahsan hochu chankhompin. Hichu, tahsante dia tahsa le lhagaova khantouna ahin, Pathen Lenggam machalna dia pan lahkhomna ahi.

Ahithei chanin, na chena Hou-ina chun, tolom toh in, themcha hijongle. Na chekit kit ding le aum sot thim ding nahitheile, namin jih in lang tolom toh in; chutile, Houbunga chu namin um paiding ahitai. Hichu, nangma dia phatah ahi. Houbung miten nahetna diu, nakiphondohna ahin, Christa naphondohna jong ahi.

Achaina in, ‘Christa Houbung’ hiho chu ‘Chonset dalha a Lhagaova hinna nei ahiuve. Christa’n chonset le thina ajobanga, atahsante ajopeh ho chu ‘Christa Houbung’ ‘Christa kouchom’, vannoi chonsetna a umte hoa kona akoudoh, alhatdoh a achoma aminvo ‘Pathen chate’ tia akoi khen hochu ahiuve. Hiteho kiloikhomna jong chu ‘Houbung’ akitinai. Hinla, kiloikhomna chu ipi sah jonglechun ‘kiloikhomnan hinna aneipoi’. Chule, itobang min nasa sah jonglechun, hiche kiloikhomna houbung chu ‘Thina le manthah nan ajolou ding’ nati theipoi. A um ho jamcheh tale bei jengthei ahi. Kiloikhomna chu ‘hinna, lhagao/ nei ahipoi.

‘Christa Houbung’ vang chu ‘Hinna nei, Lhagao nei’ ahi, Christa’n, “KA HOUBUNG katun doh ding, hichu mithi kul kotpin jong anan joulou ding ahi.”(Matthew 16:18) ati hi mihem ahi, nang le kei ihiuve. Ama banga thina le manthahnan ajojoulouva loupe tah a akaithou ding chu ihiuve.

Roman Cathalic, Baptist, Presbetery, Evangilical, le adang ho chu thoukit thei ahipoi. Van-gama chun hitobang Houbung chu umtaponte. ‘Christa Houbung’ vang tonsot a Christa-to vai homkhom ding ahi.

Hoilai, ipi kiloikhomna houbung in um jong-lechun, ‘Christa Houbung’ dihtah hitei din Pathen in napanpi jing tan.