Min Angailut Ho Kipa Ding Nabolji

Gollhang in nungah khat angailuttengle, nungahnu lungdei chu aholin, iti kakipasah dem tin, aneilou kisamvai jong aholpeh ji. Ipihile, nungahnu sei chu bol jengding anomji.Mipa, minu jong chun, angailut achate ding chun, atheisun abolin, nilhum lhumin akisalelji.

Jesu’n, “Nei ngailut’ule, Ka thupeh nanit diu ahi” ati (John 14:15)

Jesu hi na ngailut hinam? Athupeh nanit hinam? Nanu, napa, nadongma, naji, nacha nangailut banga Jesu nangailut hinam? Nangailut ho kipana ding nabol banga chu Jesu kipana ding nabol nah em?

Dihtah a seidia, i-Pakai-pa tah vang hi iji le cha sanga ngailut chungnung ding ahi.

Eihonla, Athupeh init pouve. Hichu, ingailut louvu tina ahi. Lungthim pumpia ngailut malah in, akehkhat in jong ingailupouve. Pathen sangin sum le nei-le-gou, chihna-thepna, haosatna le loupina, chule adang joh ingailu’vin; alam hile alam hilouva haoding, chih ding, thep ding itiuve. Tahsa damna hola Pathen koma tao sangin pathen dihlou houho - doibol, mitpheldoi, lhagaoboh hoa kona hetna le damsahna, khutjevet, horoscope, yoga hoa damna muding del jong atamtai. Hiche ho hi Pathen khatseh le Achapa Jesu Christa chouna ahi.

Hitia mihemhon Pathen a ngailut lou jeh un, Pathen thu’n, “Mijouse chonse ahitan, Pathen loupina changlel ahitaove” ati ahi. (Rome 3:23)

Pathen loupisah malah in, Pathen dihlou ho le Pathen thilsem ho joh ibel jouve.

Pathen thu’n aseikit in “Chonset bolga chu thina ahi” ati ahi (Rome 6:23)

Pathen thupeh initlou jeh’uva, athi teitei ding ihiuve. Tahsa thina keu hilouva lhagaova jong tonsot geiya thiding ihiu ahitai. Ajehchu, Pathen in aseisa, akitpsa ahitai. Kidihchamkim Pathen in aseisa chu umteitei jenga ahi. Akidihna jeh in, Pathen in chonset hi amoh donda theipoi. Chonset chu atha teitei ngaiya ahi. Mijouse chonse ahitan, mijouse thi teitei ding ahitai.

Mivangpha ihiuve. Kidihchamkim Pathen hi Ngailut Pathen jong ana hikhai. Ngailutna jalin eiho ihin kittheina diu agngtai. Kidihchamkim ahina a chonset athatei ngai ahijalin, Achapa Jesu chu eiho bang in mihem in apensah in, eiho chonset jouse apohsah in, eiho chonset chu Jesu’n athipitai. Hichu, atahsan hon hinna aneitheina ahi. (John 3:16-18) Atahsan jouse themmona a mangthah louva tonsot-hinna joh anei diu ahitai. Atahsanlou jouse vang tonsot a themmo change thidiu ahitai.

“Dan-thupeh in themmo eichansahnau, eisapsetnau hi Christa’n Ama chunga akiloikhuma eiho eilhatdoh’u ahitai” (Galatians 3:13).

Pathen kidihchamkimna jeh a ‘achonse jouse athi teitei ding’ banga, ‘atahsan jouse hingding’ atina jong hi akitepsa le aseisa ahi jala, Pathen kidihchamkimna chun ‘atahsan jouse chu atohphat vangule, achonphat vangu hilouva, atahsan jaluva ‘hinna’ anei diu ahitai.(Rome 3:22)

‘Chonset jeh a mi chu athi teitei ding banga, atahsan vang chun ‘hinna’ anei teitei jeng ding ahi’.

Loupina Pakai chang jing tahen.

Nitinin, Jesu Christa tahsan apungjingin, vannoi pumpia hin Christa nungjui ‘Christian’ hi atampen ahitai. Nitina pungjing ahi. Amahthah tam jongle, ahinbel tam jojing ahi.

Nangla ?

Pathen tah khatseh le Huhhingna natoh agon hi natahsana, Huhhingna kin tongpa Jesu Christa natahsana, na Huhhingpu le Pakai dia nakisan tah ding kakineme. Nabolloulai jengle, tuhin, taonan kouvin, kisanin. Chutile, tu hinkho jenga jong Pathen phattheibohna nachan ding, tonsot geiya nachan ding ahi.

Pathen in panpi jing tan.