LAIGUI TANA CHU SATAN AHI

Numei gai-hamset chu nao-nei dia anat tengle nupi kikhomuva naodom dia kigojiuva ahi. Nao dom ding ho kigotna chu tijat umtah ahi. Ahungsoso-le chemhema at-pai jeng dia kigo ahiuve. Achem’u chu ‘bahche’ ham ‘blade’ ham ahin, ahema hem jeng ahi. Naocha ahungdohdoh-le atuh tim’uva a-at jeng jiu ahi. 

Naosen ahungpen lhah lhah in dou-le-gal atohpai jeng in, agalte chun maha aputsah pai jengjiuve. Agalte chu anu umpijing le ajena pang Naodom ho chu ahiuve. Amaho chun, anu-to akijopmatna ‘Laigui’, a ‘hinna-gui’ chu ahungpen pen in at-tanpeh jeng’ule, naosen chu akicha behseh jin kap in pengjengji. Hitia chu, leiset hi gal-le-tol, kinah-le-kidouna, gim le gentheina gam, nat le thina mun ahi chu naosen chun apetpet in ahin hepaijeng ta’n, kichatnan adim jengji.

Leiset a vah le hui amu akichat nakah in, melma atohpai tai. Ama mel amu’u chun adom ho akipah’un, naocha’n vang, adom hochu melma’n agel’e. Ajehchu, amahon anu-to akijopmatna atanpeh’un, maha aputsah’uve. Ama dia adom hochu ‘Satan’ ahiuve.

Ipidia, hitia mihem chonna, nao laitan chu mihem in naocha dia kichat-um a hem le thal a atan khoh ji ham? Gancha hokhula achamcham in atanin, achamchamin abit in maha ahiji poi. Mihem chonna tampi hi het-hahsa kasai. Ole, Pathen gonmong ham? Kitan hih-le aboina, tijat umna umding ham kahepoi. Mihem hi Pathen sapset changsa ahijeh a, hitia chu tantei ngaiya Pathen in agon jong hithei ahi.

Ipidia mihem hi Pathen in ana sapsetsa ham ihecheh’uve. Athu nit-lou jeh ahi.

Theology giltah a kisei dungjuiya seidin, ‘Pathen thu nitloujeh’ mai ahipoi. ‘Pathen tetna, Pathen tobang hinom jeh ahi’.

Pathen hi Ama she bou Pathen dihtah ahi. Ama bou tonsot mi ahi. Thiljouse sema ama ahin, Amato bah ding tupna chu Pathen chouna lenpen, chonset lenpen ahi.

Leng jousen athet pen’u le agal pipen’u chu Ama kheldoh ding tup jouse chu ahi. Hitobang mi chu, lengpan athadoh tei ahi.

Pathen to-bah ding tup chu Pathen kheldoh a, ama Pathen hiding tupna ahi. Hijeh achu, Mihem in Pathen to bahding atup’a, Pathen in ‘bollou dia aseipeh’ chu abol jeng mai hilouva, abol jong chu ‘Pathen to bah ding tupna abol’ ahijeh achu, Pathen in apetpet a mihem teni chu athadoh ahitai. Atha doh a, along damsa chu Eden pamlam a apaidoh ahitai.

Hinla, Pathen hi Ngailut ahi (1 John 1:8) jalin, asemsa mihem teni chu alungset behseh jalin, atahsa lhon vang athat poi. Ama lhagao ana khumpeh chubou alahdoh peh in ahi. Pathen hi ‘hinna’ hungkonna ahi’n, Aman a ‘hinna-hu’ mihem nah homa akhumpeh achu Adam in Pathen hinna lhagao chu anei ahi. Thu anit-louva, Pathen achou phat in hiche Pathen hinna chu lahdoh peh ahitai. Pathen in amatobang hitalou chu aumkhompi thei tapoi. Akoma konin apaidoh tai. Hichu, ‘Pathen hinna’ ‘lhagao hinna’ akona mihem chu thi-a ahitai. Hitia, mihem ahung kisem joujou, Pathen in asem jouva Eden hona akoi (leiset a ahungum) joujouva maha putsah a, lemsah a, nat thohsah a chu ‘Satan’ ahi. Naosen hungpeng maha putsah a jong hi ‘Satan’ ahi. Satan in alamdoh, lhagao thina, mihemte Pathen sapset chansah jeh a mihem chonna le hinkho hi hatsat, genthei, natna le thina umdoh a ahi.

Mihem hi asempa, hinna pepa Pathen to akijopmatna suhkhenpeh’ a chu Satan ahi. Hia chu, asempa to Lhagaova kijopmatna ‘Lhagaova hinna-gui’ suhtan pehpa hi tahsa a anu-to akijopmatna ‘hinna-gui’ ‘laigui’ tanpehpa mama, Satan hi ahi. Satan in mihem analhemlha hih-le hitobang chondanna le hahsatna, gentheina, natna le thina hi umlou ding ahi.

Leiset, Eden hon pam hi, Satan thaneina mun ahi. Eden hona chun, Satan chun ama lim pule Eve chun ana kichat a, athusei jong angai louding ahi. Hijehchun, Adam le Eve in avetching diuva pathen in akoipeh’u ganhing (kivah’uva ‘pet’ banga aneiyu) ho lah a khat, ‘Gul’ lima chu gachea ahi. Hijeh chun, ‘Gul’ in apinu ajoulhep ding chu Eve in agelphalou jeh a athusei chu atahsan khah ahitai. ‘Gul’ (Satan) chun, Eve lungsunga chun ‘loupi nomna’ chu akhumpeh in, ‘se le pha hetna thingga’ chu aneh lhonle Pathen tobang ahidiu jeh’a, Pathen in aneh diu ajahdapeh ahi’ in aseipeh tai!. Hichun, Eve chun ‘Pathen banga loupiding’ nopna jalin, thingga chu alouvin, anetai. Chule, ajipa Adam jong chu anehsah tai! Hichu, Pathen lunghanna ahitai. Pathen alunghang in, Adam le Eve chu akoma pat in akaidoh tai. Pathen-to kikhen chu thina ahitai. Hinna pepa to kikhen chu ‘hinna’ to kikhen ‘thina’ ahitai.

Naocha jong anu-to khena chu Satan ahi. Satan chu ama limin aumpoi. Naodom le jen-le, akhohsah ho lima chu uma ahi. Eve chun Satan chu ‘gul’ limin amu’e. Naocha’n vang, mihem hija akhohsah, ajel-le, adom ho chu ‘Satan’ mel in amu’n, akicha behseh jengin ahi. Hijongle, hitobang galmite hochu achenkhompi ding, akijoppi ding chu ahitai!

Hiche, achenna ding gam, leiset chu amua, ahinkho man ding chu akichat jeh a, naosen jouse hi apen lhah lhah le kapteiya ahi.

Naodom ho chu ‘Satan’ hija kasei ahipoi. Naosen chun anu-to akijopmatna atanpeh jeh’uva, ama dia ‘Satan’ tobang ahiuve. Chujongle, hitobang hahsatna ho semdoh achu ‘Satan’ ahi’n, naosen chu Pathen hi’na nei ahijeh a, adih le atahbeh chu amuthei ahi.

Genesis bung 1-3 sunga houlim ihiuve. Hiche sunga hin ‘laigui’ kisutna muponate. Tekahna banga iman’u ahijoi.

Athu hethema, aloupina dia hinkho mangthei din Pathen in napanpi jing tahen. (Abanjom umding. Hiche hi ‘HINNA GUI’ tia kajihna akona kila ahi. )