CHRISTA PHUDOH JOUSE CHU PANGKHOM DIA APHUDOH AHI

 Christa’n aphudoh Houbung chu mimal tina aphudoh ahi. Hinla, mimal hochu pangkhom le hingkhom dia atundoh ahi. Mimala Christian hinkho man ding ahipoi. Mimal khat cheh chu kiloikhomna ‘Houbung’ a pan cheh teiding ahi. Hiche Houbung hi Pathen in aloupi kiphonna dia atundoh chu ahi. Ajeh chu, mihem khat keuvin Pathen Lenggam kehletna din ipipen atongdoh joupoi. Hijeh achu, Solchah Paul in hiche kiloikhomna houbung chu aseikhohten ahi. Paul in tahsa pumpia tibah chomcheh aum banga hi mimal hochu Houbung a chu tibah khatcheh tobang hija asei ahi. Tibah jouse chu apankhom tengle tipum chu alhingset ahi banga mimal chomcheh chu apankhom tengle kiloikhomna Houbung, i-Pakaiyu Jesu Christa’n adei chu hung umdoh a ahi.

‘Mimal thua kasei lona hi kiloikhomna Houbung ahin, kivaipohna,pankhom le tohkhomna hi iha kisahlelpi kah’uhin mimal tampi hi donbehseh louva umthei ahi.Achuti khah-le kiloikhomna Houbung jong hatthei dehponte. ‘Houbung Hing’ umna dia atibah cheh chu Christa’n aphudoh (‘Christa Houbung’) dihtah hicheh ngai ahi. Hitia, kiphutdoh hochu, ‘tibah dam, tibah hing, Lhagao Theng chenna, ahing le adamsel, natong  theitah tibah hunghija ahi.

Hitobang miho chu ahi ‘Christa Houbung theng khatseh’ a pangtheidia Christa a kiphutdoh, Solchah hole Themgaoho bulphuna a kiphutdoh, Christa Amatah inningkhompia apanna miho chu.(Ephesians 2:19-20)Hitobang mimal hochu ahi : Christan akou “ (Rome 1:6.);

Mimal cheh chu lhagaova hing le dam ahicheh tengle, kiloikhom Houbung chu ‘hatthei ding ahitai. Hiche kiloikhomna houbung chu ahi ‘Pathen Lenggam’ kehlena pang ding chu.

Hitobang mimal hochu ahi Christan hinna apeh hochu (John v. 21.) ;

Hitobang mimal hochu ahi Pathen Lenggam dia natong dia Christan Athisana ichonsetnau asoptheng ahi. (Revelation 1:5);

Hitobang mimal hochu ahi Christan ‘lungmonna tahbeh’ apeh hochu (John 14:27.)

Hitobang miho chu ahi Christa’n chonset lungheina le dalhahna apeh hochu (Acts 5:31)

Hitobang mimal hochu ahi Christa’n Pathen Chate hina apeh hochu (John 1:12)

Hitobang mimal hoa Christa Amatah pansa a na atoh a, chule “Kei kahin banga, nang ho jong nahindiu ahi” ati (John 14: 19.)

Pa lungdei chu “Christa a ijakai bulhingset ahiding hi ahi.” (Coloss. i. 19.)

Christa Houbung phutdoh achu ‘Christa ahi, chule, ahitei ngaiya ahi (Matthew 16:18) Mihem ama le ama ki-hisah achu ‘Christa a’ ahipoi. Ama le ama kilhembep ahi.

Christa’n aphudoh hochu ‘hinna’, ‘Lhagao’ apeh a, achaina geiya apuiding ahi. Chule, hitobang mimal cheh chu ‘Ama a hinna jouse umkhomna dia atundoh ‘Houbung Theng khatseh’ achu apankhomsah ahi.

Hiche ‘Christa Houbung Theng Khatseh’ a pang hochu mihem lahlut hilou, ama chamchama lut hilouva Christa’n alahlut ahi. Bible in aseidan jong ven ‘Pakaiyin alahlut, agomtha in’ akisuncheh e.(Acts 2:47)

 ‘Christa Houbung Theng Khatseh’ kiti tahbeh a pantheina dinga chu, apang loulai hochun, chonset lung aheiya,chonset dalhah a Jesu mina baptize chang diu ahi. (Acts 2:38) Mundanga aseina achun, Pathen thu chu min ajah a, atahsan tah-le - Pa, Chapa le Lhagao Theng mina baptize chang ding ahi (Matthew 28:19)

Seidan le boldan chom chom umnante. Ipi kisei jongle, eiho boldih, seidih le natoh chule chonphat vang hilouva, lungset man a Pathen in eipeh’u bou ahi. Bible seidan ahipoule jui jengin. Ken kaseidan chomjep hen, adang khat in aseidan chomjep jongle Bible sei kisei ahile juijeng ding ahi. Bible seilou kisei vang juilouding ahi. Tekahna a kisei aumtheiyin, bolteidiing le juidia kisei Bible in aseilouvang bolda ding ahijenge.

Pel theilou chu Pathen tah khatseh le ahinsol Jesu Christa tahsan vang ‘teitei’ ngaiya ahi. I-Pakaiyu Jesu Christan Pa koma ataonan aseiye, “Pathen tah khatseh nang le nahinsol Jesu Christa atahsan diu hi tonsot-hinna ahi”.(John 17:3) Chutengle, Christa chun “Pathen Cha” hitheina napeh ding ahi.” (John 1:12). Hitia, Pathen cha hina napeh chu ‘Christa Houbung mi nahina ahitai. Hichu, nangma bol hilou, koima dang bol jong hilou, Pakai Christa’n ngailutna jala nabolpeh bou ahi.

Athu hethema, nit’a le A Lenggam machalna a pan lathei din, Pathen napanpi tahen.