NAOCHA AHUNGPEN TENG IPIDIA KAP TEIYA HAM?

Naocha chu anu oisunga aumpet-le, anu umbangbanga uma ahi. Aman neh le don akineh le akidon ngailouva, alaiguiya hi anua kona neh le don chu asunga lutjing ahi. Hui le go athoh angaipoi. Vah jong muchomlou, anua kona amucheng chu chang maiya ahi.

Anu sunga kona ahungpen tengle, vah ahinmutan kichat in akichan akap teiji e. Hui-yin ahinmut in, alupna achomtan, khut tahtah in ahintham kit e. Iti kichatda ding ham?

Akichan, akingin, akap in ahile, amulou git ( O kidang) ahinjakit in, amulou khut in athamin, pon hamlehluh in ahintongkhan, tui ahin tongkha kit in. Chubanin, anuto akijopmatna laigui chu thih-hemin ahin cheptan kit e. Iti lungdon le kichat louva umding ham? Ahin tham hochu kichat umtah gal kijet ahin tohpat ahitai!

Ahung penlhah in lungdon-tijat atoh panin, aban i-ati ding helouvin, galte lah achun ahung umtai. Ahinna-gui chetan ahitan, angailutpen, akingaina, ahinna anu-to khen ahitai. Iti anu’n ngailuhen, jen jong-le, galkanga ajen le avah ding bou ahitai. Anu’n athisan (noitui) in vah jongle galkanga kona amuhto asuhtoa, aman jong achep loule noitui chu asunga lutthei ahitapoi. Ajehchu, anuto tibah khat ahinau, akijopmatnau, neh le don ngailouva anua kona sunga lonlutna gui-hing ‘laigui’ chu, agalten, achetanu ahitai. Atan keu mai hilouvin, maha pua tanpeh ahitai.

Leiset gim umdan chu, naocha ahung choplhah-le hem le thal a lempai jeng, maha kiputsah paijeng ahi. Adang ipi kisei ding hitam? Amasang chu thimpi jing jenga ahi. Ana lop le kipapi hojong itobang ahiu helou. Anun jong iti ‘kangailui’ tijongle asunga aumpet le hinnagui akijoppina tansahta chu, akikhenpi ahitai. Ol ola ahin kikhenpia achanga alhaso ding chu kicheh mongmonga ahitai!

“He-nu, ipidia neikhen hitam? He-nu, kakicha e!” tia kapjia ahi.

Gangtah a anu noi chuto akisuhto tengle along hungmongdom jibou ahi. Chutengle, anun aumpi thou nah-lai chu akihet in, along amongdom jitai. Hinla, kicha jingthou ahi. Anu tilum chu atohkhah jing ngaiya ahi.

Mihem masapen jong chu Pathen-to aumpi sungin imacha boina atoh poi. Pathen in Eden hona akoiya adalhah phat in gal atoh tai. Gal jong chu achenkhompi, avetching jing ganhing khat, Gul limin ahung in mihempa lungdei lamtah chu ahungseitai.

Mihempa chun Pathen alhangai teiding tahsan aumin, hichu gelin Gul chun, “Hiche theiga hi nelechun Pathen tobang nahiding ahi” atitai.

Mihem dia Pathen tobang hiding chu thanop um chungnungpen ahi. Hijehchun, mihem chun ‘Pathen tobang hitheina’ chu nomin ‘theiga’ chu alan anetai. Hichu, mihem dia Pathen-to kikhenna ahitai. Pathen-to kikhen chu ‘hinna’ to kikhenna ahitai. Naocha le anu kijopmatna ‘hinnagui jouse –laigui’ mihon atanpeh banguva chu, mihempa chu Pathen-to akijopmatnau ‘hinnagui’ chu Gul chun atanpeh ahitai. (Genesis 1le 2 simin)

Naocha chun, anu-to kikhen chu nom hihhen lang, atansa ‘laigui’ chu jopmat kit gohen, iti kisahlelpi jongle abolthei ahipoi!

Ahunglet nungin, itobang chihna-thepna neihen, SUPER BIOLOGICAL SCIENTIST hijongle, anu-to akijopmatnau ‘laigui’ chu mihemin ajopmatthei ahitapoi.

PATHEN, Thiljouse aumlouva kona umsahpa, hatchungung Pathen in bou ajopmatthei ahi. Pathen dia ahimo aumpoi. Anop-le Pathen in abol jengthei cheh ahi.

Natahsan em?  

(aban jom umding. Hiche hi ‘HINNA GUI’ tia kajihna akona kila ahi.)