Pathen in Lungtheng a Ama Bel din Eikouvui

Nangman thilpha dia nagela tampi nabol chu Pathen lungdeilam lhinglou ahi. Chusangin, Ama dei hiding tup jon. Chutile, Aman tha-hatna napeh a nachama nabolsanga thilpha tampi nabolsah ding, kipaman napeh ding ahi.

“ Aman, “Kahenga kilhaina nabol chengseu hi kadeichat monga nabol’u ham? Gancha thaotah tah le kelngoi kilhaina nanei sanguva tamjo ken kaneiye. Bongchalte le kelngoite chule kelchate thisan jong kachimtai.Hiche hoa neihou diuva kon nahil’u ham? Kahouin theng chonthang bep dia koiham nakouvu?
Nathilto ho’u hi mohseh a nahinchoiyu ahi. Gimnamtui nalhut’u jong kajah nompoi. Lhathah kut le Choldo kut, houthua nakikhopna jouseu kadou joupoi; abonchan nachonset nauvin asubohsoh tai! Lhathah kut le nikho theng kut chengse jong kahoi; kathei chim behseh jengin pohgih danin kahei.

“Tao din neihin sangu jongle chun, iti taovin tao tangu navedeh pouving ting, nakhut’uva thisan kainel nul chu, natao nau sang ponge! Kisop thenguvin. Nathilse bol’u kamu hi ngauvin. Thilse bol ngauvin lang
thildih bolje kihil’un. Thudih umdohna ding gel’un, neh chintoa umte kithopiuvin, chagate chanlom chansah-un, meithaite pan piuvin,” ati.
Pakaiyin aseiyin, “Tun athu seichenu hite. Nachonsetnau thisan tobang ahin; hijongle buhbang bangin nasop bang unge. Nachonsetnau thisan dup bang jongleh, samul ponkang bangin bansah nau vinge.
Kathu nanit pou pouva, gamsung thilsoh aphalai cha cha naneh-u leh.
Kadoumah nabol vangu leh namanthah hel diu ahi. Kei Pakaiyin kasei ahitai,” ati. (Isaiah 1:11-20)

Pathen lungdei chu ipi ahi nahenai. Angailutpen, Achapa neisun Jesu Christa kisana anung jui hi ahi. Achapa-to nahinkhom tengle ijakai nabolpeh ding ahi. Na suhkhelna jouse jong Achapa gol le pai nahijala nangaidam ding, hatna napeh a nasuhkhel kit louna dia Lhagao Theng nachinsah ding ahitai.

Pathen lungtoh hija a phattheina chang din Pakai Jesu’n Lhagao Theng in na panpi jing tan.