KHANTOUNA MANO JINGIN

Christa-to hinkhomna ahi khantouna mano jing ding ahi. Naosen hi velechun :  ahung khantou pet–le thanom tah a niseh-le lamjot, pao le adang dang tanglou hela ahung kichuhji. Alhuh jongle, lumdenlouvin, athoukit in, alamjot chu abolkitkit jengji. Hiche banga chu Lhagaov hinkhothah a jong hi thanomtah a khantouna mano jing ding, thanomtah a Bible sim jinga tao jing jeng ding ahi. Chule, eima sanga hatjo le khangtoujo ho doh a kihilsah ding, Houbung mite lah a phatecha lhat jingding ahi.

Tukhangin, Internet hoa Pathen thu simjoulou aumtai. Mobile le Computer hoa jong sim jing ding ahi.

Bible hi i-simtengle Pathen in Bible akona hi eiho koma thu aseiji ahi. Taopumin simin, chutile, hetthemna napeh ding, nadinga pha le nabolding, nachondan ding apha chu nahetsah ding ahi. Chule, eihon taona ahi Ama koma thu iseiyu ahi. Taovin, nangaichat ho thumin. Chutile, nadinga pha ho napeh ding ahi.

Nathum jouse napeh din gel hih in. Mihem in eima dia apha ihe joujai pouve. Tupet a eima dia pha dia igel jiu tamtah hohi khonunga dia aphalou atamjoji. Hitobang hochu, Pakaiyin eipeji pouve. Angailut hochu adiuva pha bou apeji. Hinla, nahetchetlou hijongle, nangaichat hochu akoma thum poupouvin, nadia pha ahile napeh teiding ahi.

 Hitia nabol jingtengle, Amato na kijopmatna pha chehcheh ding, Aphatthei bohna nachan dan namuchet chehcheh ding, nakipana khangtou jing ding ahi. Chule, taona le Bible sim aphatchom dan nahetsahbe jing ding ahi.

Noiya Bible chang hohi lungchinin he-in -

APHAMO PEN JONG TAHSAN UMPEN ASOH JI

Michavai tampi Jesu kimupia pat tahsaanna sangtah nei le son-umtah asohji. Magdala khoa Mary jong chute anahi –

“Hapta ni-masapen ni, jingpia athodoh jouvin masanga asunga thilha sagi anodohna nu Magdalene Mary henga Jesu akilah masapen’e. Amanu achen Jesu kiloipisa, ahijeh a lunghema kapte ho agaseipeh-e. Amahon Jesu ahindoh a Mary akimusah ajah vangun atahsan pouve.”  ( Mark 9-11)

 Magdala khoa Mary chu lhagao-boh in ana suhchatvai ahi. Jesu’n lhagaoboh chu ana nodoh peh in ahile Mary chun Jesu le aseijuite ana juijingtai. Galilee in jong ana panpi (Mark 15:40-41). Jerusalem.geiyin jong ahung e. Jesu athijong chun Mary chun adalhapoi. (Mark 15:40). Joseph in alongdamsa hon sunga avui pet in jong Mary aum jinge (Mark 15:47). Along umna lhanmun jeng jong chu numei dang hoto aga vilkit e (Mark 16:1). Adang ho alhaimangun, Mary vang honsunga chun aum jinge (John 20:14-18). Hichelai muna chun Jesu athokit jouvin akimupi. Jesu hindoh it (thokit) thu chu Seijui dang ho aga seipeh e. Amahon vang ana tahsan pouve. (Jesu akomuva akilah jeng phat abou atahsan u ahi). Mary vang chu Jesu thokitna Kipana Thupha hetsah .a pang masajo ahitai.

TAO DAN PHA

Pathen in phatthei naboh jing nadin Athu simin, Akoma tao jingin. Pathen koma hin nadei deiyin natao theiye. Hinla, taodan pha chu : Amasa penin, lei le van chule asunga umjouse Sem le Chingtup ahina chunga jong nangma mimalgei jong nakhohsah a nachintup le panpi jing jalin Aminthangvah in. Chule, chonse nahija, amin koudinga jong lomlou nahina’akona, Jesu Christa Cross chunga nangma lhatdohna a ahungthi jala Pathen cha hitheina napeh a “Hepa” tia nakouthei tah jalin kipathu seiyin. Thiljouse jong hi nangma phatnadia abol ahijal le nangma phatna dia ijakai boldia akitep jalin jong kipathu lhut in.

Abanin, nabolkhel, nasei le nagel khel ho nakisih thu akoma lhut in, ngaidam thuminlang, Acha nahitah jalin Ama khut a kipethengin – natahsa, nalhagao, hitheina naneijouse, thil napeh jouse, natohna le nathilgon chule na masang jouse jong Ama khut a koiyin; nachunga vaihoma, Ama lungdei hinkho namansahna din Akhut a ngamin, alungdei hinkho mangthei dia Lhagao Thenga nakaihoi jing din ngeh in. Pathen hi nachonset ngaidam nom le ngaidam thei ahi (1 John 1:9) ti hejingin.

PATHEN TO KIHOU : TAO

Pathen in phatthei naboh jing nadin Athu sim jingute. “Pathen kom ibelnauva ngampela i-umthei nau chu hiche hi ahi – Ama lungdeilama i-thumule aman iseiyu eingaipeh uve. Chule, Aman i-thumu eingaipeh’u ihet’ule- i-thum jouseu chu- imusau ahitai ti iheuve.” — 1 John 5:14-15

 Pathen thu nasima, nagel jou chomkhat tengle, taonan Ama chu houvin. Napa deitah, napanpi nomjing le nangma dia phapen bolpeh nomjing, napa deitah koma thu naseibangin Pathen koma seiyin taona in.

AHELOU HO HETSAH IN

  Naosen hon - ‘Asan’ hi adeiyun, Mei jong asan jeh in adeiyun akhoi nom jiuve.

Lah tei agojiuvin, khoileo  akah ding ahi ahepouvin, khoitei ago jiuve. Akhoile akah ding ahi hea koi ham? Nang, anu le apa, asanga   lenjo, kho hejo chu nahi. “Boi, khoi hih in, hoi jongle khoi hih in, mi akah ji” tipeh ding nakin ahi. Hibanga   chu, Pathen helou chu nahetsah ding nakin ahi.  

 Pakai  Jesu’n Leiya  alenlai chun, niseh in aseijuite akivoppin, Pathen thu ahillhangle joule , ahetthemlou hou jong achombeh in ahilthem kitjin,

PATHEN THUSEI NGAI NAN BIBLE SIM IN :

Pathen thusei hohi nakipa, lolhinna le damtheina ding ahi.

Mitamtah in Pathen thu le Pathen deiya chon hi hahsa ding le mihem kipana lam hilou din agelji. Keima hinkhoa kamudolin vang, Pathen in achate kipana ding agel val jenge. Kipahtah a iumdiu anome. Chule, ithanopna hou le idei hou jong hi ichandiu adeiye. Hinla, eiho dinga pha mong ahiloulevang eideipeh deh pouve. Ajehchu, hatmo le hetna lhinglou ihijeh un i-gut’u le thanopna tampi hi iboljoutengule, aphalou le thilphachomlou ahi hedoh in, kisih in, kipahloutah in iumkit jiuve. Hitia, kipana kimansah a lungnomlou tah a ium jiuhi Pakaiyin eilungset un, akitteng jongle ichonnahouva iumkit diu einoppehji tapouve. Hitia, kipana phachomlou kisih kitna dingbep hoa konin jong eituhnom jiuve. Hiche hi kahet’a pat in, thilkhat kaboldingle –

CHRISTA HINKHOMPIA KHANTOU JINGDING

Jesu Christa chu Leng le Huhhingpua nakisantengle, Pathen insungmi, Pathen cha nahitai. Pathen chu “Pa, Hepa” tia nakouthei ahitan, Pathen cha hi’na hinkho chu mangin. Chule, minu-mipa phatah in achate phat amankhompi nomji bangin Pathen in nangma to phat mankhom anomji. Hitia, nakivopkhom lhonna chu Bible sim le tao hi ahi. Hijehchun, Pathen chuto kivop khomna in nitin in Bible sim le taona phat achombeh in mangjin. 

PATHEN HIN EI NGAILUT NAU ALOUPI E

 Bible in aseiye : Lungset mana tahsan vanga huhhinga uma nahitauve; hichu nang hoa kon ahipoi. Pathen thilpeh ahibouve. Koimacha kison theilouna dingin, hichu thilbol vanga hilou ahi. (Ephesus 2: 8,9)

Ajeh chu Pathenin hi banga hi vannoi angailut ahin, Koi hijongle atahsan chan chu mangthah louva tonsot hinna anei theina din a-Chapa chang khat chu apetai.  Ijeh-inem itile vannoi themmosah ding hilouvin, Ama jeh a vannoi huhhinga aumtheina dia Pathen Chapa chu vannoiya ahinsol ahbouve.” (John 3:16-17)

Itahsan tei diu ngai ahi

Pathenin eingailuvin, ei huhhing tauve. Hinla, atahsan tei ngai ahi.Thusei tampi hin, kipana thu, huhhing ihinau thu kijet iseinom jiuve. Hichun, eikipa sah uvin, iki nemuve.

A PATHENU PAKAI HIKHA NAMMITE ANUNNOM AHIUVE

“ A-Pathen’u Pakai hikha nam mite chu anun nom ahiuvin, Pakaiyin agoulo dia alhendoh mite chu anomuve -anunomuve!”( Psalm 33:12)

Pakai hi amin kidangtah ahi. Amin hi ‘KEIMA’ ( I AM) ahi (Exo.3:14)

Pakai Jesu’n “Abraham masangin ‘KEI’ kana umtai” ati (John 8:58)

Bible in aseiye, “ Jesu Christa chu tuni, janhi, chule tonsot geiyin abang chu ahijinge.” (Hebrew 13:8)

John 1:1 nahin Jesu chu ‘semtila umsa’n aseiye. Jesu’n mundanga aseina achun “KEIMA akipatna le ajona kahi” ati (Revelation 1:1 & 1;8 & 19:6)

Amin kidang ‘KEIMA’ (IAM) le ‘TONSOT PAKAI’ chu anasel ahin Khonunga hung kiphongdoh ‘Jesu’ chu ahi.

NA DAMNA DIN PATHEN GAMA LUT IN

Thil jouse hi JAT NI a hopkhen bou ahi. Pathen le Satan. Atheng le Athenglou, Apha le Ase, Ahoi le Ahoilou, Hinna le Thina, Damna le Natna, Pasal le numei,Achal le Api, Van le Lei, chule adang jouse jong hopnia hopkhen cheh ahi.

‘Lenggam’ jong hi ni bou aume – Pathen Lenggam le Satan Lenggam. Vantil ho jong hop ni bou ahi – Pathen Vantil le Satan Vantil’. Mihem jong jatni bou ahi – Pathen cha le Satan cha.

Pathen cha hilouse  chu Satan cha ahijenge. Pathen chate jouse chu Pathen Lenggam mite ahin, Pathen chate hilouse chu Satan chate, Satan Lenggam mite ahijenguve.

CHRISTA LENGGAM CHU NUNNOPNA GAM AHI

    

         Christa’n atundoh ding ‘Longlou Lenggam’ achu chamna le lungmonna lhingset umnamun hiding ahitai (ven Isaiah 9:7; 11 le 35,chule Daniel 2:44). Mihemte lah-a kidouna umtalou ding, thilsem dang jouse to jong chamdel’a hinkhomna umding ahi. Mitin’in jalenna aneiya, hesoh gentheina le kinotthapna umtalou ding. Milhasam panpingai ho le tibukimlou umtalou ding. Nelgam’a jong tui long ding, nelgolai jong twiveina sohding chule leigolai munho-a jong twisam putding ahi (35:5-7).

LONGLOU LENGGAM KISANIN

“Nangho vang Zion molvum, Pathen hingjing khopi, Van Jerusalem, Vantil asang lah hung lhunga, kipah thanom le van’a kisun lutsa apeng masa chengse kikhopna, mijouse thutan Pathen kom, them changsa ho Lhagao suhchamkimna mun, Jesu palaina a kisemdoh Kitepna Thah a chu hung nahitauvin, hiche thisan kithekhumna chun Abel thisan sangin thilphajo cheh sei ding aneiye.

PATHEN LENGGAM MI NAHI NAH EM?

Pathen Lenggam ipi ahi nahen, aumdol jong nahenai. Ahile, nangla, Pathen Lenggam-mi, citizen lhingset nahi nah em? Tu-leiset a nalenlaiya hi hiche Pathen Lenggam-mi chu nahiya, agamsunga nachenpat loulaiya, hiche Lenggam sunga chu NUNNOPNA,HINNOPNA naneitheilou laile, thinunga bou man din kinemval hih in.

NA DAMNA DIN VEN

Jesu’n ei hung lhatdoh diu dan chu Pathen anamlhensa Israelte anavetsah tai. Pathen doumah (chonset) abol jeh uva gamthip laiya gulsen abanthauva chun, Mose taona sangin Pathen in, Gul khat thinga akhaisangsah tai. Hiche gul vejouse chu hingdoh jiuva ahi. Hichu, Jesu Cross chunga khaisanga, khepbeh a aum diu chu avetsah ahi. Chule, hiche Cross a kikhenbeh Jesu vea tahsan jouse chu chonset thina akona huhhinga um ding ahi.

Jesu’n athi masanga asei chu hejingin :

 “Gamthip noiya Mose’n gul adop sang banga Mihem Chapa hi kidom sang ding ahin,
atahsan chanin Amaa tonsot hinna anei ding ahi.
Ajeh chu Pathenin hi banga hi vannoi angailut ahin, Koi hijongle atahsan chan chu mangthah louva tonsot hinna anei theina din a-Chapa chang khat chu apetai.
Ijeh-inem itile vannoi themmosah ding hilouvin, Ama jeh a vannoi huhhinga aumtheina dia Pathen Chapa chu vannoiya ahinsol ahbouve.
Ama tahsanna chu themmo chang louva, atahsan lou vang chu Pathen Chapa chang khat min a tahsan loujeh a themmo kichansah ahitai.(John 3:14-18)
.

CHRISTIAN DIHTAH HIDAN

Christian dihtah chu Jesu Christa ‘huhhingna chang’, ‘Jesus Christ a hinna nei’ le kitah tah a anungjui ho hi ahiuve. Hitobang miho chu ‘Pathen in ahet’ Christian ahiuve. Mitamtah in anu le apa Christian ahimana ama jong Christian hijeng in agele. Hichu ahipoi. Christian insungmi,Houbungmi le thilpha bol manna Christian dihtah hithei ahipoi. Houbung lamkai le Houbung miten hisah in, henauvinate. Hinla, Pathen het nahilou ding ahi.

Pathen in Alungdei Aseimasaji

Achapa Jesu hungding seimasa dia Alhacha kin boldia John ahinsolding chu apanna ding Elizabeth aseipeh masai. Achapa Jesu penna dia agon Mary jong chu Pathen in, vantil Gabriel kama konin aseipeh masa’e.

Nang jong nasunga Jesu pending adeithu Pathen in Bible ahin dimset in aseiye. Chule, alhacha thusei tampin jong naseipeh e. Keima, alhacha dia jong simtheilou jeng jong eiseisah jinge.

CHONSET THANEINA AKONA MIHEM HUHDOH DIA JESU HUNGA AHI

NAZARETH A JESU THUSEI (Nazareth Menifesto)

Luk 4:14 Jesu Lhagao thahat kengin Galilee lama ahung kile kittai. Chuin Ama thudol gamsunga akithangsoh tai. 5 Houthua kikhopna in tin’a miho ahil len, mihon Ama aseipha soh keiyui. 16 Ahung seiletna Nazareth khoa Jesu ahungin, achon na ngai bangin Choldo nin houthua kikhopna in’a achen, Pathen lekhabu sim dingin adingdoh tai.17 Hichun Isaiah Themgao lekhajol apeuvin, lekhajol alhap lhah a amudohna laiya chun,
18 “Pakaiya kon Lhagao kachunga aumin, Tahlelte henga Kipana Thupha seipeh ding, Sohchangte lhadohna thu seipeh a, Mitcho ho khomuna ding seipeh ding, Nehchintoa um ho lha-ong ding seipeh a, 19 Pakai deilhen kum seipeh dinga thao einu ahitai,” tin akisun’e.

LA DEILHEN : Alhanoi dailim noma chun

1. Alhanoi dailim noma chun,
Lhatdamte kicholdo tante ;
Amauva tonsot hinna amu tengu le,
Kipah tauvinte.
Chengunte chengden tauvinte,
Lungsetna Pakai vahchoiyun ;
Atonsot’in haljing tauvin te,
Alhanoi dailim noma chun.

NACHONSET ASOPTHENG TAI CHONSE KIT DATAN

Vannoi mihem jouse chonse ahin, Jesu bou chonset neilou ahi. Michonsete lhatdohna dinga chu ‘bohbehlou’ ngaiya ahin, Jesu chu bohbehlou ahitai. Aman, ‘chonset beihel’ hinkho aman jouvin, vannoi mihemte (nang le kei) chonset le suhkhel jouse ( ahinsukhel ding ho gei) jouse amachunga kilah in thingpela apodoh tai.

Aman chonset neilou ahi chu Pilate hihen vaihom dang ho jouse le achungthu tandia adinna jousen jong asuhkhel amudoh pouve. Hinla, Pathen thilgon ahin, Jesu chun ama chamtah a mite chonset akipoh ahi jeh chun chonsen (nang le kei chule mijouse) chonset po in Thingpel (Cross) in khet beh in aumtai.

Pathen thua kisun bangin, Amanla chonset neilou chu iti sapsetna chang ding ham? Sapsetna changlou ‘Thingpel’(Cross) a kikhenbeh ngai am?

“Danthua kisun chu, “Thinga kikhaisang tapou chu gaosap chang ahi,” kiti ahijeh in, Christa chu eiho jal’in gaosap achangin, Danthu gaosapna akonin eihung lhatdam tauve.” (Galati 3:13)

Christian Golvah Kin Man Phatchomna:

Semtila pat in Pathen thupeh ngaisah louna le thu-hil chomjepjep aum jingin; tun eiho lah in jong atamtai. ‘Golvah kin’ Christian masahon abol hou jong, tukhanga ngaisah lou atam in, amanglou jong atamtai.
Christiante dia Kin loupi Ni sehseh ‘Christmas’, ‘Good Friday’ jong ngaisahlou atamtai. ‘Jesu penni ahimonge ti hetchetna jong hilouva ‘Christmas’ kimang angaikhoh poi’, ‘Jesu thini mong ahi ti hatchet hilouva Good Friday’ man angaipoi; ahiloule, ‘Mi thini, Jesu thinia iti kipa golvah kibol ding ham?’ tiloi atam tai. Chubanin, ‘Pathen dia nijouse kibang cheh ahi, nikho khat chu imachoma gela man angaipoi’ ti jong atame. Solchah Paul in ‘hoijoh jong adihpen le adihlou joh aum deh poi’ tin aseinai.
Adih le adihlouna hilouvin,  man aphatchomna, adeh a India gamsunga hon iman diu akhohna aume. Christmas, Good Friday kimanga, Golvah ankong le kin kimang hi Houbung in Pathen thu le Aloupina aphondoh nau,Houbung dia ‘Mission’ kinbolna ‘Ministry’ khat ahi.  Adeh a Christian lhomcha ihinau India gama hi hiche KIN hohi phatea miho het a iman jing diu aphai. Langkhat a seidin, phatea iman jing louvule hiche nikho ho Solkal in hetpina a ‘Choldona’ (Holiday/ Chhuti) eipeh’u jong hi eipehda jeng theinau jong aume.

VANGSETNA HOHI PHATTHEIBOH CHANNA JONG AHIJI

Satan in Pathen thilgon suhmo agojinge. Jesu apena pat in Satan akicholdo thei tapoi. Jesun atha chimit ding kichan, suhmo ago jinge. Jesun Pa thu anit lhomkei jing jeh in Satan in alonaje ahepoi. Pathen Chapa ahina sonsah a le mankhelsah a CROSS lhunsahlou atup jinge. Hinla, Jesu ajou thei jipoi. Hijehchun, Jesu ajotahou jongle, athijouva Pathen Lenggam Jesun atundoh chu aumjomlouna din aseijuite le anungjuite suhmo ago jinge.

Jesu seijui lah a challangpen Peter jong amngcha go jinge. Hichu Jesun amu jinge. Peter sunga Satan alutgot jong amun, Peter aseipeh in :