PATHEN VETDATENPA MILOUPI SOHTA

Mihon “Pathen hi kidihtah le thengchamkim ahin, mijouse thu atanding, alungdei bang hilou jouse  themmo achana gotna apehding, damun meidila asolding  ahi” ti aseiyule, Pathen chu avetda tai. Pathen hi umdale’ ti agelin, ahotlheh tai. Pathen lungdeibang ahilou ding akihet in, themmo achan teidingin akigel in, avetda lheh jengtai.  

Mihon, “Pathen chu munjousea um, munjouse musoh, thiljouse hesoh ahi” atiule akicha kit in, “Kei jong hi eimuteiyintin, kalunggel le kachonna jouse hentin, themmo eichana, gotna eipeh teiding ahi” tin avetdan, athet cheh cheh tai. Peldoh danla ahepon, amuteiding, ahetteiding chula ahe-ngalin; aning kihalin, hinla, apeldoh dan aholhol in amudeh poi. Alung agimin, Hou lamkai ho agadoh-le,

MITE TAOPEH HI PHATTHEI CHANNA AHI

“Kahinkhoa achapa Thupha seiphongnaa akin kabol jing Pathen chu tang louhel’a nang ho kaminphah jing hetoh a pang ahin,” (Rom 1:9)

“katao chanin alungdei lam khat ahiya akhonna beh le nang ho kahungvil thei teina dia Pathen henga kathum jing ahi.” (Rom 1:10)

Solchah Paul in akinbolna Houbung mite ataopeh jing banga eihon jong insungmi, itohkhompi, le golte jouse taopeh jing ding ahi.

Lhagaova hat-in bou mi taopeh ding ahipoi. Ahat-lou hotah hin miho taopeh ding ahi. Hichu, theisuna Pathen lungdei i-bolnau khat ahi.

Pakai Jesu'n, khat le khat kingailut-toding tia asei hi, eihon, miho i-ngailutnau ivetsah theipen'u chu 'Taopeh' hi ahi. Agentheipen, sum muna neiloulai student hon jong abolthei pen ahi. Bolin, Pathen in napanpi ding ahi.

JI-NU JI-PA PHATAH HI’NA DIN,

“Christa ja nan khat thun khat nungu’vin” (Ephesus 5:21)

English (NIV) a i-ledoh-le “Christa jana’n khat din khat kiphaltheng’un”(Ephesians 5:21NIV) ati.Hoijoh hile, akibang thouve.

Jicha kituptah hina dia, khat lungdeiya khat nun ding ngaiya ahi. Chule, khat kipana dia khat chun, ajipa/ajinu lungdei ahola, ama lungdei chu donda’a, aloipa/aloinu lungdeiya chon ngaiya ahi.

Golcha phatah le kitohtah hina din jong hichu angaiyin ahi.

Chubanin, Christian dihtah, lhagaova khangtou jing hi’na dia jong Christa koma kipehtheng ngaiya ahi.

NA LENG GAM HUNG LHUNG HEN’

            I-Pakaiyu Jesu Christa chu leiya alenlai chun,aseijuite’n ama taojing chu amu’u hinte. Seijuite jong chu tao ding noma ahiuve. Hinla, a Pakai pau chun itobangtah a ataodiu adei ham, chule ipipen athum diu adeipeh em? ti chu ahetnom jal’un, Jesu koma chun, “Kei ho jong taodan neihil’un” tin angeh-taove.

            A Thil ngeh’uchu thilpha ahijal chun, Jesu’n “hitihin taovun” ati : “Vana um ka-Pau, Namin kijahen, Na Leng gam hunglhung hen; Vana nalungdei akibol bangin, leiya jong nalungdei kibol-hen” ti ahi.

Mat 6:9 Hijeh chun hiti hin taovun:

CHRITIAN JOUSE PATHEN LHACHA AHI

”Christa Jesu lhacha, Pathen Kipana Thupha seiphong dia solchah dinga lhentum, Paul”( Rom 1:1)

Solchah Paul in hitia aseitheina hi, Jesu Christa kouna kichehtah neiya ahijal ahi. Ama banga kouna kichehtah neijouse hi Alhacha kinbol ding,Ami huhhingna thupha seiphong dia kou le lhendoh ihi cheh’uve.

Paul banga ‘vah’ in nakholhuh ngaiya ahipoi. Ama chu Jesu’n athijouva Athokit achu, Alhacha dia anal hen masah ahiuvin, amaho seina akonin eihon ihetauve. Bible in Paul teho thuhil imu gamtaove. Huhhingna change nakihetchet tah-le, Jesu nungui nahitai.

NITININ NA NGAILUT HO PHAT PEN

Nitinin, Nanu-napa, nasopi, naji-nachate din naphat pedohjin, chomcha hijongle. Nakihoupi diu phat pejin. Mundanga um hoding deh in, nitin in chomcha beh phone bolin ‘Na dam’u hinam?’ beh tijin.

Ina um nahi jongle, nahouna diu phat nei teitei jengin. Hichu, kingailutna sangtah, Pathen lungdei ahi.

Jesu’n kikhohsahto dingdol aseiye “Nanu kivet in” (John 19:27)

PATHEM LIM NALO NAH EM?

Pathen atheng le adih chamkimpa lungdei tah a koiham akidih le atheng chamkim jouding?

Hatchamkim Pathen  banga koi mihem ham napha tong joujai ding? Thilpha bol jouding le tohdia eidei jouseu koi momhmong ham atong jouding?

Koima aumpoi. Pathen lung toh jou koima aumpoi. Leiset a eiho banga hatmo nu le pa lungdei bon toh jou koima umlou, koi mong mong ham Pathen lungdeiya chon jou ding?

Koima aumpoi. Pathen inla, Genesis a ivet-le, Pathen in Ama Limloa eisemu ahi ngalin. Alim lo jouding koima mihem aumpoi! Alung tohjou ding umlou?

Pathen Lim ilojou pouve : 1. Athenna koiman lojoulou. 2. Akidihna koiman lojoulou. 3. Ahatna koiman lojoulou. 4. Athilboltheina koiman lojoulou. 5. Athupeh koiman lojoulou.

Hijeh achu : “Mijouse chonse ahitai, Pathen loupina chang jou talou (Pathen Lim lojou talou) “ tia Bible in Rome 3;23 a asei ahi.

PATHEN LHACHA NAHI KIHET JING IN

Solchah Paul in ”Christa Jesu lhacha, Pathen Kipana Thupha seiphong dia solchah dinga lhentum, Paul”( Rom 1:1) tia aseiya abolbanga, Christa nungjui jousen itiuva, kipana thupha hi isei diu ahi.

Solchah Paul banga hi Jesu Christa kouna kichehtah neijouse hi, Alhacha kinbolna,Jesu Christa’a Pathen mihuhhingna thupha hi seiphong dinga lhendoh ihi cheh’uve.

KATHUGUH 15na

KATHUGUH 15na 

 “Pathen hi Ngailut ahi” (1 John 4:8) Ama thiljouse Sempa ahi. Asem jouse, angailut mihemte dia asem le apeh ahi (Genesis 1-2)
Mihem koma imacha angeh poi. Sum le pai, thil le kilhaina imacha angeh poi.
Mihemten Ama ipeh diuva, Pathen in adei khatseh chu ‘Na lunthim neipen’ ati bou ahi.
Hiche ‘Lungthim’ ati hi, ‘Ama itahsan diu, Aman eingailutnau ihet’uva, eiho phatna dia agon ho itahsan’uva, Athupeh hohi init diu’ bou ahi.
Pathen in thupeh lenpen eipeh’u chu, ‘Ama, thiljouse Sempa, nang le kei eisempa, Pathen khatseh le ahinsol, Achapa Jesu Christa hi tahsan’a ‘Huhhingpu le Pkaiya ikisan diu’ hi ahipene. Ama ingailut’ule, Athupeh hi initdiu ikin lenpen’u ahi.
Hichu, Lhagaova penthah ahi. Hichu, Pathen cha hi’na ahi. Hichu, Pathen thupeh nitna ahi.  Hichu, Jesu’n “Ka Pa lungdei, Pathen lungdei, Pathen Lenggam kisan’ ati chu ahi.
Abanin, Ama a iumtah’ule, Ga ineidiuvin aseiye. Chule, Ama a iumule Ga ineidiuvin’ John 15:6 muaa hin aseikit e. 
Iti Ga inei diu ham? Ipi ham igau chu?

Isei masah bangun, Pathen in eihoa konini ma angeh poi. Thiljouse Sempa dinga chu thiljouse Ama a le athuthu ahi. Nang le keiya kona angaichat beihel ahi. Hinla, eiho 
Khat le khat kingailuto dia eihil’u ahi. Iki ngailut’ule, kipan-hu toding tina ahi. 
Kipanhu tona chu, sum le pai, neh le chah le natoh a ibol diu ahi. Hichena ding chun, kiloikhom ding le pangkhom din eideiyui. Hijeh chun, ‘Houbung’ eisemdoh peh’uve.
Houbung le kiloikhomna kiti chu sumbeiya kivaipohna umtheilou ahi. Pathen thu eihildiuva jong, agundoma kichuh mi le natohna dang neilouva kichuhna le tonggun ngaiya ahi. Hiche ho chu nelou donlouva umthei ahipoi. Mipi hin tokhom ngaiya ahitai.

Ka hetdohdan : 
Kalungdon jah phat in ka ngol ngol in, Pakai Jesu kaphangkou jengle; sandia lomlou michonsepen taona chu, Aman eisangtai. Katahsa dammo le hatmo chu damna le hatna eipetai. Kanun jouse eikhelpeh in, nunthah eipetai.
“Kakipana hi iti ka vetsah dem O?” tin kageltai. 
Chule, Ipi kabola, iti kaga ding ham? Tiho kageltai. Kachanginla, ipitah thilpha le miho panpinala kibol thei pontin, Houbung mite lah beh ahin kipangle; min eihe hih jongle, Pakaiyin, Achunga kakipana hi eihetpeh inte ti kageltai. 
Mibanga sum le thil tampi pehtheila kaneipon. Somakhat peh dingla, sumsan neilou dia iti-ijat kamu kisutoh themlou. Ka lung ajingtai.
Akhonnan, Thokit jingkah, Pakai minin, anngolin, annehkhat man kapedoh in. Guhthimchan, hou-ina katohtai (April vel 2010 kum thu ahi)
October lamin, masangpeh a kanatohna sum ho kahin mutai. Somakhat kapetai.  2011 in lamdohna ding themchacha eihinpetai. Hitichun, atamjep kahinpetheitai.  Mimuding le tedin, mukham le seikham ahipoi. Hinla, keibeh kakipah in, themcha beh, mithengte lah a pan latheiyin Pathen in eipanpi’ ti kakihet in kakipah cheh cheh jin ahi. 
Kataojin, “Pakai, theisuna, lhinglou puma kahin to hi, mihon 999 atanaova +1 ahina behdin neisanpeh in, suthengin, phatthei boh in” katiji. 
Kasei bangin, min eihetpeh louvangin, Pathen in eisanpeh kahen, kakipah mong mongji. Mihet ding jong kanom behseh poi. Ajehchu, hichelaiya miho tojatto tekham ahipoi. Hijongle, kakhama katodia eipea Pakaiyin, phatthei eibohna le milah a pan latheiya eikoitai ti kahen kakipah chungchone.

Hichu, Pakai Jesu’n asei “Keiya na umule naga diu ahi” ati chu hitante katitai. 
Aban jong Pakaiyin eipanpinte ti kakinem in ahi. 
Chule, lhagao lama jong anop-le ga eineisahtheiye ti katahsane. 

KATHUGUH 15na  ‘GA NEINA DIA PEH MASAH ANGAIYE’

‘Sum muna din sum pai angaiye’ tia kisei hi adihna chungin, lhagao gama hin adih deh in ahi. Kiphal tah a, ineisuna, ipeh-le, thiljouse sema le neipan eipeh be be jenge’. Tahsa lamin jong eipen, lhagao lamin jong eipehbe jingin, kipana tahbeh seitheilou akinei jinge. Hiche hi “Vannoi miten ahetlou le eilahpeh theiyu thil ahipoi’

Vahchoiyin umjing tahen I-Pau Pathen le I-Pakaiyu Jesu Christa chu.
Nang jong hiti thei ding chun, Pakaiyin napanpi jing tahen.

Jesu Christa Tahsan Jouse Pathen Chate ahi

Jesu Christa tahsana kisanjouse chu ‘Pathen chate’ ahiuve.(John 1:12) Chule, themchanga ‘tonsot hinna’(huhhingna) chang diu ahi (John 3:16-17).

‘Themchang’ kitihi Pathen in, achonset angaidampeh, Jesu Christa thisanin ‘chonset asopthengpeh’ a themchang a, athenga Pathen in asana hi. Hijeh achun, Jesu Christa hi ‘tahsante themchanna, thenna, huhhing channa’ ahi.

Pakaiyin aumpijing Kihet ho anunnom ahiuve

Hinna lampi neivetsah ding, Nei-umpijing jala kipanakim le neichen kompi jing jala  ding nopna  hi tonsot geiya neipeh ding ahi (Psalm 16:11)

Ama kom beljouse Pakaiyin apanpiji.

Taojing jengin, phattinin. Na hahsatna, nalunghanna, nalungnatna le nakichatna jouse Pakai koma taonan lhut in. Nangaichat jouse jong seiyin. Nangma hatna keuva, nadeitah jong nakiboltheilou seiyin. Hatma nahi, lhinglel naki Pakai seipeh in. Na panpi din, Christa ngeh in.

Nitinin, Bible simin. Taojing jengin. Aman napanpi jing ding ahi.

JESU-TO HINKHOM HI NOPNA TAHBEH AHI

            Jesu Christa tahsana kisanjou hinkho hi ‘Christa-to hinkhom’ akiti. Hiche ‘Christian hinkho’ hi Athupeh Bible’a kisun ho nit’a, Ama kipuisah jing ding ngaiya ahi. Ipithil bolin, itobang dinmunin dingjongle chun, Ama vaihopna ngajing ding, Ama’a kingai jing ding ngaiya ahi.

     Pathen’a nakingai jingle, lhagaova na khantou jing ding ahi. Lungdon -lungjin bollou ding hi I-Pakaiyu Jesu Christa’n eideipeh’u ahi. Hichu, eiho dia tahsa le lunggel damna ahin, Pathen itahsannau le Ama isonnau jong ahi.

I-Pakaiyu Jesu Christa’n, “Na lung’u donsah hih-un. Pathen tahsan’un, Kei jong neitahsan’un” (John 14:1) ati hi bolin. Aman na-umchan jouse ahen, nakhohsah jing’e ti hejingin. Lungdon-lungjin, kichat le olmona neilouvin, Ama’a kingaiyin, khantouna lam mano jingin. Nitinin Bible simin, Tao jing jengin. Chutile, tahsanna in khangtou jingin natin, kipanana, nopna le lolhinna nahin nei cheh cheh ding ahi.

Kipana Dihtah Neiyin, Nadama na Lolhinding ahi

Kipahtah a hinkho man hi damna, natoh molsona le lolhinna lampi ahi.

Mitamtah vang kipana anei joupoi. Chomkhat akipa jongle, akipana hochun lungnatna, kisihna, kana le lunghanna asokit jitai. Ajehchu, akipana chu ama dia pha lam ahilou jeh ahi. Kipana dihtah hi Pakai Jesua bou aume.

Nahinkhoa kipanatah neilou nahile, kineosah in, Cross (Christian kipatna) bula chun kilekit inlang, chonse nahija Pathen phattheina tahtah nachanloulai chu gaseiyin, chonse nahi chu kihet in, nakam tah in, taonan, Pakai koma phonginlang, Jesu Christa chu na Leng le Huhhingpu din kouvin, chule, Lhagao Theng chu thumin. Chutile, Pathen phatthei bohna chu nachana, kipah jing ding nahitai.

Bible in Chonset atihi Hechenin

Pathen thu Bible in ‘chonset’ atihi, mihem khat in miehem mu le het thei suhkhel aneiho mai hi kiseina ahipoi. Hiche ho jong chu ahop cheh nai.

Pathen chu Atheng chamkim, apha chamkim, kidih chamkim ahi.

Mihem in iti kihabol jongle Pathen banga theng joulou, kidih joulou, phachamkim joulou ahi. Pathen in Ama Limloa eisem’u ahin; Ama bang hidia eideiyu ahi.

TAO JINGIN

 Pathen ihounau phapen chu taona ahi. Jesu Christa, Ama Pathen Chapa jeng in jong nitina Apa ahouna chu taona hi ahi. Eiho jong tao jing dingin eihil’un ahi. Pathen thu’n aseiye -

             “Pathen kom ibelnauva ngampela i-umthei nau chu hiche hi ahi – Ama lungdeilama i-thumule aman iseiyu eingaipeh uve. Chule, Aman i-thumu eingaipeh’u ihet’ule- i-thum jouseu chu- imusau ahitai ti iheuve.” — 1 John 5:14-15

NU NEILOU HODIN TAOVIN PANHUN

Nang ‘Nu’ nei nahile, Nu neilou ho din taovin, napanhu theina aumle panhun. Pathen in Nu neilou ho nu khela akhohsah diu dang apehna din taovin. Pathen in phatthei naboh ding ahi.

Nu le pa neilou ho din taovin. Pathen in ahinkhou asemphat a vang abohna din taovin. Pan-hutheina naneile pan hun. Pathen in phatthei naboh ding ahi.

Nu Manlutje

‘Nu Nikho’ hi Nu ngailutna geldohna ding le Nu dinmun lutje hetdohna ding le nute ngailut ding thu seina dia kinit ahi.

‘Nu’ kiti hi mihemte dia min ngeipen le dei-umpen ahi (Pakai Jesu tailouva). Ajehchu, mijouse ngailutpen le mijouse ngailutna changpen ahi.

Mijouse dia, Pathen bana eingailupen’uva ‘Nu’ ahi. Eijen penuva, ann netheilou ihilaiyuva anoituiya eina vah’uva, thenje ihetmasanguva eina suthenguva, eiseilen penuva chu ‘Nu’ ahi.

Athisana chate vah achu ‘Nu’ ahi. Anoitui hi athisan ahi. Noitui achedoh chanin, ‘nu’ chu ahatmo cheh cheh in, alhasam cheh cheh e. Hinla, ‘Nu’ chun ama ding gellouvin acha ding gelnan, itlouhelin, acha chu ‘anoituiyin’ avah e.

Tonsot a Hinding Ihitauve

 “…, i-Pakaiyu Jesu Christa vanga Pathena kipah jinga um ihiuvin, Ama jal’a kichamna hi ikisan’u ahitai.

Mihem khat jeh a vannoiya chonset hung lut’a chonset jeh a thina hung lut, hitia chu mitin achonset jeh a mihem jouse chunga thina hung lhung kha ahi.

Danthu kipeh masanga pat vannoiya chonset umsa ahitan, ahinla Danthu umlounaa chu chonset kisimlou ahi ; Adam a pat Mose geiyin Adam chun Danthu apalkeh a suh khel anei banga suh khel neilouho chunga jong thi nan vai anahomin hiche Adam hi ahung dingpa lim’a um’ah anahi.

VAHMANG JONGLE AHUNG KILE KIT ACHU AHAMPHA AHI

Pathen in na ngailut a, na phatna le kipana ding abolnom jing ahi. Na khohsah a nachin jing ahi. Hichu kihet inlang nang in jong Ama ngailu’n. Chule, Aman phatthei nabohna hohi kipapinlang, chang jingin. Hichu Pathen lungdei ahi. Angailutna hi nahetthem loule, Aphattheibohna nachan jong hethem ponatin, kipaje jong nahet louding, chan jong nachan theilou ding ahi.

Chapa vangmangpa thusim Pakai Jesu’n asei hi phate chan ven (Luke 15: 11-31). Eiho lah a thusei hon, aneijopa kijet iseijiuve. Vahmanga hung kilekit thu hi asei jinguve. Alenjpa, a-upa thu hi sei le gelin ineiji pouve.

NAKIPANA CHU SEIYINI

Nikhat hi Jesu avalepet in Samaria kho koma tuikul komahin akicholdoi. Numei khat amun, thu kidang tampi aseipeh in, AMA  Messiah ahi thujong aseipeh in-

“ Hichun Jesun, “ Kei, nakoma thuseipa hi Ama (Messiah) chu kahi” ati.(John 4:26)

Hichun,  Amanu chu atha anomval jengin, miho seipeh kal ngahlel in, “Atuikhaina bel chu tuikul koma dalhan, khosunga alhailut in, mijouse aga seipeh tai." (John 4:28). 

Nang jong Jesu Christa Huhhingna nakisan nia nakipaje chu seikal nangahlela nasei ding jong katahsan e. Keivang tuni geiyin kaseichim theipoi. Chule, chute ding mong ahi. Hitobang kipana thu, nunlui le mamot mot a hinkho kimang, kinepna lhing neilouva, kiginmona kineijing. Ikhat ibol jongle akilolhing nadem tia tahsanna det kineilou. Dammona inei jongle dam ding le damlouding kihelou. Itaona jong asanding le asanlouding kihelou. Hinkho kipah le lungmonga kimang theilou. Hicheho jouseh eijopeh ding, chonset thaneina jousea kona eihuhdoh a tua le tonsot geiya kipahtah a Pakai-to cheng khomthei dinga Pakaiyin eitepehnau kichehtah a kihetdoh chu iti kipahlouva ki umding ham? Hitobang kipana chu koiham a imthei ding? Koiham seikal ngahlel louding?

Lunglengvai nunnopna

“Lung lengvai-ho anun-nom’ui, Pathen’in alhamon diu ahi!” (Matthew 5:4),

St.Augustine chu aneolaiyin, aphamo behseh jengin, Pathen aholholle Thuhillhem tia Houlamkaiten aseiyu Nostic ho ana kijuikha kit tai. Alung lungvai abeipoi. Anasa cheh cheh jengin. Anunchan chu kithatgo jing abangtai. Apan anakaidoh, anun adonda ahitai. Hinla, achaina lamina nu, adalhahsa kom ahinnai kit e. Bible umpi jing, adihtah lai kisimkhah theilou. Akithatgo ahisah un asopi khat in avelhi jinge.

HUHHING NAHI KIHET CHET IN

Bible in aseibanga, taona’a nachonset naphona, ngaidam nakithum nung le Jesu Christa hi na Huhhingpu le Pakai dia nakisan nunga jong lungmonna le linepna lhing naneida jeng em?

 ‘Ole keihi pengthahlou jong kahi ham o?’ tia nakiginmo kom um jeng am?  Aumji. Nang lele nahipoi. Mitamtah chutia umji ahi. Hichu, satan natoh ahi.

Chonset phondoh le ngaidam kithum ding hi, Pathen kamcheng Bible’a kisun dungjuiya kiseiya kibol ahi. Bible in

 “Eihon chonsetna kaneipoi, itiuva ahile, eima le eima kilhemlha a ihiu ahi, chule thutah chu ilung sunguva umlou ahi. (1John 1:8)

“Eihon chonsetna iphon vangule ama chu eiho chonsetna chengse  ngaidam ding le chonphat louna jouse siltheng dinga tahsan umtah chule chonphatah ahi. “(1John 1:9) tia ei hilu ahi.

CHRISTA TO HINKHOM HI KIPANA AHI

            Jesu Christa tahsana kisanjou hinkho hi ‘Christa-to hinkhom’ akiti. Hiche ‘Christian hinkho’ hi Athupeh Bible’a kisun ho nit’a, Ama kipuisah jing ding ngaiya ahi. Ipithil bolin, itobang dinmunin dingjongle chun, Ama vaihopna ngajing ding, Ama’a kingai jing ding ngaiya ahi.

     Pathen’a nakingai jingle, lhagaova na khantou jing ding ahi. Lungdon -lungjin bollou ding hi I-Pakaiyu Jesu Christa’n eideipeh’u ahi. Hichu, eiho dia tahsa le lunggel damna ahin, Pathen itahsannau le Ama isonnau jong ahi.

JESUN EISANG JINGUVE

Christa-to hinkhomna, van-gam jotna ahin hahsatna tampi uminte.Bible thu sima namanchah jinga, nataojingle, jona nachanding, Jesun van-gama Amato chengkhomdinga nanalamtoding ahi.

Lhepna nalhah louna din kigingin tao jingun, lhagaovin ago nan tahsa alhasam behseh jenge!” ati. (Matthew 26:41)

Hinla, lungdong hih in, I-Pakaiyu Jesu Christa’n chonset, lhepna le Satan ajosa ahitai. Ama’n aseiye,

“Vannoiya hin hahsatna natoh’ui, hinla, lungmong’un, Keiman vannoi kajoutai” tia asei ahi(John 16:33).

Lhepna le chonset jona dia manchah phapen chu Bible sim le taona ahi. Nalungdon komle taovin,Bible simin, Pakaiyin napanpi ding ahi. Nitinin Bible sim jingin, tao jingjengin.

Lim hi ven, Jesu’n eina sang jinguve. Thoh hattah’a, tBible simjinga, taojing puma hinkhotheng namanle, vana nana sanding ahi. Tu hinkho jenga jong hi van-gam hinkho tobang kipa le nopna hinkho chu nanampi ding ahi.

Pathen Kom Jonin

“Lungheiyunlang,nachonsetnau chengse suhmanga aumnadin Pathen lam’a kiheiyin, chutile, Pakaiya kona kisuhhalna chu nanei thei diu ahi”(Acts 3:19) ati ahi.

Mi konkhat in “eiho chonset jeh hilouva, Adam le Eve chonset jeh a Jesu hungthia ahi” atiuve.

Pathen thu Bible in “Mijouse chonse ahitai”(Rome 3:23) ati. Pathen thu ijousah diu hitam?

Leng David in, “Chonsesa kijil’a themmosa hungpeng kahi!” (Psalms 51:5) tia Pathen koma “Neisop lechun theng tange” atia atao khu iheuve. Chule, hitia atikhu Pathen in adeilhen jouva “Ama khu kalungdei mihem ahi” tia Themgao Samuel koma aseisa. Lenga apansahsa ahitai. Hinla, achonset athenlou jeh achu, chonset abolkit ahi. Ama a chonset tha-hatna aumjing ahet kichet mongmong phat achu, Pakaiyin asoptheng loule itih ajong chonset aboljingthei ahi akihet chet mong mong ahitai. Hijeh achu, achonset, ama a chonset um chu, “Pakai, kachonset neingaidamin, keiya um chonset tha-hatna hi neisoptheng peh in” tia taova ahi.

Solchah John in “Eiho chonset neilouva ikiseiyule, eiho le eiho kilhem ihiuvin, thutah chu eihoa umlou ahi” ati (1John 1:8) abana, “i-chonsetnau chengseu iphondoh vangule, chonsetna jouseua kona ei ngaidam diu le thenlouna jousea kona ei sutheng diuva Ama chu tahsan umtah le kidihtah ahi” (1John 1:9) tia asei hi imuve.

Chonset phongloulai le Christa kisanloulai nahi-le hiche tah chu ’chonsetna’ nasapen, ‘ngaidam theilou chonsetna’ ahitai.

Kasei hohi abolloulai, achangloulai nahile bollin. Abolsa, achangsa nahile, midang seipehnan mangin.