Friday, 5 June 2015

VAN GAM LUTNA DIA BOL NGAI JOUSE JESUN NATOHCHAIPEH TAI


 Jesu’n michonse angailut ahi akiti. Chonpha louvin Pathen amutheipoi jong akiti. Jesu’n “Pharisees ho sanga nachonphat louvule Pathen Lenggam lutthei pouvinate” ati iheuve.
‘Chonphat’  kiti hi ipi ham?
Mihem in ‘chonphat’ itiu hi Pathen in ‘chonphat’ ati hito kibanga nagel em?
Akibahna aume. Thilphabol ahinai. Chule nun le khana phat jong ahi. Min “Min Pathen kahei. Jesu katahsan in, ka Huhhingpu le Pakai din kakisantai” tihenlang,phatna kiti neita hih-le, ajouva ahi. Hinla, mihem in ‘chonphat’ iti keuvu hin  Pakai Jesu sei ‘chonphat’ hi apha joupoiu.
Jesu’n, "Danthu le Themgao ho thusei sumanga hungin nei gel hih un, a bulhinsah a hung kajo bouve" ati (Matthew 5:17).
Hijehchun, ‘chonphat’ kihetna dia kipe Mose DAN le themgao ho thusei jouse nitsoh angaiye. Abana jong Jesu’n asei ‘Molchunga athusei’ (Matthew bung 5 apat bung 7 sunga kisei jou le adang ho) jouse jong hi nitsoh ngaiya ahi.
Theologian tamtah in “Mose Dan thupeh ahahsa valin koiman anit jou theipoi. Jesu thupheh Matthew 5-7 hi ahahsa cheh kit in koiman nit jou theiponte” atiuve.
Martin Luther chun, “Jesu’n Molchunga thu asei hohi ‘Mossisimus Moses’ (Mose thupeh chungvuma thupeh hahsa) ahi” ati.
Vetsahnan : Dan luiyin, “Mito jong hih in” atile, Jesu Dan in “Numei jonlunga vea chu ajonga ahi” ati.
“Na melma ngailun, na bolseteu phatthei boh un”; “Na khut langkhat in nakipalsah-le tanbong jengin”; “Namit in nakipalsah-le kaldoh jengin”; adang dang. Mihem jojat hilou ahi.

Chule, Dan thu bei louhel din aseiye, "Atahbeh kaseipeh nahiuve, van le leiset abeimang tokahsea lekha jem neopen jong bulhingsoh louding ahi” ati ( Matthew 5:18)
Ahile, aboi gam hel tai. Iti van-gam ilut diu hitam?
Pathen thu Bible thu hohi, mihem hetna maiya moh hetthei ahipoi. Pathen panpi na abou hetthemthei ahi. Hinla, avel vela sim le gel ngaiya, Lhagao theng panpina thum jing ngaiya ahi.
Iseisau, Bible chang hi sim kit ute.
Jesu’n aseiye, "Danthu le Themgao ho thusei sumanga hungin nei gel hih un, a bulhinsah a hung kajo bouve" ati (Matthew 5:17).
Halleluiyah, Amen.
Jesu’n “ Dan jouse hi na juikim louvule van-gam lut pouvinate” atipoi.
Ama boldin aseijo bouve “a subulhinga ( abulhinsah a) hung kahi” atijoi.
Nang le keiyin ibulhit diu, ijuikim diu hilouvin, Jesu’n ajuikima, asuh bulhin jou ahitai.
‘DAN’ tia jesu’n asei hi Mose Dan sompeh in mitamtah in agele. Ahina aume. Hinla, thusompeh keu ahipoi. Kitepna luiya bunga masa ( Mose Danbu, Buse lekhabu kiti ‘Torah’) hohi aseina ahi. Chule, ‘Themgao ho sei” ati tha tengle ‘Kitepna Lui’ (KTL) jouse ahoptha ji ahitai.
Iti Jesu’n asuhbulhin ham?
KTL hin ‘Vannoi huhhing dia ‘Messiah’ hung ding”, Ama jala Pathen le Mihem kicham ding asei ahin, Jesu (Messiah) ahung tai. Pathen in KTL a aseisa ‘Mihem te chonset a kona ahuhdoh na dia thi ding. Thoukit a Pathen le mihem ajopmat ding” tia asei ho Jesu’n achaitai.
Hijeh chun, Jesu’n Cross chunga athiding kon chun “akichaitai” ati ahi. Chule, thina akona athodoh jou chun seijuite akimupin “Keiman vannoi kajoutai” ati (Matthew 28:18)
Bible, adeh a Kitepna Thah (KT) hin ‘Vannoi’ atihi ‘chonset le athahatna’ aseina ahi. ‘Chonset’ hi ‘Satan’ kiseina jong ahin, ‘vannoi’ ati jong hi ‘Satan le avaihopna, athuneina’ kiseina ahiji.
Adeh a hichea ‘vannoi kajoutai’ atihi ‘Satan le athahatna kajoutai’ atina ahi. Genesis lama Pathen in ‘Gul’(Satan) jah a asei, “Amanu (Eve) chilhah in, nang chilhah (chonset le athaneina) lu asuhchip ding”  ati chu Jesu’n Cross chunga chu abolchai ahitai. Chule, athokit achu, atohding kin jouse achaiya, loupitah le thanei tah a thoukit a PA to mihem ajopmat ahitai.
Hinla, mijouse Pathen to kijopmat le kicham ahijeng poi. Hiche, Huhhingna chu channa dia ‘chonphat’ ngaiya ahi. Mihem sei le gel ‘chonphatna’ maimai ahipoi. Jesu sei chonphatna’ nei ngaiya ahi.
Hichu ipi ham?
Pakai Jesu sei ‘Chonphatna’ hi “Pathen tah khatseh le ahinsolJesu tahsan hi chonphat ahi”.
Hijeh achu, Jesu tahsan jouse dia ‘chonphatna’ ngai jouse aman ajosa ahitai. Ama tahsana nakisan-le ‘michonpha’ nahitai.
Tahbeh a nakisan tengle, na panpi ding Lhagao Theng napeh ding, hichu tha-hatna ahi. Lhagao Theng thahatna  chu nachantengle, mihem in asei le ahisah chonphatna ho jong hi nahin neidoh chehcheh ding, Christa nuncham jom naso ding ahi. Nitina ol ola nakhantousah ding ahi.
Hiche nachantah-le, nitinin Pathen thangvah in. Bible sim jingin, tao jing jengin. Chule, akisan loulai ho hilin, puiyin, Pathen thu seipeh jingin.
Pathen in na panpi jing tahen.
(LKHengna 5.6.2015)


No comments:

Post a Comment