PATHEN KOMA TONSOT ICHENKHOM THEINA DIUVA JESU HUNGA AHI

            Mihem lheplhah a aumniapat in, Satan thaneinan mihemte chunga vai ahom jingtai. Natna, gentheina, lungdon-tijatna,kinah-kisauna, thinagei aumoh tai. Mihem hinkho hi nopna tahbeh aumjou tapon, kineplelna le lungdonna aumjingtai.

Mihem in hahsatna totengle Pathen aholin, belding le apanpi ding tha-haat chungnung aholji. Pathen in asemsa mite genthei le tonsot geiya jong asempa, angailupenpa amuloudiu le amahthah diu anompoi.

Chule, Satan thilboltheina jouthei ding le Pathen vaihopna ‘Lenggam’ hin tungdoh dinga, amiten angailutna le apanpina ahinmu kitna diuvin, ‘HUHHINGPU’ khat eiteppeh un, Themgaote kama ana phongdoh tai. Pathen in thil jouse agongtup in, phat kitup chu alhinset phat in, eiteppeh’u HUHHINGPU Jesu chu ahungpeng tai. Hiche, HUHHINGPU hi Pathen Chapa changkhatseh ahin, phat akitupchet tah achu, Pathen in Achapa chu leiset a ahinsol ahitai.  Solchah Paul in ngeitah in eiseipeh uve :

“Hinla, phat alhinset tah in, Pathen in Achapa chu ahinsoltai. Numeiya kona pengin, Dan noiya um mite lhatdoh din Dan noiyin apengtai. Hichu, ‘Cha’ hitheina-tha chu lhingset a ichantheina diu ahi. (Galatians 4:4 5).

Themgao hon anaseimasah bangun, naosen chu, nungah theng Mary sunga konin Bethlehem khopineovin ahung pengtai.Mary’n amin Jesu asahtai. ‘Jesu’ chu ‘Huhhingpu’ tina ahi (Matthew 1:21)

HUHHINGPU Jesu chu ahung pengin, Pathen Lenggam thu ahillhanglen, Pathen thaneina le ami lungsetna vetsahnan dammo kidang tamtah aboldamin, thil kidang tamtah jong bolin, thilha jong akaidoh in, mithi geijong akaithouve. Ama chu, eiho chonset a ithi diu khel in, maichama gancha kithat a Pathen kilhaiji bangin, Aman ahinkho, atahsa le athisan atoh in, chonsepen dia jong thia ahitai ti vetsahnan Cross chunga khetbeh in aumin athitai. Ana thisa ho le tahsa a hung thiding jouse khelin mithi kulkhuh jong gaphan lhanin vuiyin aumin; hiche chonset thaneina tahsa thina chu jousoh in, lhankot ahin phujalin, Ama tahsana jui jouse thoukit ding lamkaiyin, thina akonin kaithouvin aumtai. Thina thahat chu ajouvin, seijuite ni somli sung aumpi kit in, Pathen lenggam thu ahilchen kit in, ni somli ahiphat in vana lah touvin aumtai.

Thina-gal jouva thoukit Pakai chu hungkit ding ahi. Ahungkit tengle Ama tahsana jui jouse apuitou ding, tonsot a Pa Pathen koma chengdiu, vai ahomkhom diu; atahsan lou jouse chungthu atana, themmo achana, tonsot a mit talou ding ‘Damun Meidil’ sunga alelut ding ahi.

Nang vang, Jesu Christa chu nakisana najuijing tah ding kakineme. Achutile, tuni geiya sangloulai hon asan theina diuvin seipeh in. Na seithemloule aseithem ho seibeh pesonin, ajahtheina diu muna puiyin.

Ijemtia, kisanloulai nahile,tuhin taonan Jesu kouvin, na Huhhingpu le Pakai din kouvin.

Pathen in umpi jing tan.