Saturday, 6 June 2015

JESU'N CHONSET APOMANG TAI

Aman eiho chonset jouse atahsaphe’n apo’n, thingpel chung geiyin apodoh in, chonsetna jousea ithiuva, themchanna a ihintheina diuvin aboltan, Ama kijepna maha’n eidamsah tauve. (1 Peter 2:24)
Nang chonset-la apohmang tah em? Ole nangin nakipoh jing nahlai em?
                Chonset napoh a, chonset in nasuhmojing nah lai-le Jesu kouvin, nahuhhing din taonan ngeh in. Chonset jouse apohmangsa ahi chu tahsan in akoma phongdoh in, hichu nang jong nachan nadin Jesu hi na Huhhingpu le Pakaiya nakisanna jong phongdoh in. Nitin chonsetna ho jong najopeh jing nadin Lhagao Theng tha-hatna achu napanhu jing din ngeh in.
Nangma tah in jong Jesu tahsana belje kihet in. Na chonset le na hen-oh jing lunggila na pohgih jouse chu akoma seplhan, Jesu’n aseiye:
“Tong gimte le pohgih pote kahenga hungun,Keiman choldo sah’unge! Ka namkoljon kilah’un pouvin, Keiya kihil’un, Keima lungnengtah le nunnemtah kahi, Keiya hinjouna nanei diu ahi. 30- Ijeh-inem itile, kanamkoljon apoh nop in, kapoh jong ajang’e,”ati. (Matt 11:28-30)
Hichea ‘tonggim’ ati hi English a ‘labour’ kiti hi aledoh’u ahin, ‘labour’ kiti hin ‘lunggela kisahlel, boipi, boina nei, lungdon-lungjin’ jouse kiseina ahi.
Chule, ‘pohgih po’ tia aleu hi English word ‘Heavy ladden’ ahi, hiche jong chu ‘lunggila lunggimna le boina gihsa, chonset pohgih le pohgih dang jouse jong aseina ahi.
Hijehchun, chonset le pohgih dang nanei jouse jong, taonan Jesu pedoh in,
“Pakai, ka pohgih jouse na-anga ka seplhai, nang  ka Paakai nahi. Ijakai nakhut a kakoiye, nei panpin” tin taovin. Hitia chu tahsanna lhingset a nataova, ama napehdoh ahi tah-le, na suboi, na lunga nakisahlelna jouse chu geldoh kit ta-hih in; ‘ka Pakaiyin gelnante” tinlang lungmong tah in um jengin.
 “Pakai Jesu tahsan lechun nang le na-insungmi huhhinga na umdiu ahi,”ati. (Acts 16:31)
‘Pathen tahsan, Jesu tahsan’ kiti chu, aseiho, Bible’a um hohi tahsana kingapna nei jeng ding tina ahi.
Chule, ‘tahsan’ kiti hin ‘sonjou’ tijong ahopthai. Nanu koma “He-nu, neipon” natia nakipohsah a ngampela, apohna chunga na ih-mut jeng chu ‘nanu natahsan, nasonjou’ tina ahi. “Kanu hin eipojouna dem o?” tia kicha geuva nakipohsah-le, apohna chungin ih-mu ngam ponate.
Hiche banga chu, Bible’a Jesu’n “ Ka henga hungun, keiman choldo sah’unge” ati hi natahsan jouva, lungmong tah a naum theile, achangsa nahitai.

Pathen in na panpi jing tahen.

No comments:

Post a Comment