Mi khat thi mitin hinna ding ahi

Pathen in phatthei nabohhenlang, kipana kim, damna kim, lolhinna kim nape jing tahen. Tuchung Godd Friday man hi phatchomna neiteina din hiche hi, tao-to thon simin.

Mijousen chamna adeicheh in. Vannoi kidoupi nina kichaiya UNO akiphudoh in, chamna umtadia mijouse akinep vang in aum theideh poi. Gamtina kidouna, kinah-kisao adimset in. Mihem kivaihopna hon itidola chamna asem vangun aumdoh thei deh poi. Chamna dihtah umna ding hi Pathen vaihopna a kona bou umding ahi. Mijouse thikhela thipa, Jesu Christa thina bouhin chamna ditah ahinso dohding ahi.

‘Thina’ hi mihem’a ahin, ‘Hinna’ hi Pathen’a ahi :  Jesu’n, " Keima thokitna le hinna kahi. Keima ei tahsana chu thijongle hingding ahi, chule koihile ahingjouse le Keima eitahsan jouse thilouhel ding ahi" ati.(John 11:25-26).

‘Good Friday’ hi Jesu thini hetjingna dia kimang ahin, hiche ‘Good Friday’ ‘Thinani’ hi mihem’a kon ahi – mihem chonset jeh’a um ahi. Hinla, ‘Thokitna’ hi Pathen’a ahin, chule, ‘Thokitni’ hi Pathen nikho ahi. Pathen thahatna’n bou Jesu Christa chu thina akona akaithouthei ahi. Hiche, mihemte kinepnapen ‘hinna’, ‘thahatna’ le ‘kinepna’ hohi ‘Thokitna’a bou kimu ahi. Ajehchu,‘Thokitna’ hin ‘hinna’ asodoh in, athokit ahi, Jesu Christa chu hinga ahita’n; thilthah hung kipandoh ahitai.

Thinan kichatna asodoh in, thokitnan lungmonna eipeuve. Thiding gelnan lungthoina sodoh in, thokitna hin kinepna eipeuve. Thinan kikhenna ason, thokitna hin beitalouding hinna, Jesu Christa-to tonot’a hinkhomding thu aseiyin ahi. Bible in, "Nachonset jeh’uva nathipet un….Pathen in Christa-achun nasuhing’un, nachonsetnau jouse angaidam tai" ati(Colossians 2:13).

Jesu Christa athokit’a hinnathah anei chu eiho, Amatahsante dia hinna ahitai. Hiche jala chu Pathen’a hing ihitaove, Jesu Christa neijousen Ama i-lungsunguva achen ikihet cheh’uve. Jesu Amatah in jong aseiye, “Amahon hinna aneitheina diuva hung kahi, chule, lhingset a anei diu ahi.” (John 10:10). Hichun, Ama eihoa aum chu aphotchet ahitai! Jesu’n  eiho chonset jeh’a athoh diu jouse Ama tahsa tah’a athoh jou, Athisan kisoa atojou, Cross chunga akin achai jouva, thia lhana kona ahungdoh chun, ‘hinna’ chu eiho eipetheitaovin ahi. Ajeh chu, Ama athilah’a kona thoudoh’a hinga ahitai.

Ahile, nangin hiche hinna chu naneitah em? Jesu Christa’a hinna, Bible in ‘Penthah’ thudol’a nangmatah hinna’a hetdoh naneiyem?

‘Penthah’ kiti hi Jesu Christa chu nang hinna’a hung hing tina ahi. Pathen lama le hetna dola thina’a kona nahung hindoh tina ahi. Hitia chu, mithah, Pathen le Athudol hethemthei mihing nahung hi ahitai.

Thokitna hin ‘hinna’ thu asei ahi. Hichu, Jesu Christa lhana kona ahung thodoh keu thu mai hilouva, tu le tonsot’a ding chule, nitina dia beitih neilou hinna thu asei ahi. Chule, Jesu Christa hin ‘Van-gam’ lampi chu ahon ahitai. Thina kichat ding aumtapoi. Ajehchu, Jesu Christa-to kijop, athokitna a thoukit khom  ihitaovin; Christa jona loupi chu eiho jona ahitai, tu le khonunga din jong. Jesu Christa’n, Athina le athodohkitna’a hi ‘thina thahatna neipa – Agiloupa chu achaidoh ahitai” (Hebrews 2:14).

Thokitna hin Thahatna jong asodoh e. Pakai chu thina’a kona kaithou ahimasang chu, Seijuite chu lhasam le geichautah in aumuve. Thahatna him him aneipouve.  Jesu thodoh, vana kaltoujouva, Penticost masang jong chun kichatnan adimun, akiselsel jengun ahi. Pentecost ahung lhun tah in vang ‘Mimeidoi’ ho chu ‘dehjoulou’ ahung hitauve!

Pentecost nin, soh numeikhat kichabep,Peter chu mipi sangtamtah lah achun adingdoh tai. Hakat tah in, mipi anga chun thu aseiyin, athapau Jesu Christa chu thinan hetjoulouva, Pathen in loupitah a akaithoukit’a, tua Lhagao Theng chu ahinsol’a, seiyuiten Amathu hi aseiyu ahidol aseile, mipi chu lungdong in aumun ‘Achutile, i-katidiu hitam?’ tin adong taove. Hichun, Peter in,

"Nachonset lungule, nanuna khel’unlang, nachonset’u ngaidamna din Jesu Christa minin Baptize changun. Chutile, Lhagao Theng thilpeh nachan diu ahi" ati(Acts 2:38).

I-pi ham hitia gumna, hakatna pea chu?

Peter  chu Lhagao Theng dim’ a, thahatna anei ahitai! Thoukit Jesu Christa hinna chu anei ahitai. Eiho Jesu Christa tahsanten jong, lhana kona kaithoupa thahatna chu ineiyu ahitai. Pathen thahatna chu eihon ineiyu ahipoi. Eihoa um, Lhagao Theng’a kon bou ahi.

Nahinna’a thahatna naneilou, Lhepna le patepna ho najojoulouva, Jesu Christa thu hettohsahna hoa lhahsapna naneile, Pathen Lhagao Theng chu nanga cheng ding le natong din ngeh in; Ama nanga um chu he inlang, nangma’a na tongdin kouvin, kipedoh in.

Jesu Christa hinna chu Ama tahsana sang jousen aneicheh’e. Nahinna chu Jesu Christa hinna thahat chu dimsetthei ahi. “ Pathen in meidoina lhagao eipeh’u ahipoi, Thahatna, ngailutna le kitimthemna lhagao eipeh joh’u ahibouve" (2 Timothy 1:7).

Kinepna : Thokitna hin kinepna kichehtah jong eipeuve. Tahsa thina nei jongleuhen, i-tahsau hi Jesu Christa banga thoukit ding ahi. Jesu Christa hinna neijouse dinga thokitna hi kichehtah in Bible in , nikhatle ikikhelsohhel diuvin eiseipeh un ahi – “mitphet kahlouva vah hung kilang banga, sumkon gina ikikhel soh diu, sumkon hung ginga athijouse monmangtheilouva kikhelsoh diu” tia asei ahi. (1 Corinthians 15:52).  Hichu, thokitna ding kichehtah, ikinepnau chu ahi. Jesu Christa chu loupitah a imu diu ahi!

Nanginla hiche kinepna chu kicheh’a naneiyem? Jesu Christa chu mudia na kinep tahbeh nah em? Aphotchetna nachan nah em?

Thoukit Jesu Christa chu nalungsunga achenloule, tuhin thilechun, ipi kinepna naneiyem?  Jesu Christa chu nanga achenvangle, Amato tonsot’a hingkhom ding nahi chu kichehtah ahi. "Tonsot hinna chu amaho kapen, mahthah louhel diu ahi," ati ahi (John 10:28).

Pakai Jesu chu tuni hung tale, Ama koma din napui nadem? Nahinna chu Jesu Christa napehdoh tah em?

Nakicheh’a, Hinna chu naneitah a, nakicheh tahle, Lhagao Theng panpina thumin, miho jong panpi theidia nahil dingin temin, taonan thumin.Tao jingin. Hichea kijih hohi mangchanlang, panpi ngaiho panpin. Chutile, Pathen in phatthei naboh ding ahi.

Na kicheh loulaile.Tutah jong hin, taona mangin Jesu Christa chu nakisan theiye!  Jesu chu kouvin, nachonset phonginlang, ngaidam thumin. Chule, na Leng le Huhhingpu din ngeh in, nahinkho pumpi Ama khuta pedoh in. Nachonset lhatdohna’a Cross chunga ahungthia Pathen cha hitheina dia Pakoma nataopeh jalin kipathu seiyin.

Noiya bang in taovin:

Pakai Jesu, tunigeiya nangma kom bellouva ka umna hi nei ngaidamin, tuhin nang kakouve, kachonet jouse neingaidamin. Ka Leng le Huhhingpu hung hinlang, kahinkho hi nadeilamin neipuiyin.Chonset jeh’a  Kading khela nahungthi jalin kakipah e. Loupitah a nathokit’a vankot, Pahengjotna lampi neihonpeh jalin naming kathangvah e. Na hinkit’a Van le leiya thuneina jouse neiya tonsot hinna naneiya, nahinna chu neipehtah jalin kakipah e. Hiche, nanga hinkhothah neipeh hi manthemna din – neiteppeh’u Lhagao Theng chu kasunga chensah in- eipui, eihil, eilhamon ding le na cha hinkho dia lom mangthem din eipuidih jing hen, tia eihuhhing ka Pakai Jesu naminin kathum’e, Amen.

Hitia chu nataole ‘Amen’ jih in. Pathen in phatthei naboh jing tahen.