Pathen in phatthei naboh jing henlang, Ama cha nahina in na umpi jing tahen. Tuni, ‘Palm Sunday’ tia kihe hi Bible them’a ihet houvin seichom chomin neiyunte. Hinla, keima mudolin vang, JESU LOUPITAH A JERUSALEM A ALUT hin Jesu Leng hiya ahungna, ahungna ding ,chule, Jesu Christa huhhingna thupha jahna avetsah ahi.

Janhia English a kasei bangin, Jesu chu Jerusalem’a Leng in agalut in ahile – mihem honni agamui. Ama sangjousen, phothipmo helin, Pakai vahchoinan a aovuve. Adang konkhat vangin Ama thana ding agonglouve. Ana lem hohi –tulai le khonung dinga jong, Jesu Christa Leng le huhhingpu’a kisan ho ahiuvin. Akisanlouho vang setna lama nasa cheh cheh ding ahiuve. Ama sang jouse phattheina kim, kipana, nunnopna kemtheilou apeh ding; akipanauvin tantih neitalou ding. Pathen thangvah nom jing jeng, Jesu Christa chonset ngaidamna natoh, Jesu Christa mi-Huhhingna thupha sei jong chim taloudiu, ahinkhouva itobang toh jongleur, alhamon diu Lhagao Theng aumin, ima lunggimna le hahsatna neitalou diu ahi.

Jesu’n Jerusalem mipite, anasanga sanga Ama deimo le that nom atamjo amuphat in, Israelte khopi Jerusalem chu ‘aka khumin’ (Luke 19:42-44) vangsetna achandiu aphonkhum in, Jesu thijou kum phabep jouvin, Israel khopi Jerusalem chu, agalteu, namdang hon alatauve. Tuni geiyin, Muslim lenggam ahijing tai. Hiche banga chu, Jesu Christa thu hea sanglou jouse chu tonsot’a dia themmo chang diu ahitai.

Jesu Christa thu hi seiphonga umjing ahi. Imacha hihih jongleng, ei Huhhing ka Pakai Jesu chu ijakai ahi. Nitinin, keima jenga konin jong Ama mihuhhingna thupha hi eithotdohsah jingin, Internet hoahin tampi aumtai. Amanchah mihem sangtampi hon jong, hiche thupha hi nitina aphondoh jingo ahi. Internet a kisei hohi koitobang, vannoipumpi hoilaimun hijongle amuthei ahi. Athuneipa Pakaiyin, anom nom amusah theiya kikoi, uma ahitai. Hitia hi, vannoi pumpia miho koma Kipana Thupha lhungsoh tithei ahitai. Mijousen ajah’u tobang ahitai. Hitia, Jesu Christa thupha lhunna, mihon ajahnau chu, Jerusalem’a ache, alut chuto kibang ahi. Koiham asanga, koiham asanglou. Um cheh ahi.

Thupha Chula najatai, Jesu nakoma Lenga hunga ahitai. Asanga napanle kipanakim nanei ding. Asanglou nahile, athat dia kigo lah a khat nahitai. Achutile, Jesu nachunga kap ding, lunghang ding ahi.

Hoijoh nahi em? Hoijoh nalhen em?

Nasan tah ding kakinem’e. Nasanloulaile – Jesu chu taonan kouvin. Akoma nachonset phongin, ngaidam thumin. Chule, Leng le Huhhingpua nasan thu seiyinlang; nasunga le na hinkhoa Leng hungchang din ngeh in.

Hitia chu nataole ‘Amen’ jih in. Pathen in phatthei naboh jing tahen.