Kipah jing theina dan

Golte, Pathen in phatthei naboh henlang KIPA JINGDAN NAHIL THEM HEN LANG KIPAHJING DIN NAPANPI JING JENG HENUO!

Ka ngailut jalun, thuguh khat avelin seipeh kit’unge. Mitheng Paul in “Kipah jingun, tikitleuvinge, kipah un” tia Philippi 4:4 muna asei hi kaki patepji’n, kipah jingthei din kataoji. Ahile, nikhat nia kasei chu adi penin kamu jinge. Avel in, hin seikit’ing’e.

Kana seisa bangin, Pathen phattheibohna kachan dan hi kavetle, ‘kipaje kahet’a kon ahi’. Hichu, Pathen in kakipa ding anopna ahi. Nitina Pathen in eipeh hohi kasimin, ahilou lam hochu gellouvin, apha kachan ho chacha chu kasimjin ahile ‘kipah loutheilou kahi’ kamujin,Pathen koma taovin ei malsomna hohi abancha simin kipathu kalhut chaimo ji –

 “Pakai, nei vangbohna hohi kamun kipah loutheilou kahi. Hinla, kipaje kathemlou jeh in adding dolin jong nangma kom kalhut jou jipoi, ka lhinlelna hoa neingaidamin. Nei phattheibohna, nei thilbolpeh loupi hohi muchentheidin, kamit hohi tahsa le lhagaovin hatsah inlang, na ngailutna thu hohi hethemthei din tahsa le lhagaovin ka lungthim-ngaitona le khohetna hohi neisemhat peh in; chutile, nachunga kipaje themingting kipah jing tange. Kipana neipeh hohi van kipana, tonsot kipana, Jesu-a kipana chamkim chu sosah in, tia ka Leng le Huhhingpu ka Pakai Jesu Christa mina katao ahi, loupina changjing jengin ka Pakai Jesu, Halleluiyah, Amen”

 Hitia kataonia pat in, nitinin avangbohna kachang jingin, thil-hahsa dep, thu-hahsadep katoteng jongle kaboisot, kagelsotthei jipoi; Pathen thu kalunga ahunglutjin, ka boina le kagelboina hochu “Pakaiyin aphalamin sodohnante, Ama-a kahi chu, Aman kading, Amiteding ahetnah chu, kei ipin kaboipoi; boipipi, gelgel jongleng ipibon kibol theilouding, ka ei huhhing ka Pakai Jesu Christa katahsana hichan Aman eipui, aban jong Amathu kahi” tin Pathen thu kagelkit jitai.

Nitina, Amathu, Website,facebook hoa eisosahji ho jong hi keima mihem hakiboljal hile ‘Absent’ (bollou) kahi jingding ahin, Ama thuthua kakoile, Internet Link umlou tilouvin 2011 apat nikhat jong ‘Absent’ (bollou) in a um khapoi.

Hiche jala hi, “Jesu Christa-a kingaiyin” (Rely on Jesus Christ’ tia kaseisei jingji ahi. Keimatah in kasei jijohi lekhabu hetna akon ahipoi, kato le kathodoh hoa kon ahijoi. Keima hatlou le lhasampenbon hitia eipuiya eiumsahtheile hitiho simtheiya  Internet khoithei jouse hi hitheicheh dia katahsan nahiuve. Eiho bolding hilouva, Pakai Jesu chun Ama Lhagao Theng thahatna-a eibolsah jiu joh ahi.

Chule, Athu kisahlelpi ding hin, Pathen’a kipana umlouvin koiman ajoutheipoi. Amin maimaiya, simdohna akona kisei hohin na atong ngaipoi, bolsot thei jong ahipoi.

Hijehchu, Jesu Christa jala ka golte, tunia pat in kipanin, kipana hinkho mang panin. Tunia ipipi thilpha nachan em gelkhomin, sutoh in; hicheho jouse thilpha nachan jalin Pathen koma kipathu lhut in, taovin. Nahinkho ol ola kikhela kipana nachan jingding, Pathen phattheibohna nitina nachan jingding ahi. Pathen in, Achunga kipahte akipapin, adiuva pha abolpehji. Hichehi, ahetthem jalin, Mitheng Paul in Phillippi 4:4 muna chu “Pakaiya kipah thanom jingun;”  ati ahin, bol-hih khakhante, hethem hih khakhavinte eiti jeh’uva avela aseikit’a “ tikit leuvinge, kipah thanom jingun.” tia

Golte, kaseihi natahsanle, chunga keima taona hi juiyin, phatechan siminlang “Pakai, hiche hi kataonan neisanpeh in, tia ka Leng le Huhhingpu ka Pakai Jesu Christa mina katao ahi, loupina changing jengin ka Pakai Jesu, Halleluiyah Amen” Hitia chu nataole ‘Amen’ jih in. Pathen in panpi jingtan. ( simben < http://jesuahinna.blogspot.in/>)