‘Pathen cha’ tia kikou nahitai, Jesu
Christa min koujingin, Pathen phattheibohna changing jeng uvin. Hatmo kisasa
tah hih in. Ithihchan, noi chepchep ding natiham? Nanu’n, ichanlom noi
nachepsah em? Lhagaova jong, noitui bangbep chepchep din Pakaiyin eidei pouve.
Lhagao Ann jong agum neh ding phat ahitai. Lhagao ann-gum chu ‘Pathen thu
gildom le hahsa dom’ jong sima het gotding, khantouna lam mano ding tina ahi.
Keima hinkhoa kamudolin vang, ipu- ipateuvin
aseiyu “Gol paipeh a kiheng chu eima paipeh a kiheng ahi” tia aseiyu hi, tahsa
thukeu hilouvin Lhagao kalchoina in jong angaikhoh lheh jengin ahi. Keima
dingseh a kataotao sung chun, tijageu le kigingchalelgeu kahin – “Ole, kei
chanpa hi miho chansanga neojo ham O? Ole, lhepna’a kalhuhkit hitam? Alhadah,
anungchon atiu chu kahi jong hitam? Iti miho banga kamachal theilou, kapilhin
theilouham? Ole, atahtah jong hi kamulou, kaphahlou jong ham?” tin kiginmona le
kitahsanlelna kanei jingjin.
Akidange! Miho dia taona, lamkaihon ahinsom’uva
katao tahtah chu, miho malah in keima chu kahung kitahsantan, katao ahung
nomin, kipana thah kaneiyin, khangtouvin kahin kimutai. Hiche nia konin vang
miho, theisun in kataopehji. Internet a, loi le gol’a eihin jop jouse jong hi
jan kalum konle beh taonan kaheji. Nagelset diuvin jong katahsanpoi. Nanghon jong
neitaopeh jiuvo, golte. Eima taona sanga min eitaopehle phattheibohna Pathen in
mi apehdom ding katahsane.
Hijehchun, Ama phattheibohna jouse nachan
jingna din, midang ho taopeh jingjin. Midang, nangsanga hatmo taopeh ding nahet
loule, kei neihintaopehjin.
Chule,
taodan themlouho jong hiljin. Pathen thu’n aseiye –
“Koihile
Pakai chu Amina kouchan huhhinga umding ahi(Romans 10:13).
Jesu Christa hi tonsot hinna Lampi le kotpi
ahi. Taona akona, Ama Lampia chu chea kot achu i-luttheiyu ahi. Chujongle, taona
mama’a kona, Ama chu Leng le Huhhingpu-a ikisan theiyu ahikit’e. Ajehchu, Jesu
Christa, Amatah in, kamina nathum chanu, Pa’n eipeh diu, chule, Aman eibolpeh
diuva jong eiseipeh’u ahi. Hijeh achu, koihile, Jesu Christa kisannom jouse chu
noiya bang hin taohen, chule, nangman nakisan ahitahle, miho hetsah in lang,
hiche taona hi mangchan taosah in :
Pakai Jesu, keima michonse, na-huhhingna
ngaicha kahi. Ka chonset jeh a nathi katahsane. Ka chonset akonin kakiheimang
nome. Tuhin ka lungsung le kahinkhoa hung lengchangin tia kangeh nahi. Nangma tahsana
juiding le ka Leng le Huhhingpu din kakipom nome. Neipanpin, ei Huhhing ka
Pakai Jesu minin, Amen.
Hitia chu nataova, chule, mijong taodia
hilding nanople, Pakai hetsahnan ‘Amen’ jih in. Pathen in phatthei naboh jing
tahen.
No comments:
Post a Comment