NAHINKHOA JESU LENG HUNGNAM

Jing nikho hi Jesu loupitah a Jerusalema alutni ahi(Luke 19:28-44). Nang hinkho’ala Lenga hungnam? Ahungtahle, kipah aume. Aphattheina kisanna din taovin.

 Ahung loulaile, tuhin taovin, kouvin

“Pakai, keima hinkhoa jong hin Leng in hungin, keiya hin Leng hunghin, nacha kahi, nalhatdamsa kahi-kahinkho hi nakhut a kakoiye. Nadeibangin neipuiyin, Jesu minin, Amen”

tin taotao jengin. Chuteng, Ama nasunga hungcheng intin, phattheina simjoulou napeh ding ahi. Chuteng, nahinkhoa kipajoulouna, lolhin joulouna, natna le hahsatnaa ho jouse napailhahpeh ding – kineplelna chu kinepna nasopeh ding, lhahsamna jouse chu lolhinna nasopeh ding ahi. Kichat-tijat, lungdon-lunggimna le genthei-hahsatna nanei jouse jong phattheichanna naso peh ding ahi. Ama ngaidamna nachan loulai jongle, ngaidam thumin – midangin nangaidam louna, nachunga lunghang mi aum jongle Pakai Jesu’n nangaidamle midangho jong nangaidamsah jeng ding ahi. Kichat jeh, jachat jeh hama  hinkho nommotah a naman jeng jongle, Pathen koma namona jouse phonginlang, Jesu Christa minin ngaidam thumin lang. Pathen in nangaidamle, nachunga lunghang hojong nangaidamsah jengding ahi. Ajehchu, Ama thiljouse sempa le mihem jouse sempa ahin, milungthim jouse kheldoh theiya jong ahi. Mihon jong nangaidamna diuvin, alungthimu khelpeh din jong thumin.

Golte, Jerusalem’a alut chun, mipi, kipana neiho chun “Hossana, Pakai mina hungpa chu nunnom hen!” tin asamsam jengui. Pharisees hon phothip ding anop vangun, koima phothip hoi ahilou chu Jesu’n aseiye “Ama hohi thipleu song hobeh aodoh diu ahi” ati. Jesu Christa Leng le Huhhingpu’a kisana, Pathen in Lhagao Theng apehho chu –kipana dimset’uva, akipanauvin tantih neitalouding, kipah’a, Jesu Christa mi-huhhingna thupha hi tanglouva seisei jeng diu, kipah’a Pakai vahchoi jing jeng diu, koiman aphothip thei louding ahi. Hinkho sunga ipi toh jongleur kipah jing jeng ding ahiuve. Nang jong hitia chu na umding kakinem in, kataona jong ahi. Nahi loulaile, chunga kisei bang hin taovin- jing tengle Jesu Lenga nahinkhoa ahung teina din tuhin taovin. Akisansa nahitahle, kipathu lhutnan, taovin; chule, kipana kim, kipana tanglouva Athupha sei jing thei ding le Ama vahchoi jingthei nahina din, na panpi jing din Lhagao Theng thumin taovin.

Pathen in Achapa Jesu Christa minin, Lhagao Theng in umpi jingtan.