Pathen lungdeiya tao

Pathen in phatthei naboh henlang, nangaichat jouse nape jing jeng henuo! Hiche nading chun Athu simjingin, Ama lungdeiyin tao jingin. Pathen, ‘Lhagao Theng’, chu “eipui, eihil, eilhamon” diuva, Jesu’n Ama tahsan jouse eiteppeh’u ahi; chule Aman eihilnauva Bible hi amanchahji ahi. Bible isim jingnau le taojom jingna akona Christa chu eihoa hi hung kicheh cheh cheh a, lolhinna kinei ding ahi tihi Pathenthu’n eihilnau ahi. Bible in :

“Pathen kom ibelnauva lungngamna ineinau chu: Ama lungdei dungjuiya ithumule, itaonau angailhaji. Chule, i-taonau angailhahji ihet-ule, ithumjouseu imusau ahi ti iheuva.” — 1 John 5:14-15.

Hichea, “Ama lungdei dungjuiya ithumule” atihi ipiham? Pathen lungdei chu ipiham? Pathen lungdei chu, ahinsol Achapa Jesu Christa itahsan diu chu ahi. Jesu’n leiset adalhah jouva, Ama khela ‘kithopi ding’ ahinsol dia atep chu ‘Lhagao Theng’ ahi. ‘Lhagao Theng’ chu ‘Pathen thahat’ ahi. Hijeh achu, ‘Lhagao Theng’ chu Pathen koma ithumdiu chu ‘Pa lungdei’ chu ahi.

Amasapena, Pathen le Ahinsol Jesu Christa tahsanna ‘Leng le Huhhingpu’a kisan ding, chuteng, A thahat- thilboltheina –ei umpi, eihil,eilhamon, eikaihoi jing diuva euteppeh’u, Lhagao Theng chu thum ding ahi. Hichu, “Ama lungdei dungjuiya ithumule” atichu ahi. Hitia chu, Pathen Lhagao Theng chu isunguva achentengle, ingaichat jouseu eipeh jiu ahi.

2011 chun kana seitai. ‘Lhagao Theng’ hi Mobile SIM tobang ahi. Mobile chu naneitai. Hinla, min nahouna dinga chu SIM um ngai ahi. Pathen in nahouna dinga chu Pathen houtheina Pathen SIM ( hichu ‘Lhagao Theng’) ngai ahi. Pathen koma nataovin, Aman nahinhou kit nomtai. Hinla, Ama SIM (Lhagao Theng) chu nanga aumloule na houtheilou ding ahi.

Jesu’n, “Keima Pa henga taovingting, Aman nang ho umpi jingding,Lhamonsah, achomdang khat napeh diu ahi. Hichu, Lhgao dihtah ahi….” (John 14:16-17).

Hijeh achu, Jesu koma itaovuva, Lhagao Theng chu ithum diu ahi. Hichu, Pathen lungdei ahin. Lhagao theng ithumtengule, Pathen lungdeiya thum ihjiu ahin, chutengle ithumhou eipeh diu ahi. Hichu, “Ama lungdei dungjuiya ithumule, itaonau angailhaji” tia asei chu ahi.

Pathen in Athubua asei le miho kama aseijouse hi tahsan’utin, akitepna jouse jong chang dingin tahsan’ut. I-Pakaiyu Jesu Christa’n “atahsan din ijakai ahitheiye” atichu sumilpoute. Na chonset ngaidam thei pa chun, nitina nasuhkhel le lhinlelna jouse jong angaidam theiyin, chule, nangaichat jouse jong napetheiye ti hejingin.

‘Tahsan’ kiti hi thupitah ahin, ‘ginchatlelna bei’ ahi, chule, ‘apaumpia kingai, kingaplhah jengna’ asosah ahi.Hinla, keima mudolin vang ‘tahsan’ jong hi Pathen Lhagao Theng panpi louvin, koiman tahsandet aneitheipoi. Pakaiyin eipanpile bou tahsan jong hi kineithei ahi. Panpi jing dia eiteppeh’u Lhagao Theng chu nitin in ngeh jingute.