PATHEN IN NA UMPI KIHET IN

Pathen in naumpi jing he’nlang, lungmong tahle kipah tah in umin. Nang jong Ama koma um nahi hejingin. Chutile, ima lungkhamna nei ponate. Sum naneiyin, na sakhaovin nakoije. Hinla, na sumnei chu hehih lechun, sum ngaikhohtenna mun le mannading phat in jong nasumnei hetahih lechun, nasumnei chu ipi phachom ding ham?

Jesu Christa tahsanna Leng le Huhhingpua kisan jouse chu Lhagao Theng in aumpi jing ahi tichu Pathenthu Bible in asei, Jesu Christa kamsung tah a jong i-het’u ahi. Jesu’n, “Keiya um jingun, Kei jong nanghoa uminge…” ati (John 15:4) Chule, Jesu maman aseiye, “Keima Pa henga taovingting, Aman nang ho umpi jing ding Lhamonsah achom dangkhat napeh diu ahi. Hichu, Lhagao dihtah ahi; vannoiyin Ama chu asangtheipouve. Ajehchu, Ama chu mujong amupouvin, hejong ahepouve. Nanghon vang naheuve, ajeh chu, Ama (Lhagao Theng) nangho sunga chenga ahi.” ( John 14:16-17)

Hinla, mitamtah hin Pathen in Lhagao Theng’a achenpi ahi akihetlou jeh in, lungmonna aneitheipoi. Chule, kei jong, Pathen Lhagao Theng in eichenpi ahi kahet masang chun kanop nop’a umthei din kagel in, chutia ka umji chu atamjo ahiji. Pakaiyin Lhagao Theng’a ei umpi jing ahi, kamu jouse amu, kasei jouse ajah, kabol jouse ahet, kagel jouse jong ahet ahi kahetchet phat in ka nom um thei tapoi!

Hijeh chun, eiho lah a kigihsalna le kiphona, hakibola phat ding, thilpha bola mipha hiding tia kihilna hi, koiman achangin ajou theipoi! Hitia chu seiye, hila min angaideh lou, koima aphatdehlou tengle, aseipa, mihilpa tah chu ahung thase ngal in, seikit nomtalou “Iti akihil in aphachompoi!” iti jiu ahi.

Golte, kihildan hi uma ahi. Pathen Lhagao Theng, Jesu’n eiteppeh’u hin eimpi tokahseu koima aphan aumtheipoi. Chule, Jesu Christa tahsanna, Leng le Huhhingpua neisa nahitahle Lhagao Theng in na umpi ahitai. Hinla, na umpi chu nakihet loule nang dia phachom tahlou maithei ahi nalaiye.

Hijeh achun Pathen Lhagao Theng in ei umpiu, isunguva chang hi kihet ding ahi. Na sunga Pathen achenle adang nahol nahlai ham? Ama chu houvin, dong jingin, kihoupi jingin. Ipi nabol ding, iti nachonding, taonan dong jingin Ama a kingaiyin! Nasunga Pathen chenga chun – namumu amu, najah jah ajah, nagel gel ahet, nabolbol amu- hitiho chu nakihetchet nia pat in, koima seihat le gihsal ngailouvin, nahinkho chu kikhel dom dom tante. Mihem hatmo vang hi kikheldoh vah vang phatsot dom ngaiyinte. Hinla, kikhel jinga, akhonnile Jesu Christa tobang ihung hi diu kinep aume.

Hitia chu, Pathen in na umpi nahetle Pathen thangvah in. Nahetchet loulaile, Jesu koma taovin “Pakai, nasei bang in Pa koma chun nei taopeh inlang, Pa chun Lhagao Theng chu kasungahin hinchensah jing jeng din kataove. Chutile, nangma mitmua pha le keima dia phapen hinkho chu, nacha deitah hinkho Lhagao Theng in eimansah ding ahi. Ei Huhhingpu Jesu Christa naminin kataove, Amen” tin.