LHAGAOVIN DIMSET IN

Pathen in phattheina kemlou nape henlang “Lhagao Theng dimset hinkho” namansah henuo!

Keivang, Missionary Solchah chapa, theisuna houva kipe, ‘Mipha’ kana kihisah kah in, ‘Ju’ kana donin. Politics a lhaikhompi hoto kivopna a bou don katikah in, ‘judonlouva ummo’ kana hideltai. Kahai kagotle, katahsan ajoutapoi! “Ahilou kahitai. Kadonda sehle, kithingin ka umbep e, jachat sangin, mihetbehsehlou, khamlouvin, Kathichan don tange. Pakaiyin, katahsan le Ama a kakingai ahenai. Ka lhagao beh sochatsahnante” tin nom tah in kadon jing jengtai.

Pakaiyin, eingailut jal in, kachejom anomtapoi! Bible chang, Ephesians 5:18 “Jukham bol hih un, hiachun, avala umna asohji; chusangin, Lhagaovin dimset jouvin” tikhu kalungsunga aum um jeng tai.

2008 October lam hin kadammon, taodam khat in eitaopeh in kadamtai. Kadam jou lha ijat ham jouvin kadon kittai. 2009 kum kimlah in kadammo kittai. Taonan kadam kittai. Kumlhunlam in kadonkittai. 2010 kumbul in, kadammon, kalhutai. Aboiya chu kahi tai. April lha bullah chun, taona mama akonin, kahung ol tai. Kidangtah in, mu le jah kaneijin; aboi cheichoiyin, ajonanvang Pakai Jesu keima kamtah a kakou kou jeng phat in ‘damnakim’ – tahsa le Lhagao damna ei petai! Loupina Pakai chang tahen. Hiche jou jong chun, vahdoh theiyin eikoipoi. Bible kasim le taona Kaman bou chu olna ahi. September kichai lamin Holy Bible kasim chaiyin, New Testament vang avela kasim ahitai. Kisuhhalna programme thuseina a chomcha, keima Pakaiyin ei dam sahdan kaseile, mijouse akipah lheh jengui. Keivang akipah pen kahitai.

Hitichun, Internet hoa Bible Course tampi kahin simin, lhumlam gama thusei minthang ho le website hoa Pathen thusei hoto kikhutjop in, ‘Internet Evangelism’ course ho jop in, Internet a Pathen thu lhangsapna din eikaihoi jingun., Kumni kabol jing chu eive jingun, ningkum October chun ‘Kumni val’ Course kachai jou le practical  katoh nungin – “Na lolhingtai” tin jona le “Internet Evangelism” natohna lhingset chu eipetauve.

Hichan eihin phahsah a, Ju donlih dia kigopa, keibon, pakaiyin, hichan eihinpuile, nang i-nahim? Pathen cha nahi Chula em? Pakaiyin, na ngailut ahi kihet in. Nang judonlou, hitia Internet vethei nahile, don jong lechun keibanga don nahipoi!

Pakai kouvin, belin “Pakai, Lhagao dimset hinkho chu nei mansah in” tin taovin. Pakaiyin, nahinkhoa thil loupi abolding ahi.

Kasei nompen chu – mihem phatna le kihabolna hi asotpoi! Hiche hi, Jesu Christa a hinna le Pathen anga sochatna ahipoi. Mihem hi i-hatnau le kisonna jouse abeiya, thidinga i-kipeh tahlebou Pakaiyin pan ahinlah ji ahi. Eima i-ha kibola phat ding, tohphat ding iti sung chu, Pakaiyin, “Boi, nangin boltan” tia aman pan alahjilou ahi. Athidia ikikoi tah a, chule, “Pakai,neipanhu loule, abeiya kahitai!” tia akhut a ikilhandoh jengtengle, Pakai Jesu’n Amina koute, Amin koute chu adonda ngaipoi!

Jesu’n Lhagao Theng’a eichenpi tengule bou ol ola eipuiyuva, Lhagao dimset hinkho mantheina lama eipui diu ahi. Eimoh-no pouve ti jong kamui. Eihon iti tun tun-hou jong hi, ase ahilou nah nahle eibolpeh jeng jiu ahi, tu kumthum sunga hin kamun ahi.Hinla, itihle, “Lhagao Theng dimset hinkho” chu eimansah dem kahepoi, Ama khut in kakoiyin, kathum jinge. Hoi hijongle, i-chan eiphahsah nom em, Ama thuthu hi jeng hen, Aman ei umpi jingle kalung amongin, kakipah jenge.

Nitina phat ongkom koiya, Bible thua kisahlel le taona phat man jing hi, keima mudola phachompen ahi. Nang jong chuti bollechun keisanga naphah sauding katahsane.

Hitia chu boldia pan nalah dingle, Pakai kom lhutna ‘Amen’ jih in. Pathen in phatthei naboh tahen.