Wednesday, 13 May 2015

PATHEN LENGGAM SUHLINGHOI AHIPOI


“Hat-chungnungPathenin Athuchenga  atuhchah jeh-a Alenggam chu longlou ding ahi”    (Psa. 33:6-9; Heb. 1:2-4)

         Genesis bung 1 sunga hin Pathenin van le leiset chule chung le noiya umding thil ijakai abonchan asem thu imuve. Chule, Pathen in thil asemdan ki ‘thu’ aseiya hung umdoh doh jeng ahibouve. Athilsem tamjo hi akhut a thil alahkhoma asem ahipoi. Athuseiya kona, aumlou thil hochu, aumlouva kona hung umdoh ahibouve. Hijehchun, Pathen hi ‘aumlouva kona thiljouse umsahpa (sempa) ahi.

Chubanin,  Athilsem hohin Pathen loupina le kidanje aphong doh cheh in ahi. Vannoi leiset pumpi hi Ama sem ahin chule thildang jouse jong Aman athutah-a asem cheh ahi. Asem jengin anganse pon athilsem jouse hi ahina dingdol cheh-in akoitoh sohkeiye. Athilsem hohi akhut’a akoitoh hilouvin athucheng seidoh-a kona akoitoh ahi ti iheuve. Hiche thuhi keima sei hilouva, Pathen thu Bible in asei ahijoi.

 “Pakai thuseiya konin vannoi akisemdoh-in, Athupeh-a konin thil ijakai aumdoh tai”              (Psa. 33:9).

Leiset miten science lama thepna ahin neisang domdomun ahile, mihem chihna le hetna neihon jong datmo umtah tah thil ahin semdoh jing tauve. Vanthamjol’a lengle thei thil kidangtah tah jong asemdoh tauve. Hinla datmo umtah tah thil kidang itobang semdoh jongleu “thu-a” asemdoh’u khatcha beh aumpoi.Chule, asemsa hou jong atuhchah thei khatcha jong aumpoi. Tuhchah malah in, meithal le meilou, bomb le adang tampi jong hi, atuhchah theilou jeh un mihem dia aphatchom sangin, mihem tampi thina le gentheina ahidoh jojitai. Asempan athilsem chunga thaneina aneiji tapoi.
Pathen in vang asem jouse chunga thu aneiyin, athun anunsah cheh e. Ajehchu,
 “... ama jal’a thil ijakai, van’a hihen leiset chunga hijongle, muthei le mumoho, ... thil ijakai hi Ama toh akijopmat teng dingdet ahiuve,” (Col. 1:15-17).

Pakai Jesu’n ana seiye, “van le lei mang ding ahi, Pathen thu vang chengkhat jong manglouding ahi” ati.
Pathen in athua asemdoh hohi, athua achintup ahijeh in, athu amanlou banga, aman atundoh ‘Alenggam’ (Pathen Lenggam’ jng mang louding ahi.
         Mihem thaneina le vaihomna leiset lenggam ho vang mihem thaneina mai maiya kitungdoh ahijeh-in chomlou kah-in akem’in amang jitai. Lenggam thanei tah tah Pathen thu Bible’a tampi imuve. Vetsahnan Babylon lenggam, Medo-Persia lenggam, Greek lenggam chule Rome lenggam. Hiche lenggam’a thunei vaihom leng le lal hohin avaihomnau lenggam hi longthei mai mai le kemmang thei dingin tahsanna neipou vinte. Hinla Longlou Lenggam ahilou jeh-in chomlou kah-in hitobang lom’a lenggam thahat tah tah chu amangsoh heltai.

     Leiset lenggam thupitah le minthang chule loupitah tah ho ibol’a mangthahji ham ? Pathenin vaihom thunei dinga atun lenghon lenggam chunga thuneina le vaihomna apepa Pathen asuhmil tengule lenggam lhu-a mangthahji ahi. Hitobang hin Babylon lengpa Belshazzar in jong van Pathen hatchungnung doumah abol’a kiletsah le hoitho tah-a hinkho aman phat’in alenggam loupi le minthang tah chu achan tan ahi. “Belshazzar ahung kiletsah-a lungtah le gitlou atho phat’in alaltouna konin akiloilhan minoisen aumdoh tai,” (Daniel 5:20).
Nang jong Christa tahsana kisansa nahitah-le, Pathen Lenggammi nahitai. Hiche, nanga um ‘Chhrista Lenggam’ jong chu manglou ding ahi.
Hijehchun, nitin le phattinin na sempa lungdeiyin um jingin.


No comments:

Post a Comment