CHRISTA TAHSAN DIN KINEMLEL DING A UMPOI

 Vangsetna natoa kinepna beiya lungna-tah a naumthei ahi. Hinla, nadinga pha Pathen in nagonpeh ahi kihet in. Hiche thilpha chu namuna din Pakai belin, na gelphahlou thil loupitah nachansah thei ahi.

Naomi hinkho chu geldoh in. Aji le achaneisun teni athitai. Kinepna him him aneitapoi. Alunggel asegamtan, aphun phun jengtai. “Imacha kaneitapoi! Insungmi, inko jong neilou kahitai ! Vangsetna kijet, avangsepen kahitai, akeohel kahitai. Pathen in ei bolset’a keima douna’a na atoh ahitai !” ati. Amin ngeitah Naomi ( mikipah) kiti jong chu adihlouvin aseiyin, “Naomi neiti tahih un Mara (akha, mivangsenu) neitijo tauvin” (Ruth 1:19-21) ati.

Hinla, akeohel le avangsepen, imacha neilou le kinepna ding neilouva kigelnu Naomi chu Mou phapen nei ahin, insungmi jong neitalouva kigelnu chu inko phatah nei ahijoi. Amou Orpah in dalha jongle Ruth vang chun atehpinu Naomi chu angailu behseh in adalhapoi. Naomi jipa inkopa Boaz chu mihaotah le Pathen gingtah ahi. Boaz chun Ruth chu akichenpin, cha pasal khat anei lhonin, amin Obed asah taove. Obed chu Israel leng lenpen David-pa ahin, David chu vannoiya leng chingpen Solomon-pa ahin, chule David guiya hi vannoi huhhingpu Jesu Christa hung penga ahi.

Naomi min hi koiman sumilta ponte. Huhhingpu Jesu Christa pennabulpi khat ahitai. Avangsepenna kigelnu chu avangphapen ahitai. Pathen thilgon hi nga-hat ngaiya ahi.

Amounu’n cha pasal Obed anei chun akipah behseh jengin “Vetauvin, kahinkhoa ipi soh a hitam. Pathen in thil jouse hi keima ding le Amite phatna dinga agon kijet ahi. Meithai vangsetah a kakigela, keima douna’a natong hija kagelnung in jong hitobang loupi hi eigonpeh jing ahi” atitai.

Vangse le kinepna beiyin kigel jong lechun Pathen nabela, Achapa Jesu Christa hi Pakai le Huhhingpua nakisanle, ijakai nadinga phalama atohdoh jeng ding ahi. Bible in aseiye, “Thil ijakaiya Pathenin Ama ngailua alunggot bangtah a kikou ho phatna dia na atohkhom iheuve.”(Rome 8:28)

Pathen lungdeipen chu Ama Pathen-tah khatseh ahi tahsana, Achapa Jesu Christa hi Pakai le Huhhingpu dia kisan hi ahi.

Nakisan loulaile tuhin, taovin Jesu chu kouvin, na Pakai le Huhhingpu hung hija, nahinkho Ama deilama puidin temin.

 Akisansa nahitah-le, tua bangmai hilouva Lhagao Theng a napui jinga tahsanna le natohna’a nakhantousah ding le Ama manchah a napansahna din taovin.

Nitinin Bible sim jingin, chule, taojing jengin.

Pathen in phattheina tincheng napejing tahen.