PAKAI HI PATHENNA NEI NAMMITE ANUNNOM AHIUVE

“ A-Pathen’u Pakai hikha nam mite chu anun nom ahiuvin, Pakaiyin agoulo dia alhendoh mite chu anomuve -anunomuve!”( Psalm 33:12)

Pakai hi amin kidangtah ahi. Amin hi ‘KEIMA’ ( I AM) ahi (Exo.3:14)

Pakai Jesu’n “Abraham masangin ‘KEI’ kana umtai” ati (John 8:58)

Bible in aseiye, “ Jesu Christa chu tuni, janhi, chule tonsot geiyin abang chu ahijinge.” (Hebrew 13:8)

John 1:1 nahin Jesu chu ‘semtila umsa’n aseiye. Jesu’n mundanga aseina achun “KEIMA akipatna le ajona kahi” ati (Revelation 1:1 & 1;8 & 19:6)

Amin kidang ‘KEIMA’ (IAM) le ‘TONSOT PAKAI’ chu anasel ahin Khonunga hung kiphongdoh ‘Jesu’ chu ahi.

Pathen in chonset’a kona mijouse Huhhingna ding agon thu guilhunna di Israel NAM chu ana lheng in, Ama chonphatna hetna din dan apen ahi. Hinla, Amahon hichu kisonpinan aneiyun, juila ajuikim thei deh pouve.  Jesu’n “Vo Gulse son ho, Song hoa kona hi Pathenin Abraham chate a sodoh sahthei ahi”( Matthew 3: 7-9) tin ana houset lotai.

Anam kipumkhatnau jong kikhenin “Israel’ le ‘Judate’ tin akikhenun, khonungin Judate thubou aha kiseitai. Ajehchu, hatmou hen lang, Pathen lung toh hih jongleu, kidih jingjeng Pakai chun Abraham koma akitepna abulhinsah thou thouve. Hichu, Vannoi Huhhingpu ‘Messiah’, Jesu hungpen chu ahitai. Jesu chu Juda nam sunga nungah theng Mary sunga ahung pengtai. Hinla, Judate chun Jesu chu ana sangpouve. Thingpela akhenbehsah jotauve. Hinla, nithumnin Jesu chu loupe tah in Pa Pathen in thina akonin akaithoukit in, TONSOT PAKAI (Christa) ahi’na in Pa jetlama atou tai. Pa’n Chapa Jesu Christa chu lei le van le asunga ijakai chunga thuneina apedoh tai. Hiche thananeina achun Ama tahsan jousen atahsanlou ho Huhhingna thupha hi seipeh’uva akisan diuva einganseu ahitai (Matthew 28:16-20).

Hiche thoukit Pakai, Jesus Christa Solchah John in “akithatsa kelngoinou” (Rev. 5:6 ) tia asei chu ‘chonset thoidamna ahitai. Ajeh chu Pathen thutep ijat hijeng jongle Amaa chu ahinna chu uma ahi. (Isaiah 53: 7 cf Zech. 4:10 2Corinth 1:20)

Jesu Christa kisan jouse chu Pathen in athemmona jouseu angaidama, themchannna apeh a tonsot hinna achansah ahitai (John 3:16-17) Atahsanlou jouse vang chu tonsot a themmo changing ahitauve (John 3:18).

Hijehchun,Israelte koma ‘KEIMA’ tia amije ana kiphonglou chu ‘Mihem’ a ahungpengin, thi in athoukit in min thah kidang ‘HUHHINGPU’ ahung hin CHRISTA TONSOT PAKAI ahitai.

Hiche minkidang tahsan jouse chun tua leiset hinlai sunga jong hi HINNOPNA aneiyuva, leiset hinkho kichai nung jongle ‘tonsot geiya Pakai Christa to lengvai a-pohkhom diu ahitai.

Nang jong, hiche tonsot hinna chu nachan ahitah-le, naheng nakom le midang akisanlouho seipeh in, hinpuilut in. Hichena ding chun, nitinin Bible siminlang, tao jing jengin.

Pathen in umpi jingtan.

(14 Sept. KISUHHALNA PROGRAMME, Songpijang Christian Church a ka Thusei: L.K.Hengna)