Sunday, 31 May 2015

NOTI LE GUCHA-MICHOM HO VAN-GAM ALUT JO TAUVE


Jesun ajah-uvah, “Tahbeh a kaseipeh nahiuve, nang ho sangin kaidong ho le noti ho Pathen Lenggama alutmasajo tauve. Ijeh-inem itile John chun adih a hinje lampi nahil’u ahitan, natahsan pouve; hichea hin kaidong ho le noti hon anatahsan’ui. Ama namutah vangun lungheiyin natahsan deh pouve. (Matthew 21:31b-32)
Pathen lungdeiya um kisah jalin, houthu le thilpha bolna kisalel, mipha tampi hohin, “tahsan vanga huhhinga umding” sanga chonphatnan holjo in aumun, Pathen Lenggam achanda theiyuve.
Hicheho sang hin, miphalou tampi hin chonse ahi akihetjon, Pathen tahsanna le kisih puma taona hi anei nom jiuve. Hitia chu guhthima Pathen koma kisih a ngaidam ana kithumthum nalamun, Pathen ngaidamna changing, Pathen Lenggam (le van-gam) hi alutbaijo ji tauve. Ajehchu, Pathen in hitia ‘chonset kiheta, kisih a, tahsana pathen kom bel ding adei pipen ahi. Chule, Pathen thusei hohi adih le ahiteitei dinga tahsan ding ahi. Jesu tahsan jala Pathen ngaidamna chan ding ahi jong natahsan ngaiya ahi. Tahsan hi athupipen ahi. Bible in aseiye :

Ama-ni’n,“Pakai Jesu tahsan lechun nang le na-insungmi huhhinga na umdiu ahi,”ati. (Acts 16:31)
Jesu tahsan angai khohtene. Ajehchu, aman aseisa ahi -
Jesu’n ajah a, “Keima hi Lampi le Atah chule Hinna chu kahi, Keiya chelou chu koima Pa kom alhung theipoi.” (John 14:6)
Itobang dinmunin ding jong lechun, tahsanin jesu kouvin belin, kisanin. Aman nachonset jouse na ngaidam ding; chonsettha-hatna jouse chu najopeh a ‘hinkho thah’ na mansah ding ahi.

Pathen in panpi jingtan.

No comments:

Post a Comment