Lung Heiyin Hinna Kisanin

Christa thupha hi mijouse ding ahi. Baptist John le Pakai Jesu thusei patna pen chu “Lungheina neiya Pathen Lenggam kisan ding” anhi. Tuni geiya jong hichu hijing ahi. Amani thusei pat chu :  

 “Lung heiyun, Pathen Lenggam anaitai” (Matthew 3:2)tin akipan lhonin ahi.

“Lunghei” hi English in “Repent” akiti. Hichu, “lung geldan khel” tina mai ahilouva, “Dinmun khel doh”, “umna mun chon, nunlui dihlou paidoh a nunthah apha a kheldoh” atina jong ahi.

Lunghei, “Lung geldan kheldoh” na dingin ‘Kisih’ le “lungdon” angaiye. “lungdon” jong hi “Pathen deilam” ahi angaiye. Hibou chun ‘Lungheina’ asodohji.

Chule, ‘Lunghei’ jong hi jatni aum kit e.  Bible in aseiye :

 “Pathen deiya ‘lunghem’ (lungdon) chun  ‘lungheina’ asojin, ‘lungheina’ chun ‘huhhingna’ asodoh jin ahi;

 leiset thudol’a (vannoi deiya) lung gim (lungdon) nan vang thina asodohji ahibouve.” (2 Corinth 7:10)

1.     Mi khat chun, anunchan phalouva chu hahsatna tahbeh atolo tengle, kisih’a, lung aheiya, dinmun kheldohna dinga-la, aman hatna aneilou akihet tengle; adinna mun chu akheldoh a, Pakai koma taoji ahi. Chutengle, Pakaiyin ataona asanpeh a, nunlui chu apaidoh theiya, Christa’a nunthah (hinkho thah) chu aneidohji ahi.

2.     Hinla, mi konkhat in, “lungdonna’ atotengle Pathen bellouvin, engset a hakibolna anei chehji. Judon ham chun, ajudon jeh a natna atole, Pathen bel sangin, ahadon cheh in, athipilo jitai. Konkhat in, anunchan phatlou jeh a hahsatna, lungdonna atotengle, kitha lung apuji.

1na”  hi “Pathen deiya lungdon” ahin, “lungheina” aso-in, “Lungheina” chun Pathen bela Huhhingna, tahsa le lhagao damna le hinna, tonsot- hinna asodohji.

Hitobang hi Leng David, Job, Chapa vahmangpa, Songkul ngahpa, St.Augustine, Martin Luther, le adang tampi ahi.

Kei jong chutobang chu kahi. Nang jong nahi ding kakineme.

A 2na”  vang hi “vannoi le agiloupa deiya”  “Lungdonna nei” ahin. Hitobang chun thina, ama le ama kithana (suicide) asodoh ji. Hichu, tua le tonsot geiya thina ahi. Hitobang bol hochu, Juda Iscariot le adang tampi aumin. Tuni geiyin jong aum jinge.

Lungheina dihtah neiyin, na Ngailupen Pakai Jesu Christa hi taonan kouvin, kisanin. Aman napanpi jing ding ahi.

Pathen in na umpi jingtan.