Bailama Pathen Panpina Chandan John Asei

Mitamtah in hahsatah a Pathen kimuding, Ngaidamna chanding ham tin akigimbol’un, Solchah John in, Pathen hi bailet’a kimu dan eihiluve.

John hi  Pakai Jesu Seijuite lah a kidangtah khat ahin,Jesu’n angailut chombeh ahi kihetthempa ahijalin, Gospel asutna ahin Ama hi ‘A Ngailut John’ akiti hel e.

Pakai hin angailut chom a kihetmi hiding hi Christian jouse tup ding ahi. John in Pakai ngailut ahetjeh in ‘Pakai Op’ in abeh jinge jong akiti. Hichu, nang le kei jong ihi diu Pakaiyin eideiyu ahi. Hijeh achu, “Keiya umjingun, Kei jong nanghoa um jinging e” (John 15:4).

Seijui John hi Seijui dang ho sanga akidanna khat chu, Seijui dang ho (Juda Inscariot tilouse) Martyre in athi taove. John vang hi atha theilouvu ahin, ateh-thi thoa ahi. Chule, Ama hi Seijui ho lah a New Testament  sun(jih) tampen le akhumkhah a pang ahi. Ama sut hochu – Kipana Thupha John; 1,2,3 John le Thuphon (Revelation) ahi.

Pakai Seijui ahina hi aseiyin : “kajahsau, keihon mit’a kamusau, chule khut’a kathamsau” ati. ( 1 John 1:1) Hinla, Pakai Seijui ahina chu kisonpinan aneipon, Houbung Upa ahina joh hi aseiji. Chule, Huhhingpu Jesu Seijui le Golpa ahi jeng vang in ‘michonse’ akihisah in, “Eiho chonset neilouva ikisei vangule, eiho le eiho kilhem lhaa, thutah chu isunguva um lou ahi.” (1 John 1:8)
 

Pathen Ngaidamna Thupha Jesu Christa a hung kiphong, John in aseiye :

“Hiche hi semtil’a umsa, kajahsau, keihon mit’a kamusau, chule khu-t’a kathamsau chuche hinna thudol chu ahin,hiche hinna chu ahung kilangdoh tan, chuche tonsot hinna, Pa koma um jingsa, keiho henga hung kilangdoh chu vechen’a, hettohsah a, nahenguva ka-phondohu ahi. Keiho to ikiloikhom theina diuva kamusau le kajahsau chu nahenguva kaphondoh-u ahi. Keiho ki-loikhomna hi Pa le achapa Jesu Christa to kiloikhomna ahi. Kakipa nau acha-mkimsohna dinga hicheng hi kahinsut ahi.” (1 John 1:1-4)

Hiche ahin, John in Kipana Thupha umdol ahetchet mongmong nahetai. Hichu, aseibe kit in :

“Pathen hi khovah ahiye, ama-sunga muthim aum louhel hi kei hon amaa kona kajah-uva, naheng-uva kaphondoh-u thu kithot chu ahi.
Eiho amato kiloikhom’a kiseiya muthim sunga ivale vangule, jousei ihiuvin, thutah dungjuiya na tong lou ihiuve.
Ama khovah sunga aum banga, eiho jong khovah sunga ivale vangule, eiho khat le khat kiloikhomna nei ihiuvin, acha-pa Jesu thisanin chonsetna cheng-sea kona eisop thengsoh-u ahi.” (John 15:5-7)

Mitamtah in hahsatah a Pathen kimuding, Ngaidamna chanding ham tin akigimbol’un, anei-agou tampi asengun; thohgim genthei athoh un, natoh hasatahtah atongjiuve. Hinla, hitia abol nauva chu hahsatna atotengule lunghanna, lhasetna le thasetna akimudoh un, Pathen kimu louvin, manthahna in alhungjiu tauve.

Hitia chu Pathen muding ahipoi. Pathen hi thiljouse sempa le neipa ahi. Nangman natohpeh ngaicha ahipoi. Akom najot ding bou adei ahi. Ama nakimu kicheh tahtah tengle napha natohsah ding ahitai. Hichu, nang hatna le naneijal, na hitheijal hilouva Aman napanpia natoh theiding ahitai.

Amavang, Chang 5-7 sunga aseibanga, Pathen kamutai, Jesu kaneitai tia ga-neilou, natohpha le nunchanpha, chonnapha neitheideh loulaile chu amuloulai (muthima umnalai) hithei ahi. Pathen in achenpilou kihetna ahi. Ajehchu, Jesu’n “Keiya umjingun, keijong nanghoa um jinginge, mi Keiya umchu hagan agaji” (John 15:4-5) ati ahi.

Ahile, Pathen hi iti kimu ding ham?

“ Eiho chonset neilouva ikisei vangule, eiho le eiho kilhem lhaa, thutah chu isunguva um lou ahi.
Eihon ichonsetna jouseu iphondoh vangule, ichonsetna jouse ngaidam ding le then louna jousea kona eisutheng diuva, ama chu tahsan umtah le dihtah ahi.
Eiho chonse louva ikiseiyule, ama chu ijoubol’-uva, athu eiho sunga umlou ahi.” (John 15:8-10)

Hiche ahin kichentah in imutauve. Pathen kimuna dinga chu :

Pathen lungdei tohlou – michonse nahi nakihet a, nalunggil thuh tah a chonse nahi nakihet ding, Pathen lungdei tohlouva, Alunghanna-ga toh a thiding nahi nakihet ding. Tunigeiya ‘ngaidam kithum loulai nahi’ jong chu achonse nahi nakihet ding. Chonset kisih a, taona a Pathen koma nachonset naphondoh ding, chule, ngaidam nakithum ding ngaiya ahi.

Hiche hi mijouse, agentheipen, ahatmopen, adammopen, achonsepen, achonphapen in jong abolthei ahi. Pathen ngailutnan mijouse ahop cheh e.

{Natoh vanga muding hile, keitobang honvang kikmu jouponte. Angailutnan eihoptha jalin, Aman eikimupin, hichenia kon chun, kakham khama tohtheina jong eipejingtai, miho bang hijou hih jongleng, kisel pumpumin, themchacha eibolsah thou thouve. Hiche jala chu, hiche jong hi seitheina eipeh ahi. Loupina Pakai chang jing tahen.}

Hinla, chonset kisih jong hi thunom ahipoi. Moh maimaiya nakama phongdoh nahilouding, chonse thiding nahi chu nakihet ngaiya ahi. Chule, nachonset naphona ngaidam nathumle, nadinga Jesu Christa thijala chu Pathen in nangaidam ahitai tijong nakihet ngaiya ahi. Chujongle, Pathen in nangaidamle thenlouna jouse le phatlouna jousea kona nasemphat ding ahijong natahsan ngaiya ahi. Ajeh chu, tahsanna Jesu Christa hi nakisantengle, Lhagao Theng thahatna napeh ding ahi(Acts 1:8). Chutengle, nanunchan phalou jouse najopeh ding, chonphatna, nunchanpha thilpha boltheina  napeh ding, Alhacha dia napansah ding ahi.

Achaina in, ipi kisei jongle, “Hinla” tiding aumnalaiye.

Hinla, hicheho jouse ahin, nangman chamlhatna, deilhenna naneiye. Adam le Eve apeh bangin, nang jong chamlhatna, deilhenna nape’e.

Pathen dei hi nabol ding ham? Ole, Pathen dei bollouva adeilou joh nabol nom em? Nathu thu ahi.

Pathen in Ama deilam boldin napanpi tahen.