Anungjui jouse chu Jesu Christa’n hinkho amankhompiji. Hinla,
mijoujaiyin, Jesu-to hinkho aman hi akihetji-lou jeh in kipana le lungmonna
tahbeh aneijipoi. Eiman kihetchet ngaiya ahi.
Jesu Christa chu na Huhhingpu le Pakai dia nakisan ahitah-le, hinkho
namankhompi ahichu kihet in, houjingin. Nagol khatto nakivop’a nahoulouhel-le
nakivopnau chu anopna umlouding ahi. Nahou chana aman nahou ding; panpi
nangaina a nakoule napanpi ding ahibouve.
Na Pakai-to nakivopna a jong chu nahou jing ngaiya ahi. Panpi nangaina
keuseh a nakouji boule, nakivopna lhon chu nomjom louding, an kidalhah jijiu
bang ding ahi.
Houjing jengin, taona in. Taona hi minsin khela tao jingthei ahipoi.
Nalungthimin tao jingin. Thilkhat nabol jousea chun “Pakai, hiche hi nei bolpin”
tijingin.
Ven, hitia nahoujing-le, hichu ‘taona hinkho’ ahi. Na hinkho nomintin,
nalung mongjing ding, nakipa jing ding ahi. Naboljouse jong Pakai panpina
nachan jingding ahi.
“Keiya umjingun, Keijong nanghoa um jinginge. Lengpibah achanga
aga thei lou banga, Keiya na-umlouvu leh napun thei lou diu ahi. Keiya na um’uva,
Kasei chengse hi nanghoa aumle nagot chan thumun kibolpeh ding nahiuve.” (John
15: 4,7)
Pathen in napanpi jingtan.
No comments:
Post a Comment