TUHI PHATPHA AHI

Satan in aloiho le avantil jouse akhop khomin, kihouna ‘inpi toukhomna’ aneipitai. Satan adingdoh in, chouna thu nasatah in aneitai –

“I-atile mihemte hin Jesu Christa akisansan jengu ham? Nanghon ipi nabol’u ham? Iti miho hi nachintup joulouvu ham? Ipidia hitia hi Jesu koma jamlut lut jenguva ham? Ipi ibol diu hitam? Tunia gachea, mihemte  gajollhading, gatuhtang ding koi na-umu vem? Nache tengule, iti bolleu chun tuhtanginge tia nagel’u vem? Naboldan diu khat khat in seiyun” atitai.

Seiding helouvin, phat sottah athimchet jeng tauvin ahile, Satan in avel in akou tai. Hichun, alah’uva khat chu adding doh in “Kei gache nange” atile, adang hon jong ahin tichetchut tauve.

Hichun, Satan in, “aphai. Ahile, iti nagabol ding ham? Ipi nagasei ding ham?” tin adong tai.

Alah’uva, khat adingdoh in, “’Kei chengting, Pathen aumpoi’ gatipehinge”  atitai.

Satan in, “Tahsan pouvinte. Mihem jousen Pathen aum atahsan cheh’uve” atitai.

Adang khat adingdoh in,“’Kei chengting, damun meidil aumpoi’ gatipehinge”  atitai.

Satan in, “Tahsan pouvinte. Mihem jousen damun meidil um atahsan cheh’uve” atitai.

Achomdang khat adingdoh in,“’Kei chengting, phat asot nalaiye, kino angaipoi. Jingtengle kisanna’nate’ gatipehinge”  atitai.

Hichun, Satan akipah behseh jengin, “Tahsan um, son-um lhacha nahi! Gachen, na lolhin teitei ding ahi!” atipeh tai.

Ka insung mite ho, Satan manchah phapen chu “Oldomle, ajouteng, jingteng” ti hi ahi.

Pathen lungdei le nangma dia phapen chu “tuhin, tu-tah hin” tihi ahi.

KIGELIN : 

Na pa, nanu thu naseithei jinga, Jesu hi Pa a naneiya, ‘Pathen cha’ hija nakikoile, na Pa thu naseitheilou ham. Ole, napa chuto nakinailou ham? Koicha nahi nakihetlou, napa nahetlou ham? Ole acha nahilou ham?

 Tuhin kigel’in. Jingtenga din koi hih in. Tutah hin kigel lhuhna neiyin.