LUNG LENGVAI HO NUNNOPNA

“Lung lengvai-ho anun-nom’ui, Pathen’in alhamon diu ahi!” (Matthew 5:4),

St.Augustine chu aneolaiyin, aphamo behseh jengin, Pathen aholholle Thuhillhem tia Houlamkaiten aseiyu Nostic ho ana kijuikha kit tai. Alung lungvai abeipoi. Anasa cheh cheh jengin. Anunchan chu kithatgo jing abangtai. Apan anakaidoh, anun adonda ahitai. Hinla, achaina lamina nu, adalhahsa kom ahinnai kit e. Bible umpi jing, adihtah lai kisimkhah theilou. Akithatgo ahisah un asopi khat in avelhi jinge.

Nikhat chu honsunga hin, lung lengvai tah in aumin, akap dehdeh in, asopipan avelhi jinge. Hitia, alunglengvai laitah a chun akaptai. Ahile, akoma chun chapang neocha khat ogin khat hin, “Tolle, lege” (‘Lanlang simin’ tina ahi) ahinti O ajai.

Ogin chu Vantil ogin bangin ajan ahile, aka ahaiyin, agah kiheile, akoma table chunga chun Solchah Paul lekhathot bu amui. Alan asimin ahile, Paul in Rommite koma lekha athot chu amun asimtai :

“juneh motchon le jukham, huh le jonthanhoi, kinah le kithangset bol louvin, khovah noiya bangin chon’u hite. Hiti chun Pakai Jesu Christa kivonjoh-un lang, tahsa lung nachimna din tahsa lunggul imacha suh bulhit ding got dauvin.”( Rom 13:13-14)

Hichun, Augustine in tahsa nopsahna aholjeh a anu-apa le ainsungmite jouse paidoh le lunggentheina, lunglengvaina akilamdoh chu akimu chentai.

Jesu Christa akimupi ahitan, Christian dihtah, huhhingna kisan, apenthah chu ahitai. Ahinkho pumpin Pathen na atongin, ama hi ‘Mitheng’ tia minvona sangtah peh achangin, Roman Cathalic hihen Protestant jousen jong athuhil ijui cheh’u lamkai lentah ahidoh tai.

Anu monica chun achapa kisemthah ahet chun akipah behseh jengtai. Pakaiyin, ataona ho asanpeh ahedoh in, kipanan adimtai.

Golte, lunglengvaiya Pathen hol hi phatchomna lentah, Pathen kimudohna ahi. Chihna le thepna a Pakai Jesu mu ahahsai. Aman Vana loupina le nopna ahin dalhah a mihem lah ajong, anempen, penna ding jong in mujoulou le michonsepen kithana cross ahung lhen chu geldoh in. Na Pakai-pa naholna in lunggim, lung lengvai le lunggenthei pumin holing. Chonset thaneinan natuh a, apha nahet le nabolnom jong bolmoa nakoi chu kihet in.

Mipha nahi. Koiman seipha hih jonglechun, thilpha bolnomna naneiye. Mijong napanpi nome. Chih ding, thep ding, hao ding; chi le nam, gamsung ding, Pathen lenggama ding, Houbung ding, na inkote dia jong thilpha nabolnom chula em?

Naphat nom, thilpha nabolnoma naboltheilou – gentheina, lengvaina, lungchomna, nunchan phalou, neh louding ne, donlouding don, bollouding bol a nakoithei ahi. Hiche, nasumoa chu ‘tha-neina’ (power) khat uma, hichun nabol ahi. Hiche, thilpha boltheilouna, mipha nahimo sah a ‘ natuh-oh a, na het-oh a’ tha-hat chu ‘Chonset’ ahi.

Thilse nabol chu ‘chonset tha-hatna natoh ahi.

Mi naden, navoh chu ‘suhkhel, bolkhel, aphalou, ase nabol’ ahi. Nabolsah a nalungsunga kona nahin-noa, lunghanna napea, nakhut chalohsah achu ‘chonset’ ahi.

‘Michonse nahi’ tichu ‘Nanga chun chonset aume’ ( nanga chun thilse boltheiya tha-hat khat aume”) tina ahi.

Chonset-jousohpa Jesu Christa, Pathen lungdei doltah a nakisantengle, nanga um, ‘chonset’ tha-hatna chu umtheitalou, jamdoh jenga ahi.

Hiche ‘chonset tha-hatna’ chu nanga kona Jesu’n adeldoh tengle ‘Nunthah, hinkh-thah’ chu nanei ding, Pathen cha, Huhhingna chang, apengthah nahiding ahi. Hichu,

“Mihem pen banga peng hilou, lhagaova peng ahi” ( ven John 1:12-13)

Pathen in phatthei naboh tahen.