PATHEN LHACHATEN MI ANGAILUTNAU KIDANJE

Solchah Peter in tahsanloulai le tahsante eingailutnau hi loupitah ahi. Aman, Pathen in eingailutnau i-Pakaiyu Jesu Christa jala tonsot-hinna eipehnau hi hinna le damna a inei teidiu noma ahi. Chule, hiche, Pathen phattheibohna hi ninglhinga ichantheina diuva haljinga ium diu, Pathen lungdeiya ihin jing diu angai jala, eiho jouse suhhal jing ding hi ama kinin agelin aseiye :

“2Pe 1:13 Hiche pon-in tobang tahsaphea kahin laisea, hiti thudol hea nang ho geldohsah jinga, mit-hah jinga umsah ding hi dih kasai”. (2 Peter 1:13)

Abana, Peter in asei hi lungnat umtah ahi. Ama athiloi ding akihet ahitai. Hijeh achu, ahinlai sunga hi kihaboltah a Pakaiyin ahetsah ho, eiho dia hinna thupha hi pontho tah le homtho tah a aseisei jeng ahi. Asei hi gelin:

 “Ajeh chu i-Pakaiyu Jesu Christan eihetsah dungjuiyin pon-in tobang hiche katahsa hi kadalhah loiding kahetai.
Kapotdoh nung teng geiya hiche ho hi nageldoh jing theina diuva kajochan’a habola kabol ding ahi.
Keihon i-Pakaiyu Jesu Christa le ahung kit ding thu nang ho kahetsah-uva chu semthu thusim pou mangchaa seikahipouvin, alal loupina mit-tah a mua kaseiyu ahibouve.
Ijeh-inem itile aman Pa Pathena kona jabolna le loupina akisan’a, lal loupi chungnungpen a kona ahenga hung ging o-chun “Nangma kachapa deitah nahin, nachunga ka lung alhai ta-ngeiye,” atipet tah chun
 ama le keiho molvum theng chunga ka-umkhomuve, hiche ogin chu van’a kona hung ahi kajauve.
Hijeh chun Themgao thusei chu ginchatna (tahsanna) dettah kaneiyun, nang hon jong khoh sah leu chun aphai, ajeh chu hiche hi munthim laiya khovah lhah geiya kivah tobang le nalungthim sunguva dia Jingvalpa vah tobang ahi.” (2 Peter 1:14-19)

Hiche hinna thu hi nang jong achang maimai hilouva, ninglhingset a chang din ha-kibolin. Hichu, na tahsa hinkho le na lhagao hinkho a dia Pathen phattheiboh channa ahi.

Hiche ‘hinna le phattheibohna’ chu lhingset a nachan theina din, Pakaiyin ipi naseipeh nom em hetna din, athuseina Bible thu hohi tao pumin simin, niseh in sim teitei jengin. Chule, tao jing jengin.

Bible a Pathen thu kijih hohi ahinga ahi. Peter in chunga asei banga hi ‘thuhing’ ‘lhagao thu’ ahijeh in mijousen ahetheipoi. Chule, koiman lhagao theng panpi louvin ahethemthei poi. Athu hi  mijouse simsa le nangin jong nasimsasa hijongle, taopuma nasima, Pathen in nakoma thu aseinom tengle, Athu cheng khat nasimna akona chu nalungsunga thu aseiding, nakoma aseinom chu nalunga hetna chombeh khat, miho seikhah lou jong nahin hetsah ding ahi.

Bible kasim tengle, Pakaiyin hetna chombeh khat jong eipeji. Chutengle, ipi kagel le kaboldia adei ham chu ei hetsahji.

Nang jong chutu bol lechun nakoma Pakaiyin thu aseiding ahi.

Pathen in panpi jingtan.