KIPANA THUPHA SEI HI TAHSA LE LHAGAO DAMNA AHI

Miching le them, hetna nei hohin, ahinkhou nukhah lam hile thu giltahtah aseijiuvin. Adeh a mi alhahnauva asei hoi hi ludom deh ahi.  Solchah Paul in jong athikona thu asei hohi,athusei lah a jong ludehset ahi.

“Ka chedoh ding phat ahunglhung tai,” (2 Timothy 4:6) tin athivah tah ding thu asei vang hi ngai ngam jong umlou ahi.

 Hinla, Pakai lhacha ahina in, ama seiban seijom ding mi angaiicha in, Pathen in mihem jong ana koiye. Hichea chu Timothy anahi.

Timothy chu Solchah Paul in achapa (tahsanna a achapa) a ananei ahi. Hijehchun, athi ding lam in, ama tohban tong jom din phatechan ana hil’in, Huhhingna thupha hi phatecha Bible a pansa a Themgao hole Jesu Christa chule Solchah ho thila pansa a seiphong din mopohna apei:

“Pathen  le Christa Jesu umna in,athi le ahingho thu tanding le  ahung kilah ding le alenggam thudol’a, hiche mopohna hi kapeh nahi, thu hi seiphonglen” (2Timothy 4:1,2)

Bible a kihilna ho le Huhhingna thu seiphongna a Bible thuhila pansat angaikhohjedan Paul in asei in, “Pathen Lekhabu Theng hi naneova lhah nahet ahitai, hiche hohin Christa Jesu  tahsanna akona huhhingna chanthei thudol a chihna napehthei ahi. Pathen in hu alhakhum Pathen lekhabu chengse hi - kihilna ding, kiphona ding, kipui jangna ding le adih lam’a kichuhna dinga phatah ahi” ti aseiye.( Timothy 3:15,16)

Hijeh achu, eihon jong Pathen a huhhingna thu seina hihen nun-le-khanpha kihilna jousea Pathen Lekhabu Theng Bible bou hi pansatna a inei diu adol ahi. Bible hin huhhingna thu eihilub, chondanpha le hinkho man dolin jong chihna eipeuvin, athuhil jouse hin Christa tahsanna jong asosah in ahi. Pathen thu hin tahsante eisadoh un ahi.

Hijeh chun, nangin jong miho thu nahil, thu nasei ham midang nahil teng jongle, mohthu dang seilouvin, Huhhingna thu le Bible thuhil hobou hi seiyin, hiljin. Chutile, Pathen in napanpi ding, nasei ngaihon Pathenna hinna anei theiyuva, huhhingna lama chihna apeh diu ahi.  Hichu, ga-pha sonapen ahi.  Nangma tah jong Jesu Christa a huhhingna thudol a hetna napehbe jing ding ahi.

Chule, Kipana Thupha kiti Jesu Christa a hinna thupha sei hi tahsa le lhagao damna ahi. Jesu’n, Athupha seiphong jongse tahsa le lhagaovin apanpi jinge. Naseichanna nang le na insungmite, chule, na thusei ngai ho dia tahsa le lhagao damna ahi.

Athupha seiphong thei din Pathen in napanpi jing tahen.