JESU EI HO CHONSET THOIDAMNA

“Thil hicheng hi Jordan luigal Johnin baptize achangsahji na, Bethany khoa thu soh ahi. Ajing nikhon Jesu ahenga hung amun Johnin, “Ven, Pathen kelngoi nou vannoi chonset pomang khu. Keiman, ‘Kanunga hung khu aum jingsa ahijeh-in keisangin achungnung joi,’ katipa chu Ama hi ahi. Ken jong ama hi kahepoi, Israel lah a Ama akiphon doh theina dinga hunga twiya baptize chansah kin kabol ahi,”ati .( John 1:28-31)

SIMIN DAMNA LE HINNAN NEIYIN :

Nang ho vang Christa chu hitobanga hi kihil nahipouve; Jesu laigil’a cheng thutah banga Ama chu najah-uva chule Amaa kihila nahiule nang hon masang chonna dol’a chon, joulhep ding ngaichatna lunggul’a haset cheh cheh milui chu napai lhah-uva, nalungthimu Lhagaova ksemthah a, chule thutah dungjuiya adih le athenga Pathen lim banga kisemdoh mithah chu nakivon diu ahi.
Hijeh chun jou pailhan, nang ho khat cheh chu aheng akomto thutah jengin kihou hen; ijeh-inem itile eiho khat cheh hi tibah khat ihibouvui.

PATHEN KIMUNA DIN :

Pathen lungdei nahijoulou – michonse nahi nakihet a, nalunggil thuh tah a chonse nahi nakihet ding, Pathen lungdei tohlouva, Alunghanna-ga toh a thiding nahi nakihet ding. Tunigeiya ‘ngaidam kithum loulai nahi’ jong chu achonse nahi nakihet ding. Chonset kisih a, taona a Pathen koma nachonset naphondoh ding, chule, ngaidam nakithum ding ngaiya ahi.

KIPANA THUPHA DANG AUMPOI :

Jesu Christa thu le mihem chonset a kona a Ami Huhhingna thu tailou Kipana Thupha dang aumpoi.

JESU CHAMNA AHINA

Mihem jouse chonsea, Asempa Pathen-to kina a, kisetkhena, munchom- inchom gela chengkhen ihi gamtauve. Mimasa Adam le Eve in Pathen doumah abol jeh lhona Pathen lunghanga ana kaidoh ahitai.

Pathen chu apha chamkim, adih chamkim atheng chamkim ahin; Ama banga phatna le thenna, kidihna neijou talou mihem chuto chengkhom thei hitalou ahi. 

Pathen chu thil jouse sempa, eiho eisemuva le hinna eipeuva ahi. Ama ‘hinna bulpi, hinna pepa’ chuto kikhen chu ‘thina’ ahitai. Hijeh achu, mihemte hin hahsatna, natna le thina i-touva, tahsa thinung jong le tonsot geiye ‘hinna bulpi’ kijopmat talouva tonsot geiya di thina ‘Damun’ jon ding ihitauve.

INNING KHOMPIPEN JESU CHRISTA

“Solchah ho le themgao ho kiphuna a kiphutdoh, Christa Jesu inning khompipeh hina a”, (Ephesians 2:20)

Jesu Christa hi ‘hi INNING KHOMPIPEN – ‘In’ tobanga kisei ‘Houbung’ a khompipen ahi. Ama bou hin jatchom chom ajopmat ahi - Judate le chiding-namdang, numei le pasal – alhenchom mithengte jouse, akhang akhanga ahinjopmatpeh jing ahin; hiche IN gongso hi khat bou, tahsanna a kitungdoh, tahsante jouse aumkhomnau chu ahi.

LUNG LENGVAI HO NUNNOPNA

“Lung lengvai-ho anun-nom’ui, Pathen’in alhamon diu ahi!” (Matthew 5:4),

St.Augustine chu aneolaiyin, aphamo behseh jengin, Pathen aholholle Thuhillhem tia Houlamkaiten aseiyu Nostic ho ana kijuikha kit tai. Alung lungvai abeipoi. Anasa cheh cheh jengin. Anunchan chu kithatgo jing abangtai. Apan anakaidoh, anun adonda ahitai. Hinla, achaina lamina nu, adalhahsa kom ahinnai kit e. Bible umpi jing, adihtah lai kisimkhah theilou. Akithatgo ahisah un asopi khat in avelhi jinge.

NGAILUTNA KIDANG

 “Nalhinlel, hatlou, dihlou, phatlou, chonse kahi nahet nasasa a nei-ngailut teitei jeng ahi kahetnia pat in kipanan kadimtai!” tihi Pathen koma kataona ahi.

Pathen in, “Michonse, thidia lom nahi chu kahai nahisah ham. Bible sunga aboncha kasei namu chula em. Hinla, ka ngailut jeh a, michavai nahi kahet sasa nahinna dinga kakom nahin belna ding kagonpeh nahi” tia asei kahetnia pat in Bible hi kasimnom nom jengtai.

Adeh in, kachonset, mihemte chonset nunchan aseina, hatmo, themmo ihina hou thu hi ngei kasan, kasimnom nom jengtai.

Pathen in eihetchil dandan’u hi akidange. Kidah um, thet um, paimang jeng ding, thadoh jeng dia lom ihinau hi kamujitengle Pathen in eingailutnau kamu chen cheh cheh jin, Achunga kakipana hi asang cheh cheh jengji.

Lhagao Theng Taitom kiti hi Ipi kiseina ham?

1na. Mihem tamjo hi Pathen tahsana ahi. Hinla, Pathen hetdan le tahsan dan akibangpoi. Pathen chomchom uma tahsan le hou atam e. Hinla, tampi houhon jong Pathen tah khat vang umteidin tahsanna aneithovui. Jesu jong Pathen akon, Themgao khat hiteidia tahsan atame. Hinla, koima dang houva hin Pathen ‘Lhagao Theng’ kisei le tahsan aumpoi.

Jesu Christa nungjui (achomlama ‘Christian’ kiti) honbou ‘Lhagao Theng’ kiseiya ‘Pathen khatseh kihetdan thum channa ahi.

Lhagao Theng Taitom kiti hi Ipi kiseina ham?

1na. Mihem tamjo hi Pathen tahsana ahi. Hinla, Pathen hetdan le tahsan dan akibangpoi. Pathen chomchom uma tahsan le hou atam e. Hinla, tampi houhon jong Pathen tah khat vang umteidin tahsanna aneithovui. Jesu jong Pathen akon, Themgao khat hiteidia tahsan atame. Hinla, koima dang houva hin Pathen ‘Lhagao Theng’ kisei le tahsan aumpoi.

Jesu Christa nungjui (achomlama ‘Christian’ kiti) honbou ‘Lhagao Theng’ kiseiya ‘Pathen khatseh kihetdan thum channa ahi.

Ajehchu, Kitepnalui khangin jong limchom chom in Pathen kilahna um jongle,Kitepna Khang’a hin thum (Pa,Chapa le Lhagao Theng) in kichentah in akilang’e.

Jesu hungpen ding chu, PATHEN henga hungkon Vantil chun ‘Nungah theng Mary chu LHAGAO THENG akona gaiya chapa ahinding, Amin JESU kisah ding, Hatchungnung PATHEN CHAPA kiti ding(Matthew 1:18-23) thu aseiye.

Chukit-le, Jesu Baptist achan chun, LHAGAO THENG chu JESU chunga ahung chu-in, vana konin PA chun thu ahinseiyin “Ka CHAPA deitah” ati.(Matthew 3:16-17)

Jesu’n thu aseina in Pathen khatseh ahi aseijing’e.Pa koma ataona in jong Jesu’n, “Pathen tah khatseh Nang le nahinsol Jesu Christa ahet diu hi tonsot hinna ahi.”(John 17:3) ati.

Chule, Pathen khatseh, lei le van chule asunga umjouse Sempa eihon ihettheinau chu Jesu Christa jal bou ahi. Hiche Pathen chu Jesu’n ‘PA’ tin akouve. Hiche Pathen jala chu Jesu Christa mihem’a ahungpeng ahi. Jesu chu Lhagao Theng akona hung kijila ahi. Hinla, ‘Jesu’ kiti chu ‘Mihem’ min ahin, Pathen mihema ahungpena, mihem lim le mel aputna, mihem tahsa le mihem hina lhingset aneina min ahi. Mihem a aumpet chun Jesu’n Pathen hi’na (DNA) lhingset anei bangin mihem hi’na (DNA) lhingset aneiye. Hiche jeh achu, Jesu chu ‘Pathen-mihem’(God-man) kiti ahi.

Chukitle, “Pa le Ama Jesu chu khat ahi” Jesu’n asei jinge (John 14:9-14) ati ahi.

Hijeh achu, eihon Pathen khatseh chu “Pa,Chapa, chule, Lhagao Theng” tia ihet’u ahi. Pathen chu ‘Pa’ hija, ‘Chapa’ le ‘Lhagao Theng’ jong hija ahi. PATHEN khatseh chu PA ahin, JESU jong ahin, chule LHAGAOTHENG jong hija ahi.

Achutile, ‘Lhagao Theng’ taitom jong chu ‘Pathen’ taitoma tina ahi.

Hichea, Jesu’n “Lhagao Theng taitom ngaidam changlou ding” ati hi hetchetna din, asei lona, mun le phat (context) veuhite. 

Jesu leiya alenlai chun Pathen thu le Pathen Lenggam thu umdol chule ‘Pathen Lenggam’ a luttheina dia, mihem chonset soh a aumnauva kona ‘Huhhingna’ dia Pathen tohgon, Ama (Jesu Christa) a tohchamkim ahiding thu ahillei. Hinla, mihem dia hetchamkim thei ahipoi. Ama (Jesu) seijuite jengin jong ahechenthei pouve.

Hijehchun, Jesu’n seijuite chu alhamonin, Ama achedohjoutengle, Ama khel a Lhagao Theng seijuite le Anungjuite kithopi dia hungding aseipeh e. Hiche, Lhagao theng chu ahungtengle Jesu thudol le athuhil jouse ahettohsah diuvin aseipeh e(John 14:26; 15:26; 16:12-13)

Hiche Pathen tah khatseh lungdei bollouva, ataitoma chu ‘Lhagao Theng taitoma ahin’ hichu ngaidam changlou ding ahi.

Jesu’n, “Pakai, Pakai, eitichan chu Vana lenggama lut ding ahipoi. Koi-hile, Vana um Kapa lungdeilam bola bou lutding ahi” tia asei (Matthew 7:21)

“Pathen tah khatseh Nang le nahinsol Jesu Christa ahet diu hi tonsot hinna ahi.”(John 17:3) Hichea ‘het’ atihi, Pathen, Pakai le Huhhingpu, chule, Lenga nei kiseina ahoptha ahi.

Hitia chu, “Lhagao Theng taitom” tia asei hin, Pathen tah khatseh le ahinsol Jesu Christa lhatdamna  Kipana Thupha, Lhagao Theng in aphondoh hi ja’a hetah a tahsanlou chu ngaidamna changlou ding, tonsot damun meidila chetei ding ahi tia kiseina ahi.

Aban in,  Mark 3:28-29 sunga, Jesu’n lhagaoboh mihempa akona anodoh-le, mipin kidang asauvin, Pathen in apu-apateu ahinteppeh jing David chapa Messiah chu hitadin ageltauve. Hinla, Pharisee hon vang, adeh jinguva, athana ding aholjing bangun, lhagaoboh anodoh jong hi, Jesu chu Beelzebub  lhacha danin aseiyuve.( Beelzebub hi Judaten ‘Satan’ aseinau ahi)

Hiteho donbutna achu, Jesu’n, “Satan in iti Satan anodoh ding ham?”, “Lenggam chu akihopkhen-le iti dingdet thei ding ham? Satan in Satan adoule dingjou louding, akichaidoh ding bou ahi” atipeh’u ahi. (Mark 3:23-26).

Chule, Matthew 12 sung keuva jong hin, Jesu’n dammo tampi adamsah in, lhagaobohvop ho anodoh peh e. Mipin kidang asauvin, Jesu hi “David Chapa hung ding(Messiah/Christa) chu hingap ding hitam” tin agel’un, aseijiuve. Pharisees hon vang adeh jinguvin, athana ding angaito jinguve.

Pharisee ho hi Judate hou-lamkai, Pathen thu themtah ahiuve. Baptist John thusei jouse jong aheuve. John in Jesu Baptist abol chun “Lhagao Theng vakhu bangin ahung kumin, Jesu chunga chun aumjing tai” tia asei jong aheve.

Jesu’n, “Pathen Lhagao chu keiya hin aum jinge” tia jong asei ahi” (John 4:18) ahejinguve.

Jesu hinkhoman dan le thuhil, anatoh kidang jouse jong amuve. Hinla, Pathen Chapa ahi, Christa (Messiah) ahi chu atahsan nom pouve. Tha ding joh inbou aholjinguve. Anung ajui jingun, hinla, tahsana anungjui hilouva thana ding changlhi jinga jui joh ahiuve.

Hijeh achu, Pakai Jesu chun, “Pathen lhagao thahatna a lhagaoboh ho kanodoh ahile, Pathen Lenggam chu nang ho koma ahung umtai” tina ahi” tin jong aseiye(Matthew 12:28).

Hinla, atahsan nom deh pouve. Henasa tahsanlou hochu Pharisees ho chu ahiuve. Adih le atah ahihea tahsana sangnomlou hochu Lhagao Theng taitom ahi.

KHUMKHANA (LHAGAO THENG TAITOM):

Mikhat (Adam) suhkhel jeh a mijouse dia thina uma ahitai (Rome 5:12) Hinla, Jesu Christa jala mijouse huhhinga umding ah (Rome 6:19). Hiche hi ‘Kipana Thupha (Gospel) ahin, tahsana kisan ding ahi. Hichu, masangpeh akona Themgao hon ahinseisau ahin.

Jesu’n leiya alenlaiyin, hiche Kipana Thupha hi asei ahi. Hinla, mihem hon ahethem joujai pouve. Seijuite jengin jong ahethem pouvin. Jesu’n, “Lhagao Theng chu ahung tengle ijakai nahilchetpeh diu ahi” atitai.

Pentecost nin, Lhagao Theng ahungin, seijuiten Kipana Thupha ahechen taovin, ngampel in, alhangsap taove. Hiche nikho keu chun mihem sangthum tobangin atahsan’un, “Christian” aumpantai(Acts 2).

Pakai Jesu’n Peter mangcha a A Houbung atundoh ding,(Matthew 16:18) aseibanga chu, Pentecost nia Peter chu Lhagao Theng in avop a, amanchah a, Kipana Thupha aseiphonga “Houbung” chu atundoh ahitai. Loupina Pakai chang jing tahen.

Pathen thutep athon ngaipoi.

“Atahsan chan mangthah louva tonsot hinna aneiding”(John 3:16) ati jong hi thon louding ahi.

Na tahsan-le ‘Huhhinga umlou-theilou nahi”

“Ole, katahsan vangin, huhhing in ka umda jengdem O?” nati jeng em?

Ngol hih tang! ( angeiloule, nei ngaidamuvo, Jesu minin)

Tahsan jengtang. Pathen thusei thon ngailou chu.

Adam koma “Na neh nini nathiteitei ding” atia, Adam in aneh jeh a mijouse dia thina um jeng. Pathen in asei chu umteitei jeng.

Adam jah a thuseipa chun, tunia nakoma ngailutna a thu asei ahi. Achapa jesu Christa hi

“Natahsan nini tonsot geiya hinna kapeh ding nahi” ati ahi.

I-nati ding ha?

Pentecost nia kona tunigeiya, Pakai Jesu’n Lhagao Theng akona lhacha mihem amanchah a, Kipana Thupha hi sun le jana lhangsap a umjing ta.

Lhagao Theng hi ‘Pathen thu eihilchetpeh kimuva aahitai. Vannoi pumpi Kipana Thuphan alodim ahitai. Mijouse tobangin ajatai. Ajaloulai hon ahin jahcheh diu ahi. Hitia chu ja jinga jalou, hea helou, mua mulou jouse chu “Lhagao Theng Taitom a Ngaidam changlouding’ ahiuve.

Lhagao chu mihem mit in mutheilou chula.

Hijeh achu, Lhagao Theng chu mihem, Pakaiyin alhen miho sunga pansa a thu aseijing ahitai.

Hitia, Lhagao Theng kithopina a thu asei le natoh kidang atoh ho tahsanlou ho; michonseho Huhhingna athi le athokit thu, Lhagao theng thahatna a seijuite le tua le khonunga hin seipeh ho phondoh ‘Gospel Thupha’ sanglou jouse chu ‘Lhagao Theng taitom’ tonsot damuna thoh gim genthei thoh ding ahiuve.

Bible in aseiye : Thutah hena sasa chonset dalhalou ho chu tonsot a meikongjing, Pathen doute bolgimna achu lut ding ahiuve.(Hebrews 10:26-27)

Hiche damun chu nachanlouna din, tuhin, nalung tahsah louvin(Hebrews 4:7), Pakai Jesu hinbelin.

Taovin, “ Pakai, michonse kahi. Neingaidamin. Kadinga nahung thina-ga chu neichanin. Kalung sunga hin hung chengin. Kahinkho hi nakhut a kapei. Ka Pakai, Ka Lengpa le Ka Huhhingpu din kasange. Nalungdei hinkho chu neimansah in. Lhagao Theng in nei panpi jingin, Jesu minin, Amen”.

Hitia chu nataova ahile, lungmongin. Tahbeh in taovin. Hichea kisun sanga kichil hin taovin. Na chonsetna jouse le nalhinlelna jouse chu, guhthim in taonan, Pakai anga phongdoh in, ngaidam thumin. Pakai le Huhhingpu hidin kouvin. Na hinna, nadamna, nahinkho le ijakai Ama khut a katdoh in, Pathen cha hinkho namansah ding le Lhagao Theng a napanpi jing din ngeh in.

Athutep thon ngailou Pathen in napaanpi tei ding ahi.

Pathen in panpi jingtan.

PATHEN LHACHATEN MI ANGAILUTNAU KIDANJE

Solchah Peter in tahsanloulai le tahsante eingailutnau hi loupitah ahi. Aman, Pathen in eingailutnau i-Pakaiyu Jesu Christa jala tonsot-hinna eipehnau hi hinna le damna a inei teidiu noma ahi. Chule, hiche, Pathen phattheibohna hi ninglhinga ichantheina diuva haljinga ium diu, Pathen lungdeiya ihin jing diu angai jala, eiho jouse suhhal jing ding hi ama kinin agelin aseiye :

“2Pe 1:13 Hiche pon-in tobang tahsaphea kahin laisea, hiti thudol hea nang ho geldohsah jinga, mit-hah jinga umsah ding hi dih kasai”. (2 Peter 1:13)

PATHEN TO NA KIJOPNA PHUTDET JINGIN

Christa jala ka insungmite, “Pathen le i-Pakaiyu Jesu Christa nahet nauva konin lungsetna le chamna nachunguva lhingset’in pungjing tahen.” (2 Peter 1: 2)

Hejingin,I-Pakaiyu Jesu Christan, “ Ama loupina le aphatna chankhompi dinga eikoupau (Jesu Christa)  ihet jehuva, Pathen ngaisah a hintheina dia, thil ijakai (angaicha jouse) aboncha a Pathen thahatna akona eipeh-u ahitai.” (2 Peter 1: 3)

Hiche, Pa lungdeiya hintheina dia Lhagao Theng tha-hatna eipeh’u hi kihet a, Bible sim le taona a kivoppi jing ding ahi. Chutengle, Aman eipanpi jing diu ahi.

APHA LHEH E

Pathen in Ama limloa eisemu ahi (Genesis 1:27). Amato kijopthei ihiuve.
Chamlhatna jong eipeuve. Athu nit le nitlou ding; Ama ngailut le ngailutlou theina dia chamlhatna jong eipeh’u ahi.
Pathen in leiset le asunga ijakai asemchai chun, asemsa jouse, nang le kei pumin –
Phatechan aven, alung alhai lheh jengin,  “apha lheh’e” tin aphongdoh tai(Genesis 1:31).
Tua jong Pathen in navet jing ahin, “Apha lheh e” nati na dem?
Eiho vang, “Apha lheh e?” tithei ihipouve. Hinla, Achapa Jesu Christa tahsana Leng le Huhhingpua ikisan tengule “Apha lheh e?” eiti jiu ahi.

ADEILAM BOLTE PATHEN APANPIJI

Pathen in Ama deilam bolte taona asangji. Noiya Hezekiah taona Pakaiyin asan dan hi simin. Nang jong Pa lungdei nabolle nataona san ding ahi. Pa lungdeilam, Jesu leiya ahunga pat chu “A chapa neisun Jesu hi tahsanna, Leng le Huhhingpu a kisan ding ahi” ahi. Imacha thilpha nabol masat angaipoi. Nungngah – gollhang in dongmanu/pa nohphahsah ngailou, lekhasim, natohna, sumkolveina jong nohphahsah angaipoi. Nahi bangbanga chu, chonsepen hijongle chun Jesu’n nangailut ahi. “Kisempha masa’n” atipoi. “Na chonset thisan bangin sanjongle, buhbang bana kabansah ding ahi” ati ahi. Joungailou Pakai ahi. Tahsan in, Nahi bangbang chun akoma chenlang “Pakai Jesu, nang katahsan’e, Ka Leng le Huhhingpu in kakisan’e. Neipomin, Pakai.” Tin taovin.

KA THUGUH 15na

April 2010 kipat chun  ‘ih-mut theilouna’ kaneiyin. Tao git kajajin, kalup le agingcheh cheh jin, ei suhal in kalim jitai. Ka inkote hetdin ihmut-lem kaboljin, amaho aihmut tengule kathoujitai.Ih-mutna ding tia kadona- kanehji vangin, kalup-le taogit chu na nakhanga aging lelul in ka lim chehcheh in, hi-mut sangin ka thouvin, taogit chu hoilam ham tin kaholjin, thih Almirah sung ham tin kaholjin, aging lul luljin, hinla, kavetphatmong tengle inning lamtah chu ahikitji. Kahol holjina in, ka ihmut sona jouse abeijin, kalim cheh cheh jitai. Hapta ni chunglam in kalel tai.
Jan khat nidan 10 dona hin, Ventillation achun indan hoitah khat kagahmun, Doctor le Nurse tobanga von banglieh a kivon pasal khat le numei khat kihouva eingah le eitoupiuvin kamun ahi. Akihoulim lhonin kei thu asei lhon hinte. Kalup le katho kahaljet-le, pasalpa chun “Kilup in, ki hihmut in, kicholdon, naleltai” eiti.

VAN JOTNA LAMPI JESU BOU AHI

Mipha nahiman, thilpha nbolman, Pathen thu, Bible nahetmana Van-gam luttheiding nahipoi. ‘Ticket’ ngaiya ahi. ‘Van-gam ticket’ hi ‘Jesu Christa’ ahi. Bible paovin ‘Van-gam jotna Lampi’ akiti. Tulai paova hetbaipena seidia ‘Ticket’ ahi. Tulai chapang ho koma ‘Jesu hi Van-gam Lampi ahi” tilechun, Jesu chu ‘Road’ tobanga ageltheiyu ahi. ‘Ticket’ tilechun ahet-bailet diu ahi. Bible pao kakhel ahipoi. Hetbaina dia kahilchet ahijoi.

TUHI PHATPHA AHI

Satan in aloiho le avantil jouse akhop khomin, kihouna ‘inpi toukhomna’ aneipitai. Satan adingdoh in, chouna thu nasatah in aneitai –

Christian Jouse Hi Pathen Houin Ihiuve :

“Pathen Houin nahiuva nasunguva Pathen Lhagao achen chu nahetlouvu ham?

Khattouvin hiche Pathen Houin chu asuhmangle Pathen in ama asuhmang ding ahi; ijeh-inem itile, Pathen Houin chu atheng ahin, nang ho a-Houin chu nahiuve.” (I Corinth 3:16-17)

KIPANA THUPHA SEI HI TAHSA LE LHAGAO DAMNA AHI

Miching le them, hetna nei hohin, ahinkhou nukhah lam hile thu giltahtah aseijiuvin. Adeh a mi alhahnauva asei hoi hi ludom deh ahi.  Solchah Paul in jong athikona thu asei hohi,athusei lah a jong ludehset ahi.

“Ka chedoh ding phat ahunglhung tai,” (2 Timothy 4:6) tin athivah tah ding thu asei vang hi ngai ngam jong umlou ahi.

KIPANA THUPHA SEI HI TAHSA LE LHAGAO DAMNA AHI

Miching le them, hetna nei hohin, ahinkhou nukhah lam hile thu giltahtah aseijiuvin. Adeh a mi alhahnauva asei hoi hi ludom deh ahi.  Solchah Paul in jong athikona thu asei hohi,athusei lah a jong ludehset ahi.

“Ka chedoh ding phat ahunglhung tai,” (2 Timothy 4:6) tin athivah tah ding thu asei vang hi ngai ngam jong umlou ahi.

JESU-TO HINKHOM HI KIPANA AHI

“ Vo khangdong, nakhangdon kipapin! Nakhangdon pet’in kipah jingin. Nabolnom nom bol’in, nadei deiyin chonin……………” (Ecclesiastes 11: 9)Nadeideiya navale, natohthei, hinkho namanthei laiyin, kipah tah in hinkho mangin. Hinla, nabol jousea chun nasempa lungdei ahiho bou hiteidingin kihabolin, tao jingin. Aman aphal chana chun kipah in, lhingset in gelin. Nangma loupina ding hilouvin, napepa Pathen loupina din bolin.