“Chujouvin diabol chun molsang tah khat chunga
Jesu apui touvin, vannoi leiset lenggam jouse le aloupina chengse avetsah soh
keiyin, ajah a, “Kahenga naboh khup’a chibai neiboh-le hichengpi hi peng kate.”
ati. (Matthew 4:8-9)
Hichea hetdoh thei chu - vannoi leiset le aloupina ho
ahin Satan (Diabol) in tha aneiye. Jesu chu Pathen chapa ahijalin, alhemlha
poi.
Nitinin, eiho jong eilhem jinguve. Leiset loupina le
lalna, thuneina le haona, nopsahna ho le nopchonna hohin eilhem jinguve. Jesu
Christa neilouvin, lhepna hohi ajoujipoi.
Jesu Christa bou ahi, Satan gal jousohpa. Ama naneiloule
najo louding ahi.
Jesu chu Pathen Chapa ahi Diabol’in ahetna chunga alhep jengtheile,
vannoi leiset le aloupina hoa hi ama thaneina uma, chule, mi apehthei ahijong
akihei. Hiche hoa Pathen Chapa bon alhep jengle, nang le kei hi iti eilhepda
diu ham?
Hiche hohi deichatsah a mihem hohi Pathen loupina
mutheilouva mahthah jing jenga ahiuve. Chule, hitia loupina le lalna neo hohi, Pathen
peh hilouva Satan hin apeh jong umtei ding ahi. Chihthei angaiye.
Jesu ‘n Ama ‘tonsot lenggam’ a vaihom ding ahi aki hetchet
in, Diabol’in apehgot hi kemmang thei lenggam ahi ahei. Hijehchun, anompoi. Ajehchu,
Diabol’in apehgot sanga loupijo, detjo, hatjo chule thaneijo lenggam dettah chu
anei ahi ahei. Hiche Lenggam thudol chu Pilate koma kichen tah-in aphong doh-e.
“... keima lenggam chu hiche vannoiya kon ahipoi, kalenggam vannoiya kon
hileh Judate henga eikipehdoh louna dia eivengtup’a pang hon asat diu ahi;
tunla keima lenggam chu hichea kona kisemdoh ahipoi,” ati (Jn. 18:36).
Nang jong, Jesu Christa natahsanna hi nahetchet ngaiya
ahi. Jesu Christa lalna gam chu nahetchet loule, lhep chatvaiya na um jingthei
ahi. Jesu’n vang ahechenin, lheplhah in aumpoi. Nang jong nahetchet-le, lhemlha
ponate. Nahetpa, Jesu Christa chun najopeh ding ahi.
Christa lalna le vaihomna lenggam vang mantih neilouva
thanei tah-a dettah-a umjingsa chule khangtou jing ding, akhonni geiya umjing
ding ahi (Isa. 9:7).
Hichu hechenin. Nahetchet a nakisantah ding kakineme.
Ole, nakisanloulai jeng ham?
Nakisan tah-le, akisan lolai ho seipeh in. Nakisan
loulai-le, tuhin Jesus chu kouvin, na Huhhingpu le na Pakai din kisanin.
Pathen in panpi jing tan.
No comments:
Post a Comment