Thursday, 13 November 2014

Christa Lhagao Neiho Nunnopna

1. Jesu Chista hi Pakaiya neitahtah hochun, 'hinnopna', 'kipana giltah' anei jiuve. Ajehchu, Aman 'lhagaova' mi achenpi tengle achenpi ho lhagao chun lungmonna aneiyin, imacha olmona ding aneijipouve.
Chutengle, hiche La dihtah in asatheiji taove:
"Jesu nei hi hinna nom, kipana thuguh ahi, Kalhagao monna eipei ;Jesu neibou kipana."
Chutengle, thudihtah he in, avel velin asajiuve "Jesu nei chihna bulpi, Jesu nei haona bukim;Jesu nei chu vannoi toh kikhenna" ti in.
Chule, Jesu nei jouse chu 'vannoi' chonsetna hohito akikhen tei jiuve. Ajehchu, hiche vannoi chonna hohito, asunguva Chista lhagao chu akivopjipoi. Mihem in lhepna hohi ajoji ahipoi. Asunga lhagao umpa chun ajopehji ahitai.


2. Jesu Christa lhagao nei jouse chu aumthimthei pouve. Aman aseisa ahi "Lhagao Theng nachunguva ahung lhun teng thahat naneiyuva, .....Keima het-tohsah a napan dingu ahi,” ati (Acts 1:8) banga Kipana Thupha hi aseisei jengjiu ahitai. Labolpun, ati hi aumdoh jengia ahi, koima sol ngailouva abol jengjiu ahitai :
"Jesu kanei hi seichoi lenge vannoiya,Tahsan-nan kamu chen tai ;Athina mel Cross chunga" tin aseijing jitauve.
Vetda le theida aumleu jiuvin, Houlamkai, thunnei le Bible le Pathen thu-a thunei le vaihoma kigel konkhat hon,
"Koi solkhoh nahi ham?" atiji vangun, abolteitei jing jiuve. Hitia kihouna hi tukhang keuva um ahipoi. Solchah Peter le adang jousen jong  anatosau ahi. Hichu, thoh mah aumna aumin, hinla, kipatepna, tahsan le pandet le detlou ki patepna phatah ahiji. Moh-maimaiya, minchena ding le phatchomna dang holbep ho chu, hitia kikhamna ho ahin thip tante. Christa lhagao (Lhagao Theng) chenna mite vang phothip jat ahijipouve.

3. Leiset ahin kipana le nopsahna phatchomcha cha din aume. Hinla, hiche kipana le nopna ho hi phatchom khat jou tengle, kisihna, kipalouna, lungnatna asoh kitji. Hiche hohi 'alem' ahi. Hiche hochu, haosatna, thuneina, minthanna, ju-le-khamna thei ho bol, sum kichep le numei-pasal kichepna, chule adang dang ho ahi.
Hitiho lhangaiya, Pathen sanga hiche ho khohsah le itjo hohi, Jesu'n, 'Mihao' atia "Mihao ho vanggama lut sangin sangongsao heubil-homa alut abaijoi" atihi ahi.
Hitia, vannoi haona hol hohin, 'vannoi chihna' angaisanguve. Chule, 'vannoi chihna' hohi chunga kisei 'vannoi kipana le nopna' holna le muna dia 'chihna' bou ahijeh in, Pathen thu (lhagao thu) ahetheipouve.
Hitobanga, vannoi haosatna a hao hohin Jesu  amuthei pouvin, achihna le athepna houvin, Lhagao thu ahethemthei pouve. Labolpu' jong aseiye:
 "Jesu nei hinna nom, mihaoten mujoulou,Miching hon ahethem poi ;Koi jeh a dangchah hintem."
4. Christa lhagao neiho vang chun, leiset hi phatchomkhat ding bou ahi aheuve. Chule, Jesu thokit banga, atahsan jouse thoukit a amato tonsot a cheng khom ding ahi aheuve. Hijehchun, leiset haona, nopsahna le chihna-thepna sangin, Christa neiding le Pathen lungdei bou aholjiuve. Hitobang miho chun Pathen thu hi anit un, Labolpu hi alabol asah piiuve :
" Van Canaan ka in ding leiset kakholjinna,Aigupta ahah taloi ;Ka Lal-Jesu neipuiyin."

Hitia, tithei ding chun, Pathen in napanpi jing tahen.

No comments:

Post a Comment