Kei-to ikimu-le Keiya Nahi Jeng, Mito Nakimu-le Mi-a Nahi Jeng

“Kei-to ikimu-le Keiya Nahi Jeng, Mito Nakimu-le Mi-a Nahi Jeng”

Hiche ‘La’ in kanao neochan jingkah chun ahin sa’n ahile kanui aja’n, hinla, nilhum keiyin kalungin aumlo’e.

Kalungin, ‘hitobang lachavai, numei chavai nunchan La a kibol” katijin suhmil kagot-le, kahetlou kah in, kaalungin, golkhat lele chu kasasa jeng in; kalung ahan vangin, alonaje kahepoi.

Abangle, abolpa hi kalung asejin, “Labolpa hin numei chavai tah ana kideipi hichu me” katiji. Adang komle, “adangmanu hi naochaga, ahiloule, anu-apan achintup vala loi le gol ngaicha jing hithei ahi. ‘Mi-leingai’ tia upaten asei jat hou chu hintin, koi dang chu adei hideh louva kivoppi dia adeiji bou hintin, adaongmapa hin amoh ginmomo hinte” kati kom aumji.

Nilhah lamtah in, kalunga hitin kageltai : “Ole o Pakaiyin, kakoma sei anei jong ham” tin kagel tai. Hichun, Pakai Jesu’n, “Ka golte nahiuve” (John 15:15) muna asei le “Keiya um jingun”, "Kathupeh nanghoa aumle, nagot chan thumun, kibolpeh ding nahiuve" ati, chule, Ama Moulang hija anungjui Christiante hi ‘Mou’ banga aseina ho kahin-geldoh tai.

Abanin, ‘Song of Solomon’ lekhabua Pasal (Jesu Christa tobang) le Numei adongmanu (Christian/Houbung kiseina) nunchan khu kahin-geldoh in, aban banin kalung sunga thu ahung kisei jingtai. Hichun,

“Kei-to ikimu-le Keiya Nahi Jeng, Mito Nakimu-le Mi-a Nahi Jeng”  tihi Pakai Jesu kamcheng in kahin jatai. Hitia ahinsah (sei) bangin kajatai :

1.“Hou-ina nahungteng Keiya nahijin, mundanga na cheteng mi-a nahiji” ;

2. “Christian lah a na umteng Christian nahijin, Hindu lah a na umteng Hindu nahiji”

3. “Sum naneiteng Pathen nahenan, sum naneilouteng nasumiljitai.”

Christa-a ka insung mite ho, Hou-in le inmuna hin Pathen iheji nauve. Sum mun, ju-mun, Houdang ho lah le sokal natohna mun, sumkol veina mun ho le thunei-vaihop kichuna muna Christian hina hi anohphah jin, suhmil abaijitai.

Chutengle, chunga La-a kisei nungahnu sang jong hin oimo le Pathen donda hiding abaiye. I-golpau, ijipao (Moulang Jesu) hi lungnatsah louva, adongma, aji kitahtah ibah jing diu adei ahi. Hijehachu, athusei Bible’a um hohi geldoh a nit jingna dia niseh-le simdia eideiyu ahi. Adeh a, achavaiya i-umlouna diuva, tao jing dia eihilu ahi.

Lhepna nalhah louna din kigingin tao jingun, lhagaovin ago nan tahsa alhasam behseh jenge!” ati. (Matthew 26:41)

Pathen in na umpi jing tahen.