1.Insung
Umdol : Pasal
khat le numei khat kichenga, kingailugel, kitahsan-to jing, chule, hinkhoa
chengkhom hi insung kitup le dei-um ahi. Hitobang nu-pa hin chate ngailutna neiyin,
kitohtah in chate aseilen jiuve. Hitobang insunga hin, lungmong tah in, insung
dettah, kingailutna dimset le nu-le-pa chule pute seilet in chate seilet in
aumjiuve. Hinla, insung jouse hi ‘insung kitup’ ahi joujai poi. Chate jouse hi
insung det a kona kiseilen ahicheh pouve. Dihtah a seidin, mitamtah hin, ‘insung’
kiti jong hi ipi ahi ahepouve. Nu le pa hi khatvei sanga tam jinei ahikhah
jengule, ‘insung’ kiti hi itobang ahi hetthem hahsa ding mong ahi. Chutu nahi
khah jengle, napa tah sanga napa-thah (pano/panon) namutah joh thei, chule napano
chu ipi sahding jong nahetlou maithei ahi. Sopi le lang-sopi numei le pasal
tampi, pino-puno tampi naneithei ahi. Hitobang insung hi ‘insung longkhom’
tiuhite. ‘Insung longkhom’ tampi jong kipah tah in aum’un, khat le khat
akidomtouvin, ngailutnan akijopmat jiuve. ‘Insung longkhom’ tamjo vang
kingailutna aumbehseh pon, michom cheh chengkhom abang jeng jiuvin ahi.
Konkhat insung hi ngailutna’a
kikankhomna ahin, adang din vang kitolouna, kinahna ahi. Abangkhat vang anu’vin
adalhah a, pa she in chate achenkhompi, ahiloule, nuno-to cheng khom aum kit’e.
Insung kon khat ahkit-le, nu’n achangseh’a chate akhoukhahna umkit’e. Nupa
kikhen insung, ahiloule, anu’n, aguh’a midangto ahinvop’a cha anei jeh’a apa’n
donlou hela anu keuseh in, guhthim’a achanga aseilet, ajipa’n donlouhel, ‘ki-thingnoi-cham’
a chengkhom insung jong aumkit in ahi.
Hitobang insung thua hi Pathen in
ipi asei umam? Insung nommo le kituploute dia ipi kinepna thu Pakaiya kona um
am?
Pathen deitah vang chu, numei khat
le pasal khat chu kituptah a kichenga, cheng khom diu, amani tailou midangto kitimatna
neilou helding. Hinkhoa kicheng lhonding, kikhenna umlou ding. Hichu, Pathen
dei insung ahi. Hitobang insung chu ‘chate dia van-gam’ tobanga, aphalama
kiseiletna ahi.Hinla, hitobang hillou insung tampi jong aum’e. Ahile, insungpha
ho bou Pathen in avet le phatthei aboh ham? Insung kituplou hodia Pathen in
gonpeh aneilou ham?
America
gama Theological College Professor Pastor David Feddes hin aseidanin, Pathen thusei tampi le eiho jouse hin
insungpha ho i-seiphauvin, akituplou ho i-seiseuivin, hinla, hiljong i-hilnom
dehjipouvin, i-thet bolun, donlouvin ikoi jiuve ati. Pathen vang chuti ahipoi.
Insung pha ho vang aboh in, akituplou ho jong asempha nom’e. Chule, insug
kituplou le insungbei hoa kona kiseilen chate din jong gonpeh anei cheh’e.
Bible hin
insung kituplou, ase le apha kihalna le achavaipen jong aseiye : numei ni hin
cha aneinomval lhonin apau ju adonkhamsah lhonin, aluppi lhon’e; aji
khelnonthet, ajam jam jeng; aji thisa numei khat jong cha aneinomval jeh’a
limchoma kisema atehpu luppi; gamvaipo khat in miji susea ajipa mi tha-sah; Pathen thusei khat jinu notia panga ajipa
hilouto cha nei; chule adang tampi uma ahi. Hiche ho hi eiho kichatna ding le
eihon hiteho-tobang ihidiu deina jeh’a Pathen in Bible’a asei ahipoi. Hitobang
setna hi um jeng jongle Pathen in tohdia agon chu atohdoh thou thou ah idol le
ami ngailutna chu hitobang hoa jong hi avetsah le asodoh thou ahi hetna dia
aseisah, ajihsah ahijoi.
Hijeh chun, mi konkhat in “Pathen
thusei hohi mipha ahiuvin, miphaho bou aheuvin, apha ho phat chehna din bou thu
aseiyun, aphalou ho din mun aumpoi” atiuve. Hitobang thusei hi Jesu Christa
kipana thupha ahipoi. Achutile, miphalou ho ahoptha lou ding ahi. Jesu Christa
vang thudang hel hinpoa ahi. Bible hin, insung kituplou, miphalou le chatvaina
hoa um jouse din jong Pathen in thil gonpeh aneidol aseiyin ahi. Insungnomlou
le chavai hoa um le hung kiseilen, chaga le suhgenthei, chotpha le bolgentheiya
umte din jong Jesu Christa’a Kipana Thupha hin kinepna le kipana anei diuva
Pathen in agon ahi.
( aban ‘2. BIBLE A INSUNG CHAVAI PATHEN IN PHATTHEI ABOH HO’ hi phat-kit, jankit-le
seinaute, anasim teiyin)
Pathen thu Bible hi nitinin simin, nasim ho
nahetthemna din taona nei jingin. Chule, tao jing jengin. Jesu Christa hi,
nataona jousea kou jing jengin, na chenpia, nakivoppi jing din ngeh jingin.
Leng le Huhhingpu dia nakisan loulaile, kisan in.
Athupha nasimna le nataona jouse sangin, Pathen in
Jesu Christa jalin phatthei naboh jing tahen.
No comments:
Post a Comment